Utuku ne lungenyi lua kudipangisha amue masanka anyi?
1 Bua kuleja dianyisha bua malu adi Yezu Kristo muenzele bantu ne muoyo mujima, mbimpe tudipangisheku amue masanka bua kumona mua kuenza mudimu bimpe ne mamanya, bukole ne makanda etu. Mifundu idi itulomba bua ‘Tufile mibidi yetu bu mulambu udi ne muoyo, wa tshijila, udi usankisha Nzambi.’ (Lomo 12:1) Didikonkonona dia pa tshibidilu nedikuambuluishe bua kujingulula né utuku utamba kuleja lungenyi elu bilondeshile mudi nsombelu webe ukushila dîba.
2 Udipangisheku amue masanka bua kupeta dimanya dia mu Bible: Udiku ne dîba diudi mudilongoluele bua kubala ne kulonga Bible pa tshibidilu anyi? Utuku unemeka ndongamu webe eu anyi? Utuku ne tshibidilu tshia kudilongolola bimpe bua bisangilu bia mu tshisumbu anyi? Biwikala tatu wa dîku, utuku ne tshilele tshia kulonga Bible ne bena mu nzubu muebe anyi? Bua kufika ku dikumbaja malu aa, bidi mua kukulomba bua kukepesha dîba diutu upitshisha ku televizion, diutu upitshisha bua kuenza makuabu malu anyi kunaya ne ordinatere. Kadi, tshidiku ntshia se: mêba aa awudi upitshisha bua Dîyi dia Nzambi neakuambuluishe bua kupeta muoyo wa kashidi.—Yone 17:3.
3 Bua kulongesha bana bebe: Tshikondo tshilenga tshia kutuadija kulongesha bana mushindu wa kudipangisha amue masanka mpatshidibu bapuekele. Leja bana ne: anu bu mudiku tshikondo tshia kunaya, kudi ne bua kuikala kabidi tshikondo tshia kuenza mudimu ne tshia kulonga malu a Nzambi. (Ef. 6:4) Bapesha imue midimu ya ku nzubu. Dilongolola bua kuikala upatuka nabu mu buambi pa tshibidilu. Bua dilongesha diudi ubapesha kuikaladi ne mushinga kudibu, ikala wewe muine tshilejilu tshimpe.
4 Bua midimu ya mu tshisumbu: Tshisumbu tshidi tshilengela padi yonso udimu udifila bua kuenza malu mimpe adi mua kuambuluisha bakuabu. (Eb. 13:16) Kudiku mushindu uudi mua kuvudija mêba mu mudimu wa diyisha ne divuija bayidi anyi? Udiku mua kuanyisha bua kukuatshisha babedi peshi bakulakaje, pamu’apa kubambuluisha bua kuluabu mu bisangilu anyi?
5 Bangabanga ne kulambulaye muoyo wende wa bu-muntu, Yezu wakabela bayidi bende bua kutekabu malu a Bukalenge pa muaba wa kumpala ne kushiya bikuabu bionso biashadi ebi kunyima. (Mat. 6:33) Didifila dia mushindu’eu nedikutuadile masanka a bungi bualu udi utungunuka ne dikuatshila Yehowa mudimu ne musangelu.