Utu wangata bintu bia tshijila ne mushinga anyi?
1 Buobu batuebeje bua kumanya bituikala tuangata bintu bia tshijila ne mushinga, bumue netuandamune diakamue ne: Eyowa! Kadi mbimue bintu bia tshijila kayi (bidi Nzambi mutupeshe) bitudi ne bua kuangata ne mushinga?
2 Tudi ne dianyisha bua mudi Tatu wetu wa mu diulu mutuitabile bua tudie nende bulunda. Udi utushindikila ne: tuetu ‘basemene pabuipi nende, yeye neasemene pabuipi netu.’ (Yak. 4:8) Bu Yezu Kristo kayi mufile mulambu bua kutupikula, muntu nansha umue kavua mua kupeta muoyo wa tshiendelele to. (Yone 3:16) Pa kumbusha dianyisha ditudi tuleja ne muoyo mujima, tudi ne bua kuela Nzambi tuasakidila mu masambila etu a buatshia buatshia bua dipa edi dia mushinga mukole didiye mutupe.
3 Bible ne bulongolodi bua Yehowa budi pa buloba mbintu bia tshijila buetu tuetu. Tudi tuleja dianyisha bua bintu ebi bidi Yehowa mutupeshe patudi tutumikila mêyi a mu Bible, tukolesha dinanga ne bakuetu, tulonda mudi Nzambi mulongolole malu ne tueleshangana diboko ne badi ku mutu kuetu.—1 Pet. 1:22.
4 Tudi tupeta biakudia bia mu nyuma bungibi ku butuangaji bua mupika wa lulamatu ne wa budimu. Ke tshienzeka tshidimu etshi mu Mpungilu wa Distrike wa “Benji ba Dîyi dia Nzambi.” Mu Mpungilu amu nebatulongeshemu malu a mushinga mukole ne netusanke bikole patuapetangana ne bawetu batudi nabu dijinga. Mmunyi mutudi mua kuleja dianyisha ne muoyo mujima bua tshintu tshia tshijila etshi?
5 Katulekedi nzubu wa Yehowa to: Nehemiya wakakankamija bantu bavua benze mudimu mukole wa kuibakulula bimana bia Yelushaleme bua ‘kabalekedi nzubu wa Nzambi wabu’ to. (Neh. 10:39) Lelu’eu, “Nzubu” wa Yehowa mmalu adiye mulongolole bua ntendelelu mulelela. Mpungilu yetu ya distrike mbumue bua ku malu au adi Nzambi mulongolole. Bua kubenga kualengulula, tudi ne bua kuikala munkatshi mua bateleji ne kuteya ntema, nenku netuleje Yehowa ne: tudi tuangata bionso bidiye mutulongoluele ne mushinga wa bungi. (Eb. 10:24, 25) Ntshinganyi tshitudi ne bua kudianjila kuenza kubangila ku lelu bua kuleja ne: tudi tusanka menemene bua tshibilu tshia tshijila etshi?
6 Wikalamu matuku onso asatu: Muntu yonso udi ne bua kudilongolola bua kubuela mu mpungilu au matuku onso asatu. Udi mudilongololaku bua kufika pa dîba dituku dionso ne kushala too ne ku disambila dia nkomenu mu Dia lumingu anyi? Bikalabi nanku, mabenesha mavule mmakuindile. Kabitu misangu yonso anu bipepele bua kubuela mu mpungilu to. Bua mudimu webe, bumue nebikulombe dipangadika dikole bua kuangata diikisha. Lutatu ludi mua kumueneka nansha bua mushindu wa kufika muaba wenzekela mpungilu. Kadi malu aa kaakupangishi bua kuikala mu mpungilu to.
7 Tukonkononayi tshilejilu etshi tshilenga: Kasumbu ka bana betu ba mu ditunga dikuabu dia mu Afrike bakatutakena ne tshisumbu tshia basalayi tshidimu tshishale, pavuabu mu njila batangile ku mpungilu. Bakakonka bana betu abu ne: “Nuenu nudi banganyi ne nuyaya penyi?” Bakandamuna ne: “Tudi Bantemu ba Yehowa, tudi tuya mu mpungilu wetu wa distrike.” Mukuabu musalayi wakamba ne: “Nuenu Bantemu ba Yehowa kanutu ne buôwa nansha bukese to. Kuatayi njila nuye, bua nuapeta mushindu wa kuenza mpungilu wenu kakuyi bualu bunupumbisha. Kadi nuamanya, nenututakene ne basalayi ba bungi kumpala aku. Ikalayi nuendela anu munkatshi mua njila! Binuamona bantu ba bungi bunguile, kanusesuki, tungunukayi ne kuendela anu munkatshi mua njila!” Ke tshiakenzabu ne bakafika bimpe mu mpungilu. Bana betu aba bakapeta mabenesha bualu bavua baleje ne: badi bangata bintu bia tshijila ne mushinga.
8 Anu bu bana betu badi mu bimue bitupa bia mu Afrike, tutu petu tupeta ntatu. Kadi, kakuyi mpata tudi mua kuidikija ditabuja diabu ne kuangata dipangadika dia kuikala mu mpungilu matuku onso asatu. Biwikala ujinga kuakajilula malu kampanda, sambila Yehowa bua akuambuluishe, bualu tudi bamanye se: neabeneshe madikolela audi wenza bua kulonda ndongamu mujima wa mpungilu eu.
9 Mabenesha mmakuindile: Tudi banange Dîyi dia Nzambi bikole, bualu tudi mua kupetelaku lupandu. (1 Pet. 2:2) Dibuela mu mpungilu ne diteleja miyuki nebituambuluishe bonso bua kukolesha ditabuja dietu mu Dîyi edi, ne kupeta mushindu wa kukandamena muluishi wetu Satana. Tuetu babuele mu mpungilu, Yehowa ne bonso badi batumone nebajadike ne: tudi tuanyisha bikole bintu bia tshijila ne “katuena ba ku badi bapingana tshianyima . . . kadi tudi ba ku badi ne ditabuja bua kulama anyima ne muoyo.”—Eb. 10:39, NW; 12:16; Nsu. 27:11.
10 Tudi mua kutekemena kudi Yehowa Nzambi bua atunzuluile biibi bia mu diulu ne atulokeshile mabenesha a mu nyuma. (Mal. 3:10) Difundila tshipatshila tshia kuikala mu Mpungilu wa Distrike wa “Benji ba Dîyi dia Nzambi,” kubangila ku ntuadijilu wa ndongamu mu Ditanu mu dinda too ne ku disambila dia nkomenu ne kuamba ne: “Amen!” mu Dia lumingu mu mapingaja. Neusanke bushuwa!