Ikala ne bikadilu bilenga bidi bitumbisha Nzambi

¹ Muaba wonso utudi, tshikadilu tshietu, mvuadilu wetu ne ndengejilu wa mubidi bidi bileja tshitudi ne bimanyisha Nzambi utudi tutendelela. Bitu bitamba kuenzeka nunku nangananga mu bisangilu binene bia bantu ba Nzambi mudi ba bungi batutangila. Patudi tufila tshilejilu tshimpe, bantu badi batumbisha dîna dia Yehowa. (1 Pet. 2:12) Kadi, bikadilu bibi peshi malu adi kaayi a meji menza nansha kudi bantu bakese, adi mua kupendesha dîna dia Nzambi ne bantu bende kabidi. (Muam. 9:18b) Dimanya dia se: ku malu atudi tuenza, bantu bakuabu badi mua kuangata bulongolodi buetu peshi Nzambi utudi tutendelela bibi anyi bimpe, neditusake bua ‘kuenza malu onso bua kutumbisha Nzambi.’​—1 Kol. 10:31.

² Tuikalayi ne tshikadilu tshimpe miaba itudi: Misangu mivule, bitu bitamba kukemesha bantu padibu bamona bulongame, bikadilu bilenga ne mankenda kudi Bantemu ba Yehowa. Pavuaye wakula bua mêku a Bantemu bavua batudile ku nzubu wende wa tshilala benyi, mutangidi wa nzubu eu wakamba ne: “Bana ba Bantemu ba Yehowa mbana bamanye malu dikema bantu tshiyi muanji kumona! Batu bavuala anu mutubi bikumbanyine bansongakaji ne bansongalume; badi ne bukalanga, kanemu, bikadilu bilenga; kabidi kabatu bakeba bilumbu to. Bua bana benu aba, nudi bakanyine kalumbandi. Tuvua ne disanka dia kusomba nabu muaba eu.” Mêyi a mushindu’eu kaatu kule to, bualu bantu badi batumanye badi bamona dinanga ne kanemu bidi munkatshi muetu.

³ Bidi bitusankisha pa kumona bana betu ne balunda ba bulelela benza madikolela bua kuikala ne mankenda miaba idi mpungilu yetu yenzekela. Malu aa adi afila bujitu ku mukenji utudi tumanyisha ne endeshila Bantemu ba Yehowa lumu luimpe. Kadi, bilondeshile amue malu atudi tumvua, ntatu itu ijuka mu mêku makuabu bualu mfumu wa dîku kavua ne mushindu wa kusumbila mukajende ne bana bilamba bipiabipia to. Bamue bakabenga kulua mu mpungilu anu bua nanku. Muanda eu e kufikisha bamfumu ba mêku ku dibuela mabanza anu bua kusumbila bena diabu bintu ebi. Pabi, kudi bantu ba bungi batu balua mu mpungilu nansha mudibu bapele. Mu imue miaba, bana betu batu basombeshangana nkotshi, nzumiji anyi tulavuanda bua kumueneka bimpe ku tshiakuidi. Kudi mene bakuabu badi benza miyuki ku makasa kutupu bualu kabena ne bisabata to! Kabena bitaba bua tshintu nansha tshimue tshibapangishe bua kuya kupeta mibelu idi ikankamija itutu tupetela mu mpungilu yetu. Mona mmuenenu muimpe udibu nende bua bisangilu bia bena Kristo! Nansha mutudi basue kuikala ne kanemu bua bisangilu bietu pa kuikala ne mankenda misangu yonso, tshitudi katuyi ne bua kupua muoyo ntshia se: ‘didisua difuma ku biuma bietu bia pa buloba,’ ki ntshipatshila tshietu nansha. ​—1 Yone 2:16, MML.

⁴ Pa tshibidilu, bana betu ke batu bafila miaba ya kulala. Tudi ne bua kuleja dianyisha kudi aba badi bitaba bua kutuladika kuabu. Nunku, kabiakuila bimpe pikala aba badibu bakidile benza malu wabu mushindu pa kulomba bua bashale ku nzubu eyi matuku a bungi kumpala anyi kunyima kua mpungilu to. Badi bafila miaba ya kulala anu bua matuku anenga mpungilu. Aba badibu bakidila mushindu’eu badi ne bua kunemeka bintu bia muena nzubu, kubenga kubinyanga, kubenga kuya miaba idibu kabayi babanyishile bua kubuela, ne kuikala kabidi ne dîsu dikole bua bana babu balela benze bia muomumue. Bikala bena mu nzubu bapete lutatu kampanda bua bualu ebu, tudi tubalomba bua bamanyishe diakamue tshibambalu tshia miaba ya kulalala bua tshibambuluishe. Bua tshibambalu tshia miaba ya kulala kuendatshi biakane, mbimpe tueleshanganayi natshi diboko. (Eb. 13:17) Tuvua bapete luapolo ne: bamue bana betu badi babenga ku bukole miaba idibu babapeshe bua kulala ne baya kua tshianana, pamu’apa kua mulunda wabu anyi kua muntu udibu bamanyangane nende. Ngenzelu eu utu ukondakaja mudimu wa bana betu ba mu tshibambalu tshia miaba ya kulala. Tudi tunulomba bonso bua nuambuluishangane ne tshibambalu etshi.

⁵ Nudi ne bua kuenza madikolela bua kueleshangana diboko ne muena nzubu. Bushuwa, katuena basue kunyanga lumu lua bantu ba Yehowa to. Bu mutudi bena Kristo, tudi ne bua kuikala ne bikadilu bimpe dituku dionso. Katuena ne bua kubakula bilamba anyi bintu bikuabu bia muntu udi mutuakidile bua “kumuvulukilaku” nansha, bualu atshi mbuivi.

⁶ Mmuenekelu wetu mu Mpungilu udi ne bua kuikala muimpe: Nansha muaba utudi tuenzela mpungilu muikale mushindu kayi, tudi ne bua kuwangata bu Nzubu wa Bukalenge munene dîba adi. Mvuadilu muakanyine ne ndengejilu wetu wa mubidi ne nsuki kabiena ne bua kushilangana ne patutu tuya mu bisangilu bia tshisumbu tshietu to. Patudi mu mpungilu, tudi ne bua kuepuka mvuadilu mubi udi uleja lungenyi lua bena panu ne udi kayi uleja dishilangana dietu nabu. Bana betu ba bakaji badi ne bua kudimuka bua miodele ne bule bua nkazu anyi jipe yabu bikale biakanyine. (1 Tim. 2:9, 10) Patudi mu mpungilu, mu nzubu wa tshilala benyi peshi ku bana betu, balunda anyi balela betu, mu disumba dia bintu, tudi ne bua kuleja dîba dionso ne: tudi basadidi ba Nzambi, badi kabayi balenduisha bakuabu.​—2 Kol. 6:3.

⁷ Nebatambuishe bantu mu Disambombo mu dinda mu mpungilu. Tshibumba tshia Nsentedi tshia dia 1 Tshisanga 1995, dibeji dia 30, tshidi tshileja mmuenenu utudi ne bua kuikala nende tshikondo tshidibu batambuisha bantu. Tshidi tshiamba ne: ‘Tudi ne bua kuangata batismo ne mushinga udi ukengela. Tshikondo tshia batismo ki ntshikondo tshia kuseka kuela bibingu anyi tunkunduluila to. Kabidi ki ntshikondo tshia dibungama anyi kanyinganyinga to.’ Kabiakuikala biakanyine kudi bana betu badi batambula bua kuvuala bivualu bidi mua kuleja mubidi patoke to. Nenku, bonso badi ne bua kuleja mudibu bangata tshikondo etshi ne mushinga, kuleja disanka anu mudibi bikengela bua bena Kristo.

⁸ Petelo udi utuvuluija ‘mushindu wa bantu utudi ne bua kuikala mu bienzedi bia tshijila ne bia Nzambi.’ (2 Pet. 3:11) Tudi tujinga bua mêyi ne bienzedi bietu mu Mpungilu wetu wa Distrike wa “Benji ba Dîyi dia Nzambi” biambuluishe badi ne mutshima mulenga badi batutangila bua bamanye ne batendelele Nzambi wetu munene udi muakanyine butumbi ne lumu.​—1 Kol. 14:24, 25.