Ndongamu mupiamupia wa mpuilu wa tshijengu

Tudi bamanye ne: anu Yehowa Nzambi ke utudi ne bua kunanga ne kulamata. Kadi, bena panu badi batulobesha bua tuetu kunyanga malanda etu ne Yehowa. (Yone 17:14) Bua kukolesha dinanga ditudi nadi kudi Yehowa ne kutuambuluisha bua kukandamena malu a panu adi anyanga makanda etu a mu nyuma, ndongamu mupiamupia wa mpuilu wa tshijengu bua tshidimu tshia mudimu tshia 2001 neikale ne tshiena-bualu etshi: “Tunangayi Nzambi​—Katunangi malu a bena panu.”​—1 Yone 2:15-17.

Mushindu utudi banange Yehowa bikole udi utusaka bua kumanyisha bantu malu ende. Nansha nanku, mudimu wa buambi ki mmupepele bua bantu ba Nzambi ba bungi to. Mu muyuki wa ne: “Tudi tuenza mudimu wa buambi bualu tudi banange Nzambi,” neumanye mudi bantu ba bungi balekele buôwa ne kabidi batshimune ntatu mikuabu bua kumona mua kudifila bikole mu mudimu eu.

Mêyi mabi a bena panu adi mua kutufikisha ku tshinyi? Bienzedi bivua bantu bangata kale bu bibi badi mpindieu babiangata bu bikadilu bidi biakanyine. Muyuki wa ne: “Bantu badi banange Yehowa mbakine malu adi mabi” ne muyuki mukosolola wa ne: “Mmunyi mututu tuangata malu a bena panu?” neukoleshe dipangadika dietu dia kubenga kulonda majinga mabi.

Mu mpuilu eu nemuikale kabidi Kalasa ka Mudimu wa Teokrasi ne Tshisangilu tshia Mudimu bia tshilejilu, kabidi ne tshikepeshilu tshia tshiena-bualu tshia dilonga dia Tshibumba tshia Nsentedi tshia lumingu alu. Muyuki wa patoke eu wa ne: “Mushindu udi dinanga ne ditabuja bitshimuna bena panu,” neutukankamije bua kuidikija Yezu ne kukandamena malu a bena panu. (Yone 16:33) Nubikile bantu banudi nulonga nabu Bible bua balue kuteleja malu aa. Muntu yonso udi ujinga kutambula amanyishe mutangidi-muludiki bualu ebu kumpala kua dîba bua balongolole malu adi akengela kuenza.

Mpuilu wa tshijengu eu neatuleje muaba menemene udi dinanga dietu ne bua kushindamena bua Yehowa kutubeneshaye. Katupitshishi muyuki nansha umue to!