Tuangatayi dîna dilengele dia Yehowa ne mushinga mukole menemene
1 Satana wakapetula dîna dia Nzambi pakafikishaye baledi betu ba kumpala ku dienza mpekatu. Diabolo wakajula lungenyi lua ne: Yehowa uvua mushime Adama. (Gen. 3:1-5) Bu mudi dîna dia Nzambi disuikakaja ku bukokeshi buende bua kukumbaja dîyi diende, bualu ebu kabuyi bujadika buakajula Satana buvua dishiminyinangana malu dibiadibi. Mu dikumbaja ku kakese ku kakese dilongolola diende, Yehowa mmumbushe lumu lubi luonso luendeshila dîna diende ne mmudivuije dilengele.—Yesh. 63:12-14.
2 Tudi bantu badi Yehowa ‘mubikile ku dîna diende.’ (Bien. 15:14, 17) Bualu ebu budi butupetesha mushindu wa kuleja mutudi tumvua pa bidi bitangila disantuisha dîna edi. Tudi tumona ne: dîna dia Yehowa didi bushuwa dilengele, bualu didi dileja tshintu tshionso tshimpe, tshilenga, tshia dinanga, luse ne buakane. Bunene bua dîna dia butumbi dia Nzambi budi butuenza ne buôwa. (Mus. 8:1; 99:3; 148:13) Ebi bidi ne bua kutusaka ku dienza tshinyi?
3 Santuisha dîna dia Nzambi: Dîna dia Nzambi kadiena kabidi mua kupita bunsantu bukadidi nabu nansha. Kadi tudi mua kuleja ku bikadilu bietu kabiyi kadiwu ne ku dimanyisha dia Bukalenge ne: tudi tuangata dîna dia Nzambi ne mushinga mukole menemene. Tuelayi lubila ne: ‘Sakidilayi Yehowa, tumbishayi dîna diende! Ambilayi bantu bienzedi biende munkatshi mua bisamba bionso, nubamanyishe ne: Dîna diende didi ditumbishibua.’ (Yesh. 12:4) Mmunyi mutudi mua kuenza nunku?
4 Katupitshishi mpunga yonso udi umueneka bua kumanyisha dîna dia Yehowa ne bionso bididi diumvuija. Nansha bikale mu mushindu mulongolola peshi mu mpukapuka, ku nzubu ne ku nzubu anyi ku magazen ne magazen, mu misesu peshi ku telefone, mudimu wetu wa diyisha udi utumbisha Yehowa. Patudi tupetangana ne bantu badi basankidila bulelela ne batuteleja, tudi ne bua kumvuangana bimpe bua kubapinganyina ne kubalongesha malu a bungi adi atangila Yehowa. Mmumue ne: tudi ne bua kutungunuka ne makumbula aa katuyi tutekesha, ne tusuminyina mu madikolela etu bua kutuadija malonga a Bible. Diakalenga, tshidimu tshionso bantu nkama ya binunu badi bafika ku dimanya, ku dinemeka ne disantuisha dîna dilengele dia Yehowa.
5 Didifila dietu ne muoyo mujima mu mudimu wa disantuisha dîna dia Nzambi didi dileja patoke luseke lutudi bimanyine pa tshilumbu tshiakajula Satana mu Edene. Eu mmudimu mutambe bunême ne wa butumbi wa kuenza. Tuangatayi ne mushinga mukole menemene dîna dilengele dia Yehowa ne tudisamune ne lukunukunu luonso!—1 Kul. 29:13.