Mudi tshisumbu tshilongolola

Yehowa nNzambi wa bulongame. (1 Kolinto 14:33) Nunku mbiakanyine bua bantu bende bikale balongolola bimpe. Mmunyi mudi tshisumbu tshia bena Kristo tshilongolola? Tshitudi mua kuenza bua malu ende anu bimpe ntshinyi?

1. Mfumu wa tshisumbu nnganyi?

‘Kristo udi ku mutu kua tshisumbu.’ (Efeso 5:23) Yezu udi mu diulu ulombola midimu ya bantu ba Yehowa pa buloba bujima. Mmuteke “mupika wa lulamatu udi mudimuke,” kasumbu kakese ka bakulu bashindame kadibu babikila kabidi ne: Kasumbu kaludiki. (Balayi Matayi 24:45-47.) Anu bu bapostolo ne bakulu ba mu bidimu lukama bia kumpala bavua mu Yelushalema, Kasumbu kaludiki kadi kalombola bisumbu bia buloba bujima. (Bienzedi 15:2) Kadi bana betu aba ki mbamfumu ba bulongolodi buetu to. Batu bakeba buludiki kudi Yehowa ne mu Dîyi diende, ne bakokela bukokeshi bua Yezu.

2. Bakulu batu ne mudimu kayi?

Bakulu mbalume bena Kristo bashindame badi balongesha bantu ba Yehowa mifundu, babambuluisha, ne babakankamija. Kabatu babafuta bua mudimu wabu eu to. Kadi batu bawenza “ku budisuile kumpala kua Nzambi; kabiyi bua dinanga dia bintu bipeta mu njila mibi, kadi ne muoyo wa disanka.” (1 Petelo 5:1, 2) Batu babambuluisha kudi basadidi ba mudimu. Bobu balue kukumbaja pabu malu malomba, badi babateka bakulu.

Kasumbu kaludiki katu kateka bamue bakulu batangidi ba bijengu. Batu bakumbula bisumbu bishilashilangane bua kukolesha benamu ne kubakankamija. Batu bateka bakulu ne basadidi ba mudimu padibu bakumbaja malu malomba a mu Bible.​—1 Timote 3:1-10, 12; Tito 1:5-9.

3. Ntemu yonso utu ne mudimu kayi?

Bonso badi mu tshisumbu badi ‘batumbisha dîna dia Yehowa’ padibu bandamuna mu bisangilu, benzamu midimu, bimba misambu, ne bayisha bilondeshile nsombelu wabu.​—Balayi Misambu 148:12, 13.

BUELA MU BUONDOKE

4. Yezu mmulombodi muimpe

Yezu udi utulomba bua kuenza bualu kampanda buimpe. Balayi Matayi 11:28-30, pashishe nuandamune lukonko elu:

• Yezu mmusue bua tumone bulombodi buende mushindu kayi?

FILME: Bakulu bambuluisha bantu panyima pa tshikumina mu Népal (4:56)

Bible udi umvuija bimpe mudi bakulu ne bua kuenza mudimu wabu.

Balayi Yeshaya 32:2 ne 1 Petelo 5:1-3, pashishe nuandamune nkonko eyi:

• Mmunyi muudi umvua bua muudi mumanye ne: bakulu badi badienzeja anu bu Yezu bua kukolesha bakuabu?

• Bakulu badi bidikija Yezu mu malu kayi makuabu?

5. Bakulu badi balongesha mu bienzedi

FILME: Bakulu mbantunga-mulongo! (7:39)

Yezu mmuelele badi balombola tshisumbu mikenji. Balayi Matayi 23:8-12, pashishe nuandamune lukonko elu:

• Paudi ufuanyikija tshidi Bible wamba bua bakulu ne malu audi umona bamfumu ba bitendelelu benza, ntshinyi tshidi tshikukemesha?

1. Bakulu batu badilama bobu ne mêku abu bua bikale bakole mu nyuma

2. Bakulu batu batabalela muntu yonso wa mu tshisumbu

3. Bakulu batu bayisha pa tshibidilu

4. Bakulu mbalongeshi. Batu kabidi bateka mankenda ne benza midimu mikuabu

6. Mbimpe tuikale tutumikila bakulu

Bible udi utuleja bualu bunene budi butusaka bua kutumikila bakulu. Balayi Ebelu 13:17, pashishe nuandamune nkonko eyi:

• Mbia meji mudi Bible utukankamija bua tutumikile badi batulombola ne tubakokele anyi? Bua tshinyi?

Balayi Luka 16:10, pashishe nuandamune lukonko elu:

• Bua tshinyi mbimpe tutumikile bakulu nansha mu tumalu tudi tumueneka katuyi ne mushinga?

TSHIA KUKUATA

Yezu ke mfumu wa tshisumbu. Tudi tutumikila bakulu badiye muteke ne disanka bualu badi batukolesha ne batulongesha mu bienzedi.

Diambulula

• Mfumu wa tshisumbu nnganyi?

• Mmunyi mudi bakulu bambuluisha tshisumbu?

• Ntemu wa Yehowa yonso utu ne mudimu kayi?

BIA KUTANGILA KABIDI

Mona tshidi tshitujadikila ne: Kasumbu kaludiki ne bakulu badi baditatshisha bikole bua bena Kristo lelu.

Bakakolesha bana betu tshikondo tshia dikandikibua (4:22)

Mona mudimu udi batangidi ba bijengu benza.

Mudi nsombelu wa mutangidi wa tshijengu ku musoko (4:51)

Bala malu adi aleja mudimu udi nawu bakaji mu tshisumbu.

“Bantu bakaji ba mu Bantemu ba Yehowa batu pabu bayisha anyi?” (Tshibumba tshia Nsentedi 1/9/2012)

Mona mudi bakulu benza mudimu mukole wa kukankamija bena Kristo nabu.

“Bakulu bena Kristo ‘mbenzejanganyi netu ba mudimu bua disanka dietu’” (Tshibumba tshia Nsentedi 15/1/2013)