Tshiibi tshia kuenza bumpanda-njila ntshiunzuluke mpindieu buebe wewe anyi?
1 Mvese wetu wa tshidimu tshia 1999 udi utuvuluija ne: tutshidi mu ‘dituku dia lupandu’ dia Yehowa. (2 Kol. 6:2) Kadi dituku diende dia lupandu neditue mpindieu ku nshikidilu. Pashishe “dituku dia dilumbuluisha” diende nedituadije. (2 Pet. 2:9, NW) Patshidi Yehowa utungunuka ne kupesha bukua-bantu mushindu wa kupanda, ndisanka kayipu dia kumona mudi bantu binunu bidi bivula anu kuvula banyisha mushindu eu wa kupanda!
2 Bantu ba Yehowa mbadienzeje bua kuakama lutatu lua kupeta bantu badi banyisha bulelela kumpala kua tshikondo kupitatshi. Bua bamanyishi ba bungi ba Bukalenge, kuenza nunku nkubafikishe ku dibuela mu mudimu wa bumpanda-njila. Tshiibi tshia kuenza bumpanda-njila ntshiunzuluke mpindieu buebe wewe anyi? Bua tshinyi tudi tuela lukonko elu?
3 Dianyisha dileja: Anu bu muvuabi bimanyisha mu Mudimu wetu wa Bukalenge wa Tshiongo 1999, mbapuekeshe bungi bua mêba malomba bampanda-njila bambuluishi ne ba pa tshibidilu. Bua kukumbaja tshipatshila tshipiatshipia etshi, bampanda-njila ba pa tshibidilu badi ne bua kuenza mêba 70 mu buambi ngondo yonso bua kukumbaja bungi busanga bua mêba 840 ku tshidimu tshia mudimu. Bampanda-njila bambuluishi nebenze mêba 50 mu buambi ngondo yonso. Mona amue a ku mêyi a dianyisha mavule adibu bafunde bua dishintuluka edi:
“Ndipa kayipu edi dibenesha dia kudi Tatu wetu wa mu diulu!”
“Miaku mmipangike bua kumvuija disanka, dinanga ne dianyisha bua dilongolola edi!”
“Nebivuije ndongamu yetu mitambe kupepela bua kuyilonda!”
“Disambila dietu didi ne: bantu ba bungi kabidi nebenze mpindieu mudimu wa ku dîba ne ku dîba ne nebapete mabenesha adi afumina ku disadila Yehowa mu mushindu mualabale.”
4 Bu mutudi tusemena ku nkomenu wa dituku dia lupandu dia Nzambi, mbimueneke patoke ne: Yehowa udi ujinga bua bantu bende bele lubila lukole lua ndekelu lua dimusamuna nalu. Bunene ne bukole bua mukenji eu mbidiundisha (1) kudi divula dilunguluke dia bungi bua bamanyishi ba Bukalenge ne (2) kudi dikeba dia muntu yonso bua kuvudija mudimu wende udiye mua kuenza mu diyisha dia Bukalenge. Yehowa, ke “udi ubidiundisha,” ne udi uyisha malu kumpala mu mishindu yonso ibidi eyi pa kubenesha lungenyi lua budisuile lua bonso badi bitabe lupandu.—1 Kol. 3:6, 7; Mus. 110:3.
5 Kanupangi tshipatshila tshiabu: Bivua bua dituku dia lupandu dia Yehowa pakadimuija Paulo bena Kristo nende, wamba ne: “Tuenza mudimu pamue nende [Yehowa], tudi kabidi tunusengelela bua kanuitabi bulenga bua Nzambi bukena butuakanyine ne kupanga tshipatshila tshiabu.” ‘Katuakupanga tshipatshila tshiabu’ bituabumona bu “tshikondo tshianyisha mu mushindu wa pa buawu” tshia kuenza mudimu dîba dionso bua lupandu lua bakuabu. (2 Kol. 6:1, 2, NW) Lelu’eu, mêyi a Paulo aa adi atulomba mitalu ya bungi. Bena Kristo badi baleja Yehowa dinanga dia muoyo mujima badi bamona ne: ndiakalenga dia kudifila muabu muonso mu mudimu udiye mubapeshe. Udi mukumbane mpindieu bua kudifila muebe muonso mu buambi bu mpanda-njila wa pa tshibidilu anyi?
6 Ntshipatshila tshikumbanyine: Mu République démocratique du Congo, tudi ne tshipatshila tshia kupeta bampanda-njila ba pa tshibidilu 10 000 mu dia 1 Kabitende, ne 400 mu Congo-Brazzaville, nansha mudiku mvita. Tudi tuela meji ne: ntshipatshila tshikumbanyine ne tshidi mua kukumbajibua. Bua tshinyi tudi batuishibue nunku? Tshidimu tshia mudimu tshishale, kuvua muayene wa bampanda-njila ba pa tshibidilu 8 722 ne bampanda-njila bambuluishi 4 089 bua Congo-Kinshasa, ne bua Congo-Brazzaville muayene uvua wa bampanda-njila ba pa tshibidilu 322 ne bampanda-njila bambuluishi 164. Bampanda-njila bambuluishi bavua benze muayene wa mêba 63,8—kushadile anu mêba 6,2 bua kuenza mêba malomba bampanda-njila ba pa tshibidilu! Ku bavua benze bumpanda-njila buambuluishi tshidimu tshia mudimu tshishale, bikala anu bantu 1 300 mu Congo-Kinshasa ne 80 mu Congo-Brazzaville mua kuditua mu bumpanda-njila bua pa tshibidilu kumpala kua ndekelu wa tshidimu tshia mudimu etshi, netuikale mua kubanga Kabitende ne bampanda-njila ba ku dîba ne ku dîba bapite pa 10 000 mu Congo-Kinshasa ne 400 mu Congo-Brazzaville!
7 Bidi bikengela kuikala ne ndongamu: Mêba 70 ku ngondo atshiena amu akumuenekela makupite makanda anyi? Pamu’apa wewe mua kuela meji bua mêba 17 ku lumingu bidi mua kukuambuluisha. Ku diambuluisha dia ndongamu ya tshilejilu idi mu dibeji didi dilonda, teta mua kuenza webe ndongamu wa mpanda-njila wa pa tshibidilu udi mua kukuakanyina. Mu dimuakaja, yukila ne bampanda-njila bapiluke bua bakupeshe ngenyi pa mushindu udibu bakaja mudimu wa bumpanda-njila ne majitu a mu dîku kabidi ne malu abu makuabu. Ebeja mutangidi wenu wa tshijengu mushindu utu bampanda-njila ba mu tshijengu balongolola mudimu wabu lumingu luonso. Pashishe usambile Yehowa bua abeneshe dipangadika diebe dia kulua mpanda-njila.—Nsu. 16:3.
8 Nuuvuije mudimu wa bena mu dîku: Nukadiku bele meji bua kuvuija bumpanda-njila mudimu wa bena mu dîku anyi? Nudi mua kusomba dîku dijima ne kukonkonona—mu dilongolola malu ne lubatshi ne dikuatshishangana bimpe—mushindu udi muena mu dîku umue anyi babidi mua kuenza bumpanda-njila. Bushuwa bamue badi mua kumona ne: dikonkonona dijalame dia malu a mu nsombelu wabu kadiena dibapetesha mushindu wa kuenza bumpanda-njila bua pa tshibidilu mpindieu. Bikalabi nanku, nudifundile tshipatshila tshia kuenza mudimu eu mu matuku adi kumpala. Kadi nutuadije kudilongolola bua nubange bumpanda-njila mu dituku dijadika. Pamu’apa nudi mua kuenza bumpanda-njila buambuluishi misangu mivule mu tshidimu bua ne: nudibidije ku kakese ku kakese bua mudimu wa bumpanda-njila bua pa tshibidilu.
9 Bampanda-njila ba pa tshibidilu bapite pa 8 700 mu Congo-Kinshasa ne 320 mu Congo-Brazzaville badi mu nsombelu mishilashilangane. Ki mbonso badi ne makanda mimpe a mubidi to, ne ba bungi badi bakenga bua nsombelu mukole menemene mu malu a lupetu ne mvita idiku. Nansha nanku, badi amu batantamana ne batekemena kudi Yehowa. Bena dibaka babidi bampanda-njila badi basadila mu tshimenga tshia Brazzaville mudi mvita itua ipela bakafunda ne: “Tudiku tunyingalala bua mutudi badibudishe bimue bintu bua kusadila Yehowa anyi? Nansha kakese! Pamutu pa kutangila panyima ne muoyo usama ne kuvuluka bintu bituvua bajimije, tudi tumona se: bintu bionso bitudi badibudishe bidi tshianana bu tuetu mua kubifuanyikija ne dibenesha ditudi nadi lelu ne ditudi bindile mu matuku atshilualua. (Luka 9:62; Filip. 3:8) Meme ne mukajanyi, butudi nabu mbua kushala mu mudimu wa ku dîba ne ku dîba.”
10 Bidi bikengela ne: wikale ne nsombelu mupepele anyi?: Kuvuija nsombelu webe mupepele kudi mua kuikala nsapi udi ukukanguila tshiibi tshia kuenza bumpanda-njila. Nsombelu webe udi bu nzubu munene udi ne mishiku mivule ya patupu ne bintu kabiyi bia mudimu wa nsongo, bidi biangata amu dîba dia bungi, bitudisha mfranga ne bikuatshishangana mudimu tshianana anyi? Bikalabi nanku, kuakaja malu bua nsombelu ikale mupepele kudi mua kuambuluisha muntu bua kuenza bumpanda-njila. Udiku mua kukepesha bungi bua mêba autu upitshisha ku mudimu wa ku mubidi anyi? Udiku mua kudisumbila tshikondo ku malu adi kaayi ne mushinga anyi kutamba kukepesha bungi bua dîba diangata bua didiolola anyi?
11 Bible udi utubela mu 1 Timote 6:8 ne: “Tuetu ne biakudia ne bia kuvuala, tusanke.” Kusanka ne bintu bikese mbualu bua mushinga mu dienza muetu muonso mu mudimu wa Yehowa ne kuvuija diteka bipatshila bia Bukalenge pa muaba wa kumpala muanda mupepele. (Mat. 6:22, 33) Mu dibeji dia 104 mu Annuaire 1998, mu luapolo lua Japon, ngenyi ya bungi idimu idi ileja bua tshinyi mu ditunga adi badi benzamu bikole mudimu wa bumpanda-njila. Mona lumue: “Pa tshibidilu nzubu ya bena mu Japon kayena minene to, ebi bidi bilomba anu dîba dikese bua kuyilongolola, ne badi ne nsombelu mupepele pa tshibidilu.” Eu ki nngumvuilu wa nshindamenu wa 1 Timote 6:8 anyi?
12 Pa buloba bujima, basadidi ba Nzambi badi bayisha lumu luimpe ne tshisumi tshidi tshienda amu tshivula bangabanga ne dituku dia lupandu dia Yehowa kufikadi ku nshikidilu. Bualu buakanyine kalumbandi, tshidimu tshishale muayene mutue ku bamanyishi 700 000 bavua benze mudimu wa bumpanda-njila ngondo yonso. Udiku mua kuakaja nsombelu webe bua ne: uditue mu mulongo wabu anyi? Tudi tukulomba bua ne: ukonkonone nsombelu webe ne lubatshi ne muoyo mujima paudi wandamuna ku lukonko elu: Tshiibi tshia kuenza bumpanda-njila ntshiunzuluke mpindieu buebe wewe anyi?
[Lungenyi lunene lua mu dibeji 3]
TSHIPATSHILA: BAMPANDA-NJILA BA PA TSHIBIDILU 10 000!
[Kazubu mu dibeji 4]
Ndongamu ya tshilejilu bua mpanda-njila wa pa tshibidilu
Bidi bikengela mêba 17 ku lumingu
Dituku dimue mu lumingu ne abidi a ku ndekelu kua lumingu
Dituku Mêba
Ditanu 8
Disambombo 6
Dia lumingu 3
Mêba masangisha: 17
Matuku abidi a mu lumingu ne disambombo
Dituku Mêba
Dibidi 7
Dinayi 7
Disambombo 3
Mêba masangisha: 17
Matuku asatu a mu lumingu ne dia lumingu
Dituku Mêba
Dimue 5
Disatu 5
Ditanu 5
Dia lumingu 2
Mêba masangisha: 17
Dilolo dia matuku abidi ne matuku abidi a ku ndekelu kua lumingu
Dituku Mêba
Dimue 3
Disatu 3
Disambombo 8
Dia lumingu 3
Mêba masangisha: 17
Enza ndongamu webe nkayebe wa mpanda-njila wa patshibidilu
Dituku Mêba
Dimue
Dibidi
Disatu
Dinayi
Ditanu
Disambombo
Dia lumingu
Mêba masangisha: 17