Programe mupiamupia wa mpuilu wa tshijengu

Batu kabidi bumvuija muaku ditshina ne: “nkanemu kakole peshi diumvua buôwa bua bungi bua Nzambi.” Diumvuija edi didi dileja ditshina dimpe didibu bambe mu Bible ne: “didi tshibangidilu tshia meji.” (Mus. 111:10) Kadi kudi ditshina dia mushindu mukuabu didi mu bukua-panu bua Satana ebu. Mmushindu kayi utudi mua kuepuka ditshina dibi dia nunku eku tuenda tupeta kanemu kakole bua Yehowa? Programe mupiamupia wa mpuilu wa tshijengu bua tshidimu tshia mudimu tshia 2002 udi wandamuna lukonko elu. Tshiena-bualu tshiende tshidi ne: “Tshinayi Nzambi, numutumbishe.” (Buak. 14:7) Netufike ku dimanya mushindu udi ditshina dia Yehowa mua kuambuluisha muntu ne muntu ne kabidi bulongolodi bujima.

Nansha mudi ditshina mua kufila lungenyi lua buôwa anyi dipanga dikima ne dibenga kuanyisha bua kutuilangana ne nsombelu mikole, Bible yeye udi wamba ne: “Ba diakalenga mbantu bonso badi batshina [Yehowa].” (Mus. 128:1, MMM) Mpuilu eu neatuleje mutudi mua kutshimuna malu adi mua kukondakaja ntendelelu mulelela. Netulonge tshitudi mua kuenza bua kuleja bapiabapia mushindu udibu pabu mua kupeta ditshina dia Nzambi dimpe edi, diabasaka bua kumukuatshila mudimu ne muoyo wabu wonso, ne anyima wabu mujima, ne lungenyi luabu luonso ne bukole buabu buonso. (Mâko 12:30) Dituku dia kumpala nedijike ne muyuki wa mutangidi wa distrike udi wamba ne: “Tuikalayi pabuipi ne bantu batudi banange.” Neatuleje mutudi mua kushala ne budimu kumpala kua malu adi Diabolo ujinga bua tuetu kuenza adi mua kutulamuna kudi Yehowa, ku dîku dietu ne kudi bena Kristo netu.

Tshiena-bualu tshia muyuki wa bitupa binayi wa dituku dibidi netshikale ne: “Tshina Yehowa, kadi ki mbantu to.” Muyuki eu neumvuije bua tshinyi ne mushindu utudi mua kulekela buôwa kayi buonso budi mua kutupangisha bua kuenza mudimu wetu tshishiki anyi bua kulama muoyo mutoke ne kuondo ka muoyo kimpe mu kalasa ne ku mudimu. Muyuki wa patoke eu: “Tshina Nzambi ne ulame mikenji yende” mmuashila pa malu malondangane adibu bumvuije mu Buakabuluibua nshapita wa 14. Mpuilu wa tshijengu au neajike ne mibelu mimpe idi mu tshiena-bualu tshidi tshiamba ne: “Tungunukayi ne kuenda mu ditshina dia Yehowa.”

Kalasa ka Mudimu wa Teokrasi, Tshisangilu tshia Mudimu tshia tshilejilu, muyuki wa batismo ne tshikepeshilu tshia Dilonga dia Tshibumba tshia Nsentedi mmalu makuabu a mu programe eu anudi kanuyi ne bua kupangila to. Lombayi balongi benu ba Bible bua balue pabu. Muntu yonso udi ujinga kutambula udi ne bua kumanyisha mutangidi-muludiki pa lukasa. Tuetu bonso netuanyishe bua kuleja ditshina dimpe dia Yehowa ne kumupa butumbi pa kulonda bitupa bionso bia programe muimpe eu!