Lomba diambuluisha
1 “Bikole mua kupita nabi.” Mêyi aa mafundisha ku diambuluisha dia nyuma wa Nzambi adi aleja menemene bikondo bietu ebi bia njiwu. (2 Tim. 3:1, NW) Nunku, ntshinyi tshiudi mua kuenza padi ntatu mikole ya mu nyuma ikukuata?
2 Udiku umvua muoyo wa kukuatshila muena mu tshisumbu nebe ukadi mushindame mu nyuma malu anyi? Bua bundu, muntu udi mua kuelakana bua kuenza nanku anyi kubenga bua kueyekela muntu mukuabu bujitu bualu kêna witaba nansha kakese ne: kudi mua kuikala muntu udi mua kumuambuluisha. Eyowa, tuenzayi muetu muonso bua kumanya mua kuambula majitu etu, katuyi tupua muoyo bua kulomba diambuluisha bua tushale bashindame mu nyuma.—Gal. 6:2, 5.
3 Kutudi mua kubangila: Udi mua kulomba mulombodi wenu wa dilonga dia mukanda bua kupatuka nende mu buambi. Dîba adi neupete mushindu wa kumuleja muudi ujinga bua kudiunda mu nyuma. Bikalaye musadidi wa mudimu, muambila bua muudi ujinga bua bakuambuluishe mu nyuma ne pashishe yeye neamanyishe bakulu bua kukuambuluishabu. Anyi wewe nkayebe udi mua kukuatshila mukulu malu adi makutonde au.
4 Ndiambuluisha dia mushindu kayi diudi nadi dijinga? Kudi bualu budi bukepeshe lukunukunu luebe anyi? Udi muledi udi udikoleshila bana ne uditatshisha bua kushalabu balamate bulelela anyi? Udi muntu mukulakaje udi ukeba bua bamuambuluishe anyi? Peshi kudiku mua kuikala bualu budi bukutekesha mu maboko? Pamu’apa mbitukolele bua kupita ne malu a mu bikondo bietu ebi bia njiwu. Kadi katuakupangila to. Diambuluisha didiku.
5 Tshidi bakulu benza bua kukuambuluisha: Bakulu badi baditatshisha ne muoyo umue buebe. Nebateleje malu adi akutatshisha awabakuatshila. Bikala bamanyishi bakuabu bikale ne ntatu imue-imue eyi, mbimpe bakulu batangile bualu ebu padibu benza mudimu wa bulami ne padibu balongesha mu tshisumbu. Bu mudibu “tshilejilu tshia mikoko,” mbanange bua kuenza mudimu pamue nebe ne disanka. (1 Pet. 5:3, Mukanda wa Mvidi Mukulu) Kuteleja bana betu aba padibu belangana meji pa mêyi a mu Bible kudi mua kulengeja mudimu webe ne kabidi kukuambuluisha mu nsombelu webe.—2 Tim. 3:16, 17.
6 Yezu mmutupeshe “mapa mikale bantu” a bungi. (Ef. 4:8, NW, note) Mbuena kuamba ne: bakulu badi bakukuatshila mudimu. Badiku bua kukuambuluisha ne kabidi ‘mbantu benu.’ (1 Kol. 3:21-23) Nunku, pamutu pa kudikanda, bakuatshila malu audi nawu. Ee, balomba diambuluisha.