“Tuamba lukasa butudi nabu!”
1 Muntu kampanda ukadiku mukukose ku dîyi mu buambi pauvua wakula bilondeshile diyuki diuvua mulongolole bimpe ne: “Tshiudi ukeba ntshinyi? Amba buudi nabu!” Ntshinyi tshitudi mua kulongela pa bualu ebu?
2 Lelu’eu bantu ba bungi kabena ne lutulu nansha. Mbasue kumanya tshitudi ne bua tshinyi tudi balue kubatangila. Padibu bamona ne: tshipatshila tshia dikumbula dietu ntshia kuyukidilangana pa Bible, badi mua kubenga kututeleja. Dibala Bible ne mayuki a malu a mu nyuma kabiena ne mushinga mu nsombelu wa bantu ba bungi to. Mmunyi mutudi mua kutuisha bantu ba nunku bua ne: badi ne bua kulama minite mikese bua kuyikila netu pa Bible?
3 Ngenzelu mutambe buimpe: Bualu bunene mbua kuambila muntu ne: Bible udi uleja mishindu ya kujikija malu adi amutatshisha ne kuenza nunku mu mêyi makese. Mayuki adi atamba kupatula bipeta bimpe ng’aa adi ajula lukonko lusunguluke ludi lueleshisha muntu meji, lulonda pashishe kudi mvese udi wandamuna ku lukonko. Bidi mua kukusankisha bua kuteta imue ya ku ngenyi idi ilonda eyi. Mmilongolola bua kutuambuluisha bua “kuamba butudi nabu” lukasa patudi tujula dijinga dia muntu dia kumanya bivule.
4 Mu teritware mutu bantu bapita kuamba ne: kabiena bibasankisha to, jula lukonko ludi lutangila malu adi abatatshisha:
▪ “Bu mutukadi pa kubuela mu bidimu bia 2000, udi utekemena ne: nekuikale malu mimpe anyi udi wela meji ne: kakuakuikala bua nsongo? [Lekela muntu andamune.] Bible wakadianjila kumanyisha malu adi alubakajangana atudi tumona lelu ne tshidiwu atuala ku ndekelu.” Bala 2 Timote 3:1, 2, 5 ne Nsumuinu 2:21, 22.
▪ “Kudi lutatu lua bungi mu ditunga edi bua kudiondapisha. Utuku mumanye se: Nzambi mmulaye ne: neajikije bua kashidi masama onso anyi?” Bala Buakabuluibua 21:3, 4.
▪ “Udiku wela meji muvua kuikala nsombelu wa bantu bu muntu yonso muetu munu mua kutumikila mêyi a mu Bible anyi?” Bala Matayo 22:37-39.
5 Bu mudi mudimu udibu batupa muikale wa kuyisha lumu luimpe lua Bukalenge, padiku mushindu tudi ne bua kukoka ntema ya muntu ku malu ikala Bukalenge mua kukumbaja. Udi mua kuamba ne:
▪ “Utuku mumanye ne: mukanda wa kale kale wa buloba bujima, Bible, wakamanyisha ne: nekuikale mbulamatadi umue bua buloba bujima anyi?” Bala Danyele 2:44.
▪ “Udi wela meji ne: nsombelu ivua kuikala mushindu kayi bu Yezu Kristo muikale ukokesha pa buloba?” Bala Musambu 72:7, 8.
6 Mu teritware mudi bantu banange malu a Nzambi, udi mua kuteta umue wa ku mbuelelu eyi:
▪ “Bantu ba bungi badi bakenga bua kansungasunga ka mudibu bakaji peshi balume, ka bitendelelu anyi ka dikoba. Udi wela meji ne: Nzambi udi mua kumvua munyi bua ngenzelu mibi eyi?” Bala Bienzedi 10:34, 35.
▪ “Tudi bamanye ne: Yezu Kristo wakenza bishima bia bungi mu tshikondo tshiende. Bu wewe mua kumulomba bua kuenzaye tshikuabu, neumulombe tshishima kayi?” Bala Musambu 72:12-14, 16.
7 Bikala muntu umueneka kayi musue kukangula tshiibi, udi mua kutuadija diyuki pa kuamba ne:
▪ “Lelu’eu bikadi bitonda bantu ba bungi bua kuteleja ntatu idiku. Mbasue kuteleja tshidi mua kujikija ntatu eyi. Kakuyi mpata udi pebe ne meji aa. Kadi nkuepi kutudi mua kupetela mushindu mulelela wa kujikija ntatu yetu?” Lekela muntu andamune. Bala 2 Timote 3:16, 17.
8 Bua tshinyi kubenga kuteta nunku? Misangu mivule, lukonko lupepele luludika anu pa bualu ndukumbane bua kujula dijinga dia kumanya malu dia muntu uudi uyikila nende. Muntu mukaji mukuabu uvua kumpala kayi munange bua bamuyishe wakabueja bana betu babidi ba bakaji mu nzubu muende pavua umue wa kudibu mumuele lukonko elu: “Udiku mua kufunkuna Bukalenge buutu ulomba mu Disambila dia Tatu wetu anyi?” Lukonko elu luakasankisha muntu mukaji au ne wakitaba bua kulonga Bible. Ukadi mpindieu musadidi wa Yehowa mudilambule!
9 Paudi uyikila ne muntu, malu audi wamba ikale malelela. Akula ne muoyo umue. Bantu batu nangananga basankidila bulelela padibu bajadika ne: tudi bushuwa tubatabalela.—Bien. 2:46, 47.
10 Mudimu wa kuyisha lumu luimpe udi lutatu lelu’eu. Bamue bantu batu belela badibu kabayi bamanye meji mabi. Bakuabu badi ne nsombelu mufimpakane ne bikale kabayi ne dîba dia bungi dia kujimija to. Kadi, tudi mua kujadika ne: kutshidi anu bantu ba bungi badi bakanyine batudi ne bua kukeba. (Mat. 10:11) Madikolela etu bua kubakeba neatambe kupatula bipeta bimpe bikala mayuki etu mîpi ne “tuamba lukasa butudi nabu!”