‘Uluangane mvita mimpe ya ditabuja’
1 Mupostolo Paulo wakakankamija Timote bua ‘aluangane mvita mimpe ya ditabuja.’ (1 Tim. 6:12) Paulo nkayende uvua utumikila mêyi aa. Wakamba ushindika matuku makese kumpala kua kufuaye ne: uvua muluangane mvita mimpe eyi. (2 Tim. 4:6-8) Wakatungunuka ne kuenza mudimu wende ne dikima, kutantamana ne kushala ne muoyo mukole. Tuetu bamuidikije, netuikale petu ne dishindika dia ne: tudi tuenza muetu muonso ne tuluangana bua ditabuja dietu dia bena Kristo.
2 Dienzeja mudibi bikengela: Paulo wakadienzeja bikole bua kuyisha. (1 Kol. 15:10) Ke tshitudi tuenza lelu patudi tuya kukeba bantu bonso badi mua kuteleja bulelela. (Mat. 10:11) Bua kupeta bamue ba kudibu, bidi mua kukengela ne: tujuke dindadinda bua kuyisha bantu batudi mua kusambakena nabu mu njila. Peshi tudi mua kupatuka mu buambi ku dilolo menemene anyi pakadi butuku pa kuila bua kupetangana ne bantu bakadi dîba adi bamane kupingana ku mabu.
3 Bidi bikengela kudienzeja ne kudiakaja bimpe bua kuikala kufika pa dîba mu tshisangilu tshia mudimu wa buambi tshidibu balongolole bua kasumbu ketu ka dilonga dia mukanda. Tshilejilu, kudi bena ku Betele bakuabu batu baya miaba idi ibangata pamu’apa dîba dijima bua kuya ne dikuabu dijima bua kupingana, bionso ebi bua kumona mua kupatuka mu buambi ku ndekelu kua lumingu ne bena mu bisumbu biabu. Tudi kabidi mua kuela kalumbandi kudi bamue bamanyishi ne bena mu amue mêku ba mu tshisumbu tshietu batu bafumina mitantshi mile kadi bikale bafikamu anu pa dîba. Tuidikijayi bana betu aba bua tshisumi tshiabu ne bua mushindu muimpe utubu badilongolola bua bisangilu bia mudimu wa buambi.
4 Tupinganyinayi muntu yonso udi ujinga kumanya bulelela. Nansha patudi tushiya mikanda kudi bantu mu njila peshi miaba mikuabu, tudi ne bua kudienzeja bua kumanya miaba idibu basombele anyi nimero yabu ya telefone. Pashishe tudi mua kubapinganyina bua kubambuluisha bua banange bikole bulelela ne kuenza muetu muonso bua kutuadija kulonga nabu Bible.
5 Ikala ne tshibidilu tshia kupatuka mu buambi: Paulo uvua wenza muende muonso bua kuyisha pa tshibidilu. (Lomo 15:19) Mmuutu pebe wenza anyi? Utuku ne tshibidilu tshia kupatuka mu buambi anyi? Ukadi mupatuke mu buambi katshia ngondo eu watuadija anyi? Balombodi ba Dilonga dia Mukanda dia Tshisumbu mbasue bua kumona ne: muena mu kasumbu kabu yonso udi uyisha bikole mu ngondo wa muanda-mukulu. Nebanuambuluishe pa muanda eu.
6 Tuetu benze muetu muonso bua kulonda tshilejilu tshia Paulo bua muvuaye umanyisha lumu luimpe, netupete mushindu wa kutungunuka ne ‘kuluangana mvita mimpe ya ditabuja.’