Udiku munange Kristo bu mudiye pende mukunange anyi?

¹ Pavua mupostolo Yone welangana meji pa nsombelu uvua nende Mfumuende, wakafunda ne: “[Yezu] uvua munange bende ba pa buloba, kubanangaye too ne ku ndekelu.” (Yone 13:1, Mukanda wa Mvidi Mukulu) Mu tshikondo etshi tshia Tshivulukilu, meji etu onso mmatume ku mushindu mutambe bunene udi Kristo mutunange. Tudi mua kumuleja petu dinanga pa kuleja mu nsombelu wetu ne: tudi tuitabuja mulambu wakafilaye bua kutupikula, pa kuyisha ne lukunukunu ne pa kunanukila “too ne ku ndekelu” anu bu muakenza Yezu.​—Mat. 24:13, MMM; 28:19, 20; Yone 3:16.

² Bu mudi Kristo mutunange, tumunangayi petu: Yezu uvua ne malu a bungi a kuenza mu lumingu lua ndekelu, kumpala kua kufuaye. (Mat. 21:23; 23:1; 24:3) Bu mutudi tuidikija Kristo, dinanga didi ditusaka bua kuenza ‘muetu muonso’ mu mudimu wa Yehowa. (Luka 13:24) Bu mudibu balongolole anyi basakidile bisangilu bia mudimu wa buambi mu ngondo muinayi, kuenaku mua kuvudija mêba awutu wenza mu buambi anyi?

³ Tshidimu etshi, Didia dia Dilolo dia Mukalenge nedienzeke ku dilolo mu Disatu dia matuku 19, ngondo wa Tshisanga. Mbantu bungi munyi babuela mu tshisangilu etshi tshia mushinga? Tuetu ke badi ne malu mu bianza. Ukadiku mufunde mêna a bantu baudi musue kubikila, bu mudi: balongi bebe ba Bible ne aba badi basankidila bulelela, balela, bangenda, bamanyangana nabu ne balongi peshi bena mudimu nebe anyi? Ukadi mumonangane nabu ne mubambile ne muoyo umue bua balue anyi? Neubavuluije matuku makese kumpala kua dituku dia Tshivulukilu anyi? Bidiku bikengela bua kubambuluisha bua kufikabu muaba wenzekela Tshivulukilu anyi? Bakulu badi kabidi ne bua kubikila bantu bakadi balekela dipatuka mu buambi. Bu mudibi ne: Tshivulukilu netshienzeke ku dilolo dia munkatshi mua lumingu pa mutu pa kuenzekatshi ku ndekelu kualu, eu ki mmuanda wa mua kulabidila bua kulengulula bua kubuelamu to.

⁴ Tudilongolole bangabanga ne kuluamu: Mbia mushinga bua kudilongolola ne kuikala ne muenenu muimpe patudi tulua mu Tshivulukilu. Paulo wakabela bena kuitabuja nende bua kulejabu kanemu bua tshikondo etshi tshia mushinga. (1 Kol. 11:20-26) Udi mua kubalaku Evanjeliyo wa Yone nshapita wa 13 too ne ku wa 17 mu dilonga dienu dia Bible mu dîku ne kulomba muena mu dîku yonso bua umvuije mushinga udi nawu mulambu wa Yezu kudiye. Kanupu muoyo bua kubala mvese ya mu Bible milongolola bua lumingu lua kumpala kua Tshivulukilu.

⁵ Dinanga dietu bua Kristo ndilue dia bungi ne neditambe kuvula mu dia matuku 19 a ngondo muinayi. Tudi bangate dipangadika bua kumunanga kashidi ne tshiendelele! Disekelela Tshivulukilu dia tshidimu etshi nedituambuluishe bua kukolesha dipangadika dietu edi.