Utuku wanyisha lutulu lua Yehowa anyi?
1 Bu Yehowa muikale kayi muleje lutulu mu bidimu 10 peshi 20 anyi bia bungi mene (bidi biambuluishe bua kuyishabu bantu ba bungi), uvua mua kuikala mulonge bulelela anyi? Tudi ne dianyisha dia bungi bua mudi Yehowa mupeshe bantu bavule mushindu wa “kukudimuna mitshima yabo.” Pabi, dituku dinene dia dilumbuluisha dia Yehowa “dilualua bu mudi muibi.” (2 Pet. 3:9, 10) Nunku, katuena ne bua kuangata bibi lutulu lua Nzambi to, tumona bu se: nshikidilu wa ndongoluelu eu wa malu udi unenga bua kulua.—Hab. 2:3.
2 Ikala umvuila bakuabu luse: Lutulu lua Yehowa ndupite kule ne kule tshiumvuilu tshietu. Katuena ne bua kupua muoyo tshipatshila tshia lutulu luende to. (Yona 4:1-4, 11) Yehowa udi umona makenga adi nawu bantu ne udi ubumvuila luse. Yezu pende udi ubumvuila luse. Bu muvua Yezu umvuila bantu bavuaye uyisha luse, wakajinga bua mudimu wa diyisha utangalake miaba yonso bua bantu ba bungi bamone mua kupeta muoyo wa kashidi.—Mat. 9:35-38.
3 Katutuku tumvuila bantu badi kabayi Bantemu luse patu makenga ne bipupu bibakuata anyi? Lelu’eu bantu badi bu ‘mikoko kayiyi ne mulami’ bualu badi bateta kutantamena ntatu ne kabidi bajinga bua kumanya bua tshinyi ntatu eyi idiku. (Mâko 6:34) Patudi tuyisha lumu luimpe ne lukunukunu, tudi tukolesha bantu badi banange bulelela ku muoyo ne tuleja dianyisha bua lutulu lua Yehowa.—Bien. 13:48.
4 Mudimu wetu ki ng’wa kuladikija to: Tshidimu tshishale bantu 323 439 bavua batambule ne bantu bapite pa 14 000 000 bavua babuele mu Tshivulukilu. Bidi bimueneka se: bantu ba bungi menemene nebapete mushindu wa kunyemabu kabutu ka ndongoluelu eu mubi wa malu! “Musumba munene” neuvule kushikidila ne penyi? Katuena bamanye to. (Buak. 7:9, NW) Mudimu wetu wa diyisha neutungunuke too ne ku tshikondo kayi? Katuena bamanye to. Kadi Yehowa yeye mmumanye. Lumu luimpe neluyishibue too ne panyisha muoyo wende, ‘pashishe nshikidilu nealue.’—Mat. 24:14.
5 Matuku adi mashale mmakese menemene, ne dituku dia Nzambi dikadi pa kulua. (1 Kol. 7:29a; Eb. 10:37) Kakuyi mpata, “diba dituvua batuadije kuitaba, lupandu luvua kule, mpindiewu lukadi pabuipi netu.” (Lomo 13:11, MMM) Katupangi kujingulula tshipatshila tshia lutulu lua Nzambi to. Kadi, tuikalayi ne tshisumi mu mudimu wetu wa diyisha bua Yehowa aleje luse luende lunene kudi bantu ba bungi badi bajinga buakane.