Tuikalayi ne ntema ku mêyi a Nzambi a tshijila
1 Malu onso atu bantu bamba kaatu anu akoka ntema ya pa buayi to. Kadi padi Nzambi wakula, mbimpe kuteya ntema. (Dut. 28:1, 2) Tudi ne dianyisha bua mudi bafundi benzeja ku spiritu bafunda “mêyi a Nzambi” bua diakalenga dietu. (Lomo 3:2) Mpungilu wa distrike utuenza mu matuku adi kumpala eku neatupeteshe mushindu wa kuteleja mêyi a Nzambi aa paabalabu ne kuakonkonona. Kadi mmunyi mûdi mua kuteya ntema ya pa buayi?
2 Ufike kumpala kua dîba: Fuanyikijabi disanka divua nadi bena Isalele dîba divua Yehowa mubatumine dîyi bua kudisangishabu ku Mukuna wa Sinai bua kuteleja mikenji Yende! (Ekes. 19:10, 11, 16-19) Biwikala pebe ne mmuenenu wa muomumue eu paudi upeta malongesha a Yehowa mu mpungilu wa distrike, neudienzeje muebe muonso bua kufika pa dîba dituku dionso. Katuakulonda bimpe ndongamu mujima wa mpungilu bituikala katuyi tufika kumpala kua dîba, ne bibanga kutatshisha bakuabu patudi tuenda tukeba muaba wa kusomba. Nebanyishile bantu bua kutuadijabu kubuela miaba yenzekela mpungilu pa dîba 8:00 mu dinda, ne ndongamu neatuadije pa dîba 9:30 mu dinda dia dituku dionso.
3 Nansha aba badi bafika kumpala kua dîba, kabatu’anu bonso pa miaba yabu dîba didi ndongamu utuadija to. Mbua tshinyi nanku? Bualu batu bindila too ne padi mulombodi umanyisha musambu wa mbangilu bua kushishabu kukosa miyuki ne balunda ne kubanga kupingana pa miaba yabu. Tudi ne bua kumanya ne: mu minite ya kumpala kua musambu wa mbangilu wa tshitupa tshionso, mulombodi neikale ukadi musombe mu nkuasa ku tshiakuidi padi mijiki ya Bukalenge yenda imba. Etshi ntshimanyinu tshidi tshituleja ne: dîba dia kusomba diakumbanyi! Nanku, pikalabu mua kutulomba bua kuimba musambu wa mbangilu, netuikale pabuipi bua kuwimba bonso pamue bua kutumbisha Yehowa.
4 Bena dîku bikale pamue: Pavuabu babadila tshisamba tshia bena Isalele mêyi a Nzambi, mêku, kusangisha ne “bana bakese,” bavua ne bua kuteleja ne kuyila. (Dut. 31:12) Mu mpungilu yetu, kabena ne bua ‘kulekela bana nkayabu’ nansha. (Nsu. 29:15) Baledi, longololayi bua dîku dienu dijima disombe pamue—kusangisha ne bansonga. Bamue baledi batu bindila too ne dîba dia kuimba musambu wa mbangilu bua kushisha kufila bana batekete ku nkumba. Abi kabiena nansha kakese mua kulongesha bana mushinga udi nawu misambu ne masambila mu ntendelelu wetu to. Mbitambe buimpe kufila bana ku nkumba kumpala mene kua ndongamu kutuadijaye pikalaku mushindu!
5 Kulala bimpe kumpala kua dîba ne kubenga kudia biakudia bia bujitu nekutuambuluishe bua kuteleja bilenga mu mpungilu. Shindamija lungenyi pa bidi ngamba-malu wamba. Ulekele kutuma lungenyi ku malu makuabu. Ulondeshe mu Bible webe misangu yonso idibu babala mvese. Ufunde malu makumbanyine adi ne mushinga. Padibu benza muyuki, ambulula mu lungenyi malu adi ngamba-malu muambe ne konkonona mushindu uudi mua kuatumikila. Ku ndekelu kua dituku, nuyikile mu dîku pa malu aa anuvua bateleje. Mmalu kayi avua masankishe yonso wa kunudi? Mmushindu kayi udi dîku dienu mua kukuata nau mudimu bimpe?
6 Tunemeke Dîyi dia Nzambi: Mpungilu idi itupesha mushindu muimpe wa kuyukila ne balunda ne kukolesha malanda ne bakuetu. Patudi tufika kumpala kua dîba, tudi mua kupeta mushindu wa kuyukila pa kuamba ndongamu kutuadijaye. Nansha nanku, bamue batu bayikila munkatshi mua ndongamu, bela meji ne: ki mbibi to, bualu bateleji badi ba bungi. Nansha bisangilu biobi bienzekela muaba udi mualabale, tudi ne bua kushala ne ntema amu bu dîba ditutu mu bisangilu mu Nzubu wa Bukalenge. Nuadimukayi bua telefone yenu ya mu mpaya, biamu bia kamera ne bia foto kabifidi ditanaja kudi bateleji munkatshi mua ndongamu nansha.
7 Pavua Mose wangata Mikenji kudi Yehowa wakashala matuku ndambu “kayi udia, kayi unua.” (Ekes. 34:28, MMM) Bia muomumue lelu, ki mbimpe bua kudia anyi kunua munkatshi mua ndongamu nansha. Anu bikalabi bua disama kampanda, tshianana mbimpe kuindila too ne ku “tshikondo” tshilongolola bua kudia.—Muam. 3:1.
8 Mu imue mpungilu, bana betu bakulumpe anyi bansonga batshidi anu ne tshilele tshia kutambakana patupu padi ndongamu wenda wenzeka. Mbimpe bakididianganyi balombe bawetu aba bua bapingane pa miaba yabu. Bena budisuile badi benza mudimu mu bibambalu bishilangane badi mua kusomba pabu munkatshi mua bateleji padibu bajikija mudimu wabu. Nansha bena budisuile badibu basungule bua mudimu kampanda udi ukengedibua, buobu pabu badi ne bua kusomba pa miaba yabu ne kulonda ndongamu. Kabena ne bua kujingakana patupu mu bibambalu bikuabu, benda bayikila ne binabu eku ndongamu wenda wenzeka.
9 Katuena basue ‘kulua ne mapapa’ patudi tuteleja Dîyi dia Nzambi to. (Eb. 5:11) Nenku tuikalayi bapangadije bua kuleja kanemu kakumbanyine pa kuteleja ne ntema mêyi a tshijila a Yehowa, atuikala ne bua kukonkonona mu mpungilu wa distrike udi kumpala eku.