Kudisangisha ne aba badi batshina Nzambi

“BANTU miaba yonso badi balumba dipikudibua ku ditshina​—ditshina bua tshikisu, ditshina bua bulofua, ne ditshina bua disama dikole. Tudi petu ne dijinga dia nunku. . . . Bua tshinyi kuakula pa mushindu wa kudima ditshina?” Lukonko elu ludi lukemesha luakajudibua kudi ngamba-malu wa ntuadijilu mu Mpuilu yonso ya Distrike “Ditshina dia Nzambi” yakatuadija mu Kabalashipu 1994.

Miliyo ya bateleji​—diambedi mu Amerike wa ku Nord, ne kunyima ku Mputu, Amerike wa pankatshi ne wa ku Sud, Afrike, Azi, ne bidiila bia mu mbuu—​bavua bazukila mua kumanya kudima ditshina dia mushindu’eu. Bua tshinyi? Bualu bua kupeta mabenesha adi Yehowa mutekele bantu bende bidi bikengela kuikale ne ditshina dia Nzambi. Babuedi ba mu mpuilu bavua balue pamue bua kulonga tshidi ditshina dia Nzambi, ne munkatshi mua programe wa matuku asatu, bakalonga bivule pa ngikadilu eu wa buena nkristo wa mushinga mukole.

‘Tshina Nzambi ne ulame mêyi-matuma ende’

Ke tshivua tshiena-bualu tshia dituku dia kumpala dia mpuilu, tshiashila pa Muambi 12:13. Kutshina Nzambi kudi kumvuija tshinyi? Mu tshitupa mene tshia kumpala tshia programe, mulombodi wa mpuilu wakumvuija ne: ditshina dia Nzambi ndileja dikakala ne kanemu kuondoke bua Yehowa ne buôwa bupangishi bua kumubungamija. Ditshina dia Nzambi dia nunku kadiena dia tshipapu; didi diambuluishi ne diakane.

Mmunyi mudi ditshina edi diambuluishi ditukuatshisha? Muyuki uvua ulonda, “Katuteketshi ne katulekedi,” wakumvuija ne: ditshina dia Nzambi neditusake bua kulama mêyi-matuma a Nzambi ne disanka. Pamue ne dinanga bua Nzambi ne bua muntu netu, ditshina dia mushindu’eu neditupe dikanda dia mu nyuma. Eyowa, ditshina dia Nzambi didi mua kutuambuluisha bua kuepuka kutekesha lubilu bua muoyo wa kashidi.

Tshitupa tshia programe tshiakalonda tshivua dielangana nkonko divua dileja tshijadiki tshilelela tshia mudi ditshina dia Nzambi mua kutukuatshisha. Bakedibua nkonko bakalonda muvua ditshina dia Nzambi dia kanemu dibasake bua kutungunuka ne mudimu wa buambi nansha kuikaka ndengama, kalengu, anyi dikengeshibua ne diakabambuluisha bua kutantamena nansha mateta makole a muntu pa nkayende.

Kadi bua tshinyi bamue bantu badi ne ditshina dia Nzambi padi bakuabu kabayi nadi? Ngamba-malu wa ntuadijilu wakumvuija ne: mu Yelemiya 32:37-39, Yehowa wakalaya ne: Yeye neapeshe tshisa tshiende mutshima udi ne ditshina dia Nzambi mu muyuki wa “Mushindu wa kudima ne kupeta bipeta ku ditshina dia Nzambi.” Yehowa utu ukuna ditshina dia Nzambi mu mitshima yetu. Mushindu kayi? Ku butuangaji bua spiritu munsantu wende ne Dîyi didiye mufundishe, Bible. Kadi mu butoke buonso, tudi ne bua kuenza madikolela mavule bua kulonga Dîyi dia Nzambi ne kubabidila ndongoluelu mivulavulayi ya mu nyuma idiye muenze. Ebi bidi biumvuija mpuilu ne bisangilu bia tshisumbu bietu, bidi bituambuluisha bua kulonga mua kumutshina.

Programe wa mu mêba a mapingaja wakatuadija ne didimuija bua kueyemena Yehowa ne Dîyi diende. Didimuija edi divua dilonda kudi diyukidilangana dia mishindu minene idi Bukalenge ne tshia kushintulula nsombelu wetu wa buena-nkristo.

Kunyima, muyuki wa kumpala wa ku miyuki isatu mikuatakane ya mu mpuilu eu wakatuadija. Tshiena-bualu tshia muyuki mukuatakene eu tshivua “Ditshina dia Nzambi didi ditusaka bua kutumikila mêyi maludiki mafume kudi Nzambi” ne uvua ukoka ntema pa dîku. Mibelu misungula ya mu Mifundu​—ne miambuluishi ya mu nsombelu—​yakafidibua pashishe.

□ Bua balume basela: Ditshina dia Nzambi didi ne bua kusaka mulume bua kunanga mukajende bu mubidi wende nkayende. (Efeso 5:28, 29) Muntu katu ukengesha mubidi wende nkayende, udifuisha bundu kumpala kua balunda bende, anyi wakulakula pa bilema biende nkayende. Nunku udi ne bua kuangata mukajende ne buneme ne kanemu anu mutuye udiangata yeye muine.

□ Bua bakaji basela: Ditshina dia Nzambi dia Yezu diakamusaka bua ‘kusankisha Nzambi misangu yonso.’ (Yone 8:29) Eu mmuenenu muimpe udi bakaji mua kuidikija mu nsombelu wabu ne ba bayabu.

□ Bua baledi: Baledi bena nkristo badi mua kuleja ditshina dia Nzambi pa kuangata majitu a buledi ne mushinga, bamona bana babu bu bumpianyi bufuma kudi Yehowa. (Musambu wa 127:3) Tshipatshila tshia kumpala tshia baledi tshidi ne bua kuikala tshia kukolesha bana babo bua balue bena nkristo ba bushuwa.

□ Bua bana: Yehowa udi ushidimuna bana bua batumikile “baledi babo mu buobumue ne Mukalenge.” (Efeso 6:1, NW) Nunku, kutumikila baledi babo nkutumikila Nzambi.

Muyuki wa nkomenu wa dituku wakalenga mpampakenu yetu bualu uvua wakula pa nyanji miondoke itu bavule bapetangana nayi padibu bafuisha kampanda wabu munanga. Kadi pabuipi ne nkatshinkatshi wa muyuki, kuvua bualu buvua bukatamusha. Ngamba-malu wakasankisha bateleji pa kumanyisha dipatuka dia broshire mupiamupia wa Quand la mort frappe un être aimé. Broshire eu wa mekala ne wa mabeji 32 udi wamba malu mavule adi mua kuambuluisha badi banyingalala bua kumona mua kupita ne nyanji ne mpampakenu idi ilua kunyima kua difuisha munangibue kampanda. Kabitu bianjiku kukufikila bua kupanga tshia kuambila muntu udi mufuishe anyi? Tshitupa tshia broshire eu tshidi tshiumvuija mushindu utudi mua kuambuluisha badi mu kanyinganyinga. Pavuabu bateleja ngamba-malu, bavule munkatshi mua bateleji bavua bela meji bua kampanda uvua mua kupeta diambuluisha ku broshire mupiamupia eu.

‘Tusadilayi ku mudimu wa tshijila ne ditshina dia Nzambi ne dikakala’

Ke tshivua tshiena-bualu tshia dituku dibidi, tshiashila pa Ebelu 12:28. Mu programe wa mu dinda, muvua muyuki mukuatakane muibidi wa “Bisumbu bidi bienda mu ditshina dia Yehowa.” Tshitupa tshia kumpala tshiakakula bua dibuela mu bisangilu. Dibuela dietu mu bisangilu didi dileja kanemu ketu bua Nzambi ne ndongoluedi yende ya mu nyuma. Pa kubuela mu bisangilu, tudi tuleja ne: tudi tutshina dîna diende ne tujinga kukumbaja disua diende. (Ebelu 10:24, 25) Ngamba-malu muibidi wakumvuija ne: bu mudi tshisumbu mu kabujima katshi tshienda mu ditshina dia Yehowa, muntu yonso pa nkayende udi ne bua kukumbaja tshiende tshitupa bua kulama bienzedi bimpe. Ngamba-malu wa ndekelu wakakula bua disanka dia mudimu ne bujitu budi nabu bena nkristo buonso​—kumanyisha lumu luimpe kakuyi ditekesha. Kuyisha nekutungunuke too ne tshikondo kayi? Too ne pamba Yehowa ne: biakumbanyi.​—Yeshaya 6:11.

Muyuki wakalonda, anu bu mutudi tubimona mpindieu mu biena-bualu bia dilonga mu tshibejibeji etshi uvua “Disanka dia Yehowa n’lumbu luetu.” (Nehemiya 8:10) Bua tshinyi bena tshisamba tshia Yehowa badi ne disanka? Ngamba-malu wakafila mu tshikoso tubingila bungi kampanda. Kabingila ka mushinga menemene nka se: malanda masheme ne Nzambi ke adi atuvuija tshisamba tshia disanka ku bionso pa buloba. Elayi meji ne: tudi ba muabi bua kuikala munkatshi mua bantu badi Yehowa mukoka kudi Yezu Kristo, ke muakavuluija ngamba-malu babuedi ba mu mpuilu. (Yone 6:44) Kabingila bukole kayipu ka disanka!

Bualu bunene mu mpuilu wonso mbatismo, ne kabuvua mua kupangika mu mpuilu ya “Ditshina dia Nzambi.” Mu muyuki uvua ne tshiena-bualu tshia “Didilambula ne batismo mu ditshina dia Yehowa,” ngamba-malu wakumvuija ne: malu anayi ke adi akengedibua bua bantu buonso badi batambule: (1) Tudi ne bua kulonga Dîyi dia Nzambi ku diambuluisha dia mikanda idi yambuluisha bua kudijingulula ne kuditumikila; (2) tudi ne bua kusambila; (3) tudi ne bua kudisangisha ne bena kuitabuja netu mu bisangilu bia tshisumbu; ne (4) tudi ne bua kufila bumanyishi ku dîna dia Yehowa ne Bukalenge buende.

Programe wa mu Disambombo mu mêba a mapingaji wakatuadija ne tshiena-bualu tshikankamiji tshia “Yehowa katu ulekela tshisamba tshiende.” Kukadi siekele makumi asatu ne itanu, pavua tshisamba tshia Izalele tshiakama bikondo bikole, Yehowa wakafila tshijadiki ku butuangaji bua Mozese wamba ne: “Yehowa Nzambi wenu . . . yeye kena unuhanga, kena unulekela.” (Dutelonome 31:6) Yehowa wakajadika tshieya etshi pa kukuba bena Izalele pakabuelabu mu Buloba Bulaya ne kubuangatabu. Lelu’eu, patudi tuakama mateta makole, tudi kabidi mua kuikala ne dieyemena dionso dia se: Yehowa kakutulekela to, bituikale bashale balamate kudiye ne tuteleja mubelu wa Dîyi diende.

Mmunyi mudi dibala dia Bible mua kukusankisha? Mu muyuki wa “Balayi Bible Munsantu, Dîyi dia Nzambi, ku dituku dionso,” ngamba-malu wakabela bua kubala ne lungenyi lua dijinga bua kumanya bivule ne didiela nkonko bu eyi: muyuki eu udi undongesha tshinyi pa ngikadilu ya Yehowa ne njila yende? Mmunyi mundi mua kufuanangana menemene ne Yehowa mu malu aa? Dibala dia Bible dia nunku didi dituala disanka ne dimonamona dia malu difutshi.

Kunyima ntema ivua mikoka ku muyuki mukuatakaja muisatu wa programe, “Ndongoluelu bua Kuambuluisha batshinyi ba Yehowa.” Nansha mudi Yehowa katshiyi pamu’apa wenzela basadidi bende bishima lelu’eu, kabiyi mpata udi wambumluisha badi bamutshina. (2 Petelo 2:9) Muyuki mukuatakane eu wakakuila pa ndongoluedi inayi idi Yehowa utuambuluisha nayi mu bikondo ebi bikole: (1) Ku butuangaji bua spiritu wende, Yehowa udi utupa makanda bua kukumbaja midimu kule kutambe makanda etu nkayetu. (2) Ku butuangaji bua Dîyi diende, udi utupa mibelu ne bulombodi. (3) Ku butuangaji bua tshia-bupikudi, udi utupa kondo ka muoyo kakezuke. (4) Ku butuangaji bua Bulongolodi buende, kusangisha ne bakulu, udi utupa buludiki ne bukubi. (Luka 11:13; Efeso 1:7; 2 Timote 3:16; Ebelu 13:17) Pa kubabidila bimpe menemene ndongoluelu eyi, netuikale mua kutantamena ne nunku kupeta dianyisha dia Yehowa.

Muyuki wa ndekelu mu mêba a mapingaji mu Disambombo uvua ne tshiena-bualu tshia: “Dituku didi dikuatshisha buôwa dia Yehowa dikadi pa buipi,” mushindamena pa mulayi wa Malaki. Matuku makuatshishi a buôwa avuaku ku kale, bu pavua dilumbuluisha didituta pa Yeruzaleme mu 70 K.B.B. Kadi dituku dikuatshishi dia buôwa ditamba bunene ditu bantu kabayi banji kumona nedilue pikala ‘disombuela difika pa aba badi kabayi bamanye Nzambi ne pa aba badi kabayi batumikila lumu luimpe ludi lutangila Mukalenge wetu Yezu.’ (2 Tesalonike 1:6-8, NW) Bikadi pa kuenzeka anyi? Ngamba-malu wakamba ne: “Nshikidilu ukadi pabuipi! Yehowa mmumanye dituku ne dîba. Kakushintulula kalandrié kende to. Tudi balombibua bua kunanukila ne lutulu luonso.”

Bivua bikole bua kuitaba ne: matuku abidi akavua mapite. Ntshinyi tshiatuala programe wa dituku dia ndekelu?

“Tshinayi Nzambi ne numupe butumbi”

Tshiena-bualu tshia dituku disatu tshivua tshiashila pa Buakabuluibua 14:7. Mu programe wa mu dinda, mulongolongo wa miyuki wakazangika amue malongesha a nshindamenu adi asunguluja Bantemu ba Yehowa ku malongolodi makuabu a malu a Nzambi.

Mu muyuki wa “Nekuikale dibiishibua ku lufu dia bakane,” ngamba-malu wakajula lukonko ludi lukoka ntema: “Munkatshi mua Dituku adi dia Dilumbuluisha dia bidimu tshinunu, ntshikondo kayi tshiabika aba bavua bafue ne lulamatu mu matuku a ku nshikidilu aa a bulongolodi bua malu bua Satana?” Diandamuna divua tshinyi? “Bible kêna muambe bualu nansha bumue,” ke muakamba ngamba-malu. “Kadi, kabiena bia meji bua aba badi bafue mu matuku etu aa kubishibuabu ku lufu kumpala bua kuambuluisha musumba munene wa bapanduka ku Armagedon mu mudimu munenanenayi wa dilongesha wenzeka munkatshi mua Dituku dia Dilumbuluisha anyi? Eyowa, mbulelela!” Bantu nebapanduke anyi? Ntshia bushuwa. Malongesha a Bible ne bilejilu bidi bitujadikila bualu ebu biakumvuijibua patoke mu muyuki uvua ulonda wa “Bapandishibue ne muoyo mu Dikenga dinene.”

Bantemu ba Yehowa mbamanye kuonso eku ne Bible udi ufila matekemena abidi​—muoyo wa kashidi mu mparadizu pa buloba bua miliyo kayiyi kubala ne muoyo ukena kufua mu diulu bua bungi bujadika bua bakokesha ne Kristo mu Bukalenge buende. Muyuki wa “Kanutshinyi to, kasumbu kakese” uvua wakula pa ditekemena dia mu diulu. (Luka 12:32) Mu muenekelu wa nsombelu wa bulongolodi bua lelu, kasumbu kakese kakena ne bua kutshina to; yonso wa kudibu udi ne bua kunanukila too ne ku nshikidilu. (Luka 21:19) “Dikima diabu,” ke muakamba ngamba-malu, “didi ditumika bua kukankamija bena musumba munene. Buobo pabo badi ne bua kudima ngikadilu wa dikima bu mudibu badianjila kumona mu lungenyi dipikudibua mu tshikondo tshitambe bunene tshia tshivundu tshitu buloba kabuyi buanji kumanya.”

Ku nkomenu wa programe wa mu dinda, bateleji bakabandila ne disanka drama wa Masungula audi ne bua kuenza. Mu matuku a Yoshua, ne a muprofete Eliya, bena Izalele bavua pa masangu a njila. Bavua ne bua kuenza masungula kampanda. Eliya wakamba ne: “Tshikondo bule munyi tshinuikale nuelakana pankatshi pa malu abidi mashilangane? Pikale Yehowa muikale Nzambi mulelela, mulondayi; kadi bikale Baala ke udi Nzambi mulelela, mulondayi.” (1 Bakelenge 18:21, NW) Lelu’eu bukua-bantu budi pa masangu a njila. Etshi ki ntshikondo tshia kuelakana pa malu abidi to. Ndisungula kayi didi diakane? Ndia mushindu umue ne divua Yoshua muenze kale. Wakamba ne: “Kadi meme ne ba mu nsubu muanyi netukuatshile Yehowa mudimu.”​—Yoshua 24:15.

Diakamue, ke muakamuenekabi, tukavua Dia-lumingu mêba a mapingaji ne dîba dia muyuki wa patoke uvua ne tshiena-bualu tshia “Bua tshinyi kutshina Nzambi Mulelela mpindieu.” Mu Buakabuluibua 14:6, 7 (NW), bukua-bantu buonso mbabedibue ne: “Tshinayi Nzambi ne numupe butumbi.” Bua tshinyi bidi bia lukasalukasa bua kutshina Nzambi mpindieu? Bualu, anu bu mudi mvese utungunuka ne kuamba ne: “dîba dia dilumbuluisha kudiye diafiki.” Ku diambuluisha dia muanende, udi mpindieu musombe mu nkuasa wa bumfumu bu Mukalenge wa Bukalenge bua Nzambi bua mu diulu, Yehowa neatuishe bulongolodi bua malu bua lelu bukena bukezuke ne butomboke ku nkomenu. Ngamba-malu wakumvuija ne: eu ke mushindu umu’epele wakutuala disulakana kudi aba badi batshina Nzambi ne bua kusungila ne kulama tshisombelu tshietu: buloba. Bualu matuku aa ke a nshikidilu wa bulongolodi ebu bua malu, bidi bia lukasalukasa bua tuetu kutshina Nzambi mulelela mpindieu!

Kunyima kua tshikepeshilu tshia dilonga dia Tshibumba tshia Nsentedi bua lumingu alu, ngamba-malu wa ndekelu wakalua ku tshiakuilu bua kuenza muyuki wende. Wakumvuija ne: bu tshipeta tshia programe wa mpuilu, ditshina dia Nzambi dia kanemu divua diangata nguvuilu mupita bunene bua babuedi ba mu mpuilu. Wakazangika mabenesha mavule adi afikila badi batshina Nzambi. Ngamba-malu wakamanyisha dipatuka dia kasete vidéo kapiakapia ka​—Unis grâce à l’enseignement divin. Kadi kaleja malu a pa buawu a mu mpuilu ya bukua-mutunga ivua mienzeke mu 1993-1994 ya “Dilongesha dia Nzambi.” Bu muvua muyuki utua ku tshibungubungu, bavule bakadiebeja ne: ‘Ntshinyi tshitudi mua kutekemena bua tshidimu tshialua?’ Mpuilu ya distrike ya matuku asatu miaba mivule.

Bua kukoma, ngamba-malu wakatela Malaki 3:16 (NW), udi wamba ne: “Mu tshikondo atshi, aba badi batshina Yehowa bakakuishangana munkatshi muabo, muntu yonso ne mukuende, ne Yehowa uvua uteya ntema ne uteleja. Ne mukanda wa tshivulukidi wakatuadija kufundibua kumpala kuende bua aba badi batshina Yehowa ne bua aba badi bela meji ku dîna diende.” Babuedi ba mu mpuilu bakashala ne dipangadika dia kuela meji pa dîna dia Yehowa ne kumusadila ne ditshina dia Nzambi.

[Tshimfuanyi mu dibeji 24]

Badi basue kutambula badi ne bua kutungunuka ne kuleja ditshina dia Nzambi

[Tshimfuanyi mu dibeji 25]

Drama wa “Masungula audi ne bua kuenza” wakasaka bateleji bua kupangadija bua kusadila Yehowa

[Tshimfuanyi mu dibeji 26]

Babuedi ba mu mpuilu bakasanka bua kupeta broshire mupiamupia wa “Quand la mort frappe un être aimé”