“Malu enu onso, nuenze ne dinanga”

¹ “Bulongame bunudi nabu ne mushindu unudi nulongolola malu bidi bitukemesha. Bualu ebu budi butusaka ku dinuanyisha ne dinunemeka.” Mêyi aa nga munene kampanda (udi wenza mudimu ne ministre mukuabu) wakabuela mu mpungilu wetu wa distrike. Bidi bikankamija bikole patudi tumvua bantu batuela kalumbandi bua malu atutu tuenza. Bualu ebu budi buleja ne: mu tshibungi, buonso buetu tudi ‘tuenza malu onso ne dinanga.’ (1 Kol. 16:14, MMM) Kadi kutu kumueneka amue malu adi atatshishangana adi nansha mua kunyanga lumu lua bantu ba Yehowa bikalawu kaayi majikija.

² Tuenzayi mudimu ku budisuile bua kuleja dinanga: Bua mpungilu kuenzekaye biakane bidi bikengela kumulongolola. Ke bualu kayi tudi tunulomba bua kudifila ku budisuile bua kukuatshishangana ne komite ya mpungilu idibu bateke muaba unudi. Kalumbandi tudi tukela bonso batu balua diakamue kuambuluisha bua kuteka ne kumbusha bintu bia mpungilu. Malu a kuenza adi bungi tshianana. Misangu mivule, bitu bikengela kukomba anyi kusukula ne mâyi muaba wa mpungilu wonso. Bitu bikengela kukeba bana betu badi mua kulama bintu ebi. Padi mpungilu wenda wenzeka, bakuabu badi ne bua kutangila miaba ya dipengama bua ikale ne mankenda.

³ Ngumu itudi tupeta mu miaba mishilangane idi ileja ne: bana betu ba bungi kabatu basue kudifila ku budisuile bua midimu ya dilongolola miaba ya mpungilu to. Bamue batu balua ku budisuile bua kuenza midimu eyi batu bajinga bua Société abadishe ne abapeshe makuta. Bakuabu badi benza midimu kampanda anyi bafila biamu biabu bia mudimu ne babilombela mfranga. Kabenaku nansha bajingulula se: didisangisha dietu edi ntshikondo tshia pa buatshi tshitudi ne bua kuambuluisha ku budisuile bua ntendelelu mulelela wa Yehowa aye kumpala.​—Mus. 110:3.

⁴ Diibaka ntempelo ne bimanu bia Yelushalema divua tshikondo tshia disanka dia dikema bua basadidi ba Yehowa. Tshisamba tshia Nzambi tshivua tshiangata tshikondo atshi bu tshia kuleja Yehowa dianyisha. Bakaji ne balume bavua bafila mapa bilondeshile tshivua muntu natshi ne bavua badifila ne makanda abu bua kuenza midimu kabukabu.​—Ezela 2:64, 65, 69; 3:1, 3.

⁵ Tshilejilu tshiabu tshidi tshitupa dilongesha mu malu a bungi. Bavua badifila muabu muonso ne benza mudimu ku budisuile. Kabavua pabu mu nsombelu milenga to. Bualu mu tshikondo atshi, bantu bavua benza mudimu wa diibaka kabavua banji kuenza matuku a bungi mu tshimenga to. Bavua bafumine mu tshimuangi ne bivua bibakengela matuku bua kumona mua kubanza ne kulongolola malu. Kabidi, bavua babakengesha kudi baluishi babu bavua kabayi basue bua bapingajilule ntendelelu mulelela mu Yelushalema. Malu avua mua kuikala mabakolele menemene. (Ezela 4:1-5) Kadi kabakateketa mu maboko to. Nansha mutshivuabu batshifikilaku mu tshimenga, kabakalomba mfranga bua kushishabu kuibaka ntempelo to. Bakenza mudimu kabayi “baulengulula” to; ne Yehowa wakababenesha.​—Ezela 4:22.

⁶ Dilongolola mpungilu ntshikondo tshia disanka. (Dut. 16:15) Tshisumbu tshionso ne dîku dionso bidi ne bua kuangata bualu ebu bu budi pa makaya abu. Ku tshilejilu tshiabu ne mushindu udibu bakankamija bakuabu, bakulu badi mua kusaka bena mu tshisumbu bua kuenza mudimu eu ku budisuile. Patukavua pabuipi ne mpungilu wa distrike wa “Dîyi dia mulayi dia Nzambi,” bakulu ba mu tshisumbu tshikuabu tshia mu ditunga dietu edi bakasangisha bansonga ba mu tshisumbu tshiabu, kubalejabu bande wa video udi ne tshiena-bualu ne: “Unis grâce à l’enseignement divin” udi uleja mushindu udi bansonga ne bana batshidi bapuekele benza midimu ya dilongolola mpungilu. Kunyima, bansonga ba bungi ba mu tshisumbu tshiabu bakadifila ku budisuile bua kukomba ne kusukula tshipalu tshia ndundu muvuabu ne bua kuenzela mpungilu. Nsombelu wetu nansha yeye muikale wa mushindu kayi, tudifilayi ne disanka mu dienza mudimu ne mu diambuluisha bua mpungilu yetu ya tshidimu etshi ilengele.

⁷ Tuyukilayi ne bakuabu dîba dia diikisha: Bua kutupepejila malu ne kubenga kujimija dîba, Société mmulombe bateleji bua bikale balua dituku dionso ne biakudia biabu. Bana betu ba bungi bakalonda tshivuabu batulombe etshi e kumonabu se: mu diikisha dia mu midi, kudi mushindu wa kusomba pamue ne bena dîku diabu ne kudia biakudia bivuabu balue nabi. Ba bungi badi banyisha bikole tshikondo tshia diikisha etshi ne mbapete mushindu wa kuyikila ne bena Kristo nabu. Bua bualu ebu, bidi bikengela kudianjila kulongolola biakudia ne mâyi a kunua ne kubiela mu tshitunga tshikese anyi kashete ka dilamina bintu bia mashika kaudi mua kuteka muinshi mua tshibasa tshiudi musombele kakuyi lutatu. Tudi tulomba bateleji bonso bua benze bia muomumue. Matuku mashale aa, tuakamona bana betu bumbuka muaba uvua mpungilu wenzekela bua kuya kusumba biakudia pambelu. Muanda eu utu ukoka basumbishi ba bintu ba bungi ubafikisha too ne ku muaba wa mpungilu. Bamue badi balomba bua babanyishile base tutanda tuabu tua disumbishila bintu bua kuambuluisha bateleji. Buobu mua kubanyishila, bantu ba bungi ba pambelu nebatshimukile muaba wa mpungilu. Bantu bavule buobu mua kubanga kunguila mu miaba eyi bua kusumba bintu, mpungilu nealue bu muaba wa kuendela mushinga. Ke bua tshinyi tudi tulomba muntu yonso bua ambule biakudia ne mâyi a kunua mu matuku onso a mpungilu aa. Balunda ba bulelela banudi nabu badi pabu ne bua kuenza bia muomumue. Mbikandikibue bua kulua ne milangi anyi maluvu makole mu mpungilu.

⁸ Tudi bindile ne mioyo kulukulu bua kubuela mu Mpungilu wa Distrike wa “Benji ba Dîyi dia Nzambi.” Ukadi mudilongolole anyi? Udiku mupangadije bua kuambuluisha bu mudisuile anyi? Ngikadilu wetu miaba itualala ne mu tshimenga tshia muaba udi mpungilu wenzekela aleje bulelela budi mu mitshima yetu ne dinanga ditudi nadi bua Mufuki wetu.