Dimanya-mukanda ne bipatshila biebe bia mu nyuma
1 Kupeta dimanya dia mukanda dimpe dia nshindamenu pautshidi nsonga kudi mua kukupetesha mamanya adi akengedibua bua wewe kubala ne kufunda bimpe ne kuikala ne ngumvuilu mualabale wa malu a buloba, malu a kale, makumi ne mamanya makuabu. Mu dilonga, udi mua kumanya mua kuela meji bimpe, kukonkonona malu, kujandula nshinga ne kupatula ngenyi idi ilela bipeta bimpe. Dilonga kalasa mushindu eu nedikukuatshishe bimpe mu nsombelu webe. Mmunyi mudi dimanya-mukanda diebe mua kuikala ne buenzeji pa bipatshila biebe bia mu nyuma ne kukuambuluishadi bua kupeta ‘meji adi akuatshisha ne bukole bua kupangadija malu’?—Nsu. 3:21, 22.
2 Ikala ne dikuatshisha mu mudimu wa Nzambi: Paudi ulonga kalasa, ikala ne ntema mu kalasa ne enza bimpe midimu ya kumbelu idibu bafila. Wewe mulonge mua kubala bimpe ne mudibidije bua kulonga, udi mua kukonkonona Dîyi dia Nzambi kakuyi lutatu ne kushala mushindame mu nyuma. (Bien. 17:11) Dimanya dialabale nedikuambuluishe bua kupetangana ne bantu ba nsombelu mishilashilangane, badi ne meji ne mitabuja mashilangane baudi upeta mu buambi. Dimanya diudi upeta mu kalasa nedikale ne dikuatshisha mu dikumbaja majitu ebe a buena-Kristo mu bulongolodi bua Nzambi.—Tangila 2 Timote 2:21; 4:11.
3 Longa mua kudikumbajila majinga ebe: Wewe mudifile bikole, udi kabidi mua kupeta mamanya adi akengedibua bua kudiambuluisha paudi ujikija tulasa. (Tangila 1 Timote 5:8.) Sungula ne ntema malu audi musue kulonga mu tulasa. Pamutu pa kuditua mu dilonga malu adi afila mpunga mukese wa kupeta mudimu, longa mudimu wa bianza anyi malu adi mua kukuambuluisha bua kupeta mudimu muakanyine. (Nsu. 22:29) Dilonga tulasa tua nunku nedikupeteshe mushindu wa kudikumbajila majinga ebe nkayebe bu wewe mua kupangadija bua kusadila muaba udi dijinga dikole.—Tangila Bienzedi 18:1-4.
4 Kupeta dimanya-mukanda dimpe dia nshindamenu paudi mu kalasa kudi mua kukuambuluisha bua kualabaja mudimu webe. Dienzeja bikole bua kupeta mamanya adi akengedibua bua kudikumbajila majinga ebe eku wenza mudimu wa Yehowa bimpe. Nunku dilonga diebe dia tulasa nedikuambuluishe bua kufika ku bipatshila biebe bia malu a mu nyuma.