Bipeta bidi bifumina ku ditshina Nzambi mulelela
“Meme Yehowa, ndi Nzambi webe, Eu udi ukulongesha bua diakalenga diebe nkayebe, Eu udi ukulombola mu njila uwudi ne bua kuendela.”—YESHAYI 48:17, NW.
1. Mbipupu kayi bidi mua kuepukibua ku ditshina Nzambi?
BU ADAMA mudime ditshina Nzambi, divua mua kumukanda ku dienza mpekatu wakamufikisha ku lufu luende nkayende lua kashidi ne ku bidimu binunu ne binunu bia tunyinganyinga bua ndelanganyi yende. Bu tshisamba tshia Izalele wa kale tshiteleje mubelu wa kudi Yehowa wa kumutshina ne kumunanga, tshisamba atshi kabavua mua kuya natshi ku bupika ku Babilone, peshi katshivua mua kubenga Muana wa Nzambi ne kupia bumanji bua mashi ende akelabu panshi. Bu bantu lelu’eu batshine Nzambi, kakuvua ne bua kuikala nkosa-mishiku mu mbulamatadi anyi mu bungenda-mushinga, kakuvua ne bua kuikala dibunda bibawu peshi mvita.—Nsumuinu 3:7.
2. Nansha nsombelu idiku pa buloba mikale ya mushindu kayi, bua tshinyi tudi ne bua kudima ditshina Yehowa?
2 Kadi, kakuyi didipampakaja bua bidi bena mu bulongolodi ebu benza, tuetu pa nkayetu, mu mêku ne mu bisumbu bia basadidi ba Yehowa, tudi mua kupetela bipeta bimpe ku didima ditshina Nzambi mulelela. Ebi bidi mu diumvuangana ne divuluija diakafila Mozese kudi tshisamba tshia Izalele se: “Tshidi Yehowa Nzambi webe ukulomba ki ng’anu kutshina Yehowa Nzambi webe, bua kumona mua kuendela mu njila yende yonso ne kumunanga ne kusadila Yehowa Nzambi webe ne mutshima webe wonso ne anyima webe wonso; bua kulama mêyi-matuma a Yehowa . . . bua diakalenga diebe anyi?” (Dutelonome 10:12, 13, NW) Mbimue bipeta kayi bitudi tupeta patudi tutshina Yehowa, Nzambi mulelela?
Meji—Mmatambe ngolo ku mushinga
3. (a) Ntshipeta kayi tshipite bionso tshitudi mua kupeta? (b) Musambu wa 111:10 udi umvuija tshinyi?
3 Tshipeta tshitambe bikuabu bionso mmeji malelela. Musambu wa 111:10 (NW) udi wamba ne: “Ditshina Yehowa nntuadijilu wa meji.” Abi bidi biumvuija tshinyi? Meji mbukokeshi bua kutumika biakane ne dimanya bua kumona mua kujikija ntatu, kuepuka njiwu, ne kukumbaja bimue bipatshila. Meji mbusunguluji buimpe. Ntuadijilu, tshitupa tshia kumpala, tshishimikidi tshia meji a mushindu’eu, nditshina Yehowa. Bua tshinyi? Bualu bifukibua bionso mmudimu wa ku bianza biende. Bionso bidi ku bukokeshi buende. Wakapetesha bukua-bantu budisunguidi kadi kakabapesha bukokeshi bua kuludika biidia biabu nkayabu kakuyi bulombodi buende to. (Yoshua 24:15; Yelemiya 10:23, NW) Anu bituanyisha mianda eyi ya nshindamenu pa bidi bitangila nsombelu ne kuikala ne nsombelu udi mu diumvuangana nayi ke patudi mua kumona mua kulubuluka kashidi. Bikala dimanya dietu dia Yehowa ditupe dishindika dikena ditenkakana dia se: disua dia Nzambi nedilubuluke bushuwa ne se: dilaya diende ne bukokeshi buende bua kufuta bena lulamatu bidi bilelela, nanku ditshina Nzambi neditusake ku dienza malu ne meji wonso.—Nsumuinu 3:21-26; Ebelu 11:6.
4, 5. (a) Bua tshinyi dishidimunyibua dia mu Université diakashiya nsongalume kampanda kayi ne meji malelela? (b) Mmunyi muakapeta pashishe mulume eu ne mukajende meji malelela, ne mmu mushindu kayi muakashintululabi nsombelu yabu?
4 Tuangate tshilejilu kampanda. Kukadi makumi makese a bidimu, nsongalume kampanda uvua ulonga mu Université wa Saskatchewan, mu ditunga dia Canada. Ku malonga abu kuvua dilongesha dia bioloji, ne bakabalongesha dilongesha dia Bidimenene. Pakajikijaye, wakapangadika bua kulonga Fizike wa atome ne wakapeta bourse bua kutungunuka ne malonga ende mu Université wa Toronto. Pavuaye ulonga, wakamona patoke tshijadiki tshia mpatshi tshia bulongame ne difuikakaja mu ndongoluelu ya atome. Kadi, kakuvua diandamuna nansha dimue ku nkonko bu mudi: Nnganyi wakafuikakaja bionso ebi? Ndîba kayi? Ne mbua tshinyi? Kakuyi mandamuna aa, uvua mua kuenza mudimu bimpe ne dimanya diende ne meji wonso pa buloba buvua mu mvita tshikondo atshi anyi? Ntshinyi tshivua ne bua kumulombola? Ndinanga dinekesha dia ditunga diabu anyi? Ndukuka lua bintu bia ku mubidi anyi? Bushuwa, uvua mupete meji malelela anyi?
5 Katupa kîpi kunyima kua malonga ende, nsongalume awu ne mukajende bakatuadija kulonga Bible ne Bantemu ba Yehowa. Bakatuadija kupeta mu Dîyi dia Nzambi, mandamuna avuabu kabayi bapete kumpala. Bakafika ku dimanya Mufuki, Yehowa Nzambi. Pakalongabu malu a Mozese ku Mbuu Mukunze pamue ne a Danyele ne bakuende mu Babilone, bakajingulula mushinga wa kutshina Nzambi pamutu pa kutshina bantu. (Ekesode 14:10-31; Danyele 3:8-30) Ditshina Nzambi dia mushindu’eu disambakaja ne dinanga dilelela bua Yehowa biakatuadija kubasaka. Kunyima kua lupolo luîpi, nsombelu wabu mujima wakashintuluka. Ndekelu wa bionso, nsongalume awu wakamanya Muena midimu ya bianza ivuaye mulonge mu bioloji. Wakatuadija kujingulula dilongolola dia Muena meji akamonaye malejibue mu dilonga diende dia Fizike. Pamutu pa kutumika ne dimanya diende bua kuenza biamu bivua mua kushipa bantu nende, yeye ne mukajende bavua basua kuambuluisha bantu bakuabu bua kunanga Nzambi ne kunanga bantu nabu. Bakabuela mu mudimu wa ku dîba ne ku dîba bu bambi ba Bukalenge bua Nzambi. Pashishe, bakabuela mu Kalasa ka Bible ka Galaad ka Watchtower, ne bakatumibua bu ba-misionere.
6. Bituikala ne meji adi miji yawu miashila pa ditshina Yehowa, mbipatshila kayi bidi kabiyi bia musangu mule bituepuka, ne netuenze tshinyi pamutu pa kubipatshila?
6 Bushuwa, muntu yonso kêna mua kuikala misionere to. Kadi, yonso wa kutudi udi mua kubabidila meji adi ne miji miashila pa ditshina Yehowa. Bituadima meji awu, katuakukokibua kudi nkindi ya bantu badi bafuikakaja patupu malu adi atangila tshipatshila tshia muoyo. Netuditue mu dilonga dia Bible, mufundisha kudi Mpokolo wa muoyo, Yehowa Nzambi, eu udi mua kutupa muoyo wa kashidi. (Musambu wa 36:9; Kolosai 2:8) Pamutu pa kudienza bapika ba ndongoluelu wa bungenda-mushinga ukadi pa kubutudibua, netuteye ntema ku mubelu wa Yehowa udi utulomba bua kusanka bua bidibua ne bivualu, eku tuenda tushemeja malanda etu ne Yehowa pa kuangata bu tshintu tshitambe bionso mu nsombelu. (1 Timote 6:8-12) Pamutu pa kuenza anu bu se: matuku etu atshilualua mmasuikakaja ku dipeta bubanji bua mu bulongolodi ebu, mbimpe bua tuitabuje bidi Dîyi dia Yehowa dituambila se: bulongolodi ebu budi bupita ne lukuka luabu, kadi eu udi wenza disua dia Nzambi udi ushala kashidi.—1 Yone 2:17, NW.
7. (a) Mmunyi mudi Nsumuinu 16:16 utuambuluisha bua kuikala ne mmuenenu wa pankatshikatshi wa manême? (b) Mmafutu kayi adi afumina ku divuija disua dia Nzambi nshindamenu wa nsombelu yetu?
7 Nsumuinu 16:16 (NW) udi utukankamija pa kumanyisha mu bulelela buonso se: “Kupeta meji [meji adi atuadija ne ditshina Yehowa], O mmunyi mudiku kulengele kupita ngolo! Ne kupeta bujinguludi kudi ne bua kusungudibua kupita argent.” Meji ne bujinguludi bia mushindu’eu bidi bilua bukole budi butusaka bua kuvuija dikumbaja disua dia Nzambi muanda wa nshindamenu mu nsombelu yetu. Ne mmudimu kayi udi Nzambi mupa Bantemu bende tshikondo etshi tshia mu mianda ya bantu? Kumanyisha Bukalenge buende ne kuambuluisha bena mitshima milulame bua kuluabu balongi balelela ba Yezu Kristo. (Matayo 24:14; 28:19, 20) Mudimu eu ke udi utuala mafutu a disankishibua dilelela ne disanka divule. Nenku, Bible udi ne kabingila kimpe padiye wamba se: “Disanka ndia muntu udi mupete meji.”—Nsumuinu 3:13, NW.
Dikubibua ku malu mabi
8. (a) Tela tshipeta tshibidi tshidi tshifumina ku ditshina Nzambi. (b) Nku bubi kayi kutudi bakubibua? (c) Mmunyi mudi ditshina Nzambi dilua bukole buvule budi butusaka?
8 Tshipeta tshibidi tshidi tshifumina ku ditshina Nzambi ntshia se: tudi bakubibue ku dienza malu mabi. Bantu badi mu buondoke buonso banemeka Nzambi kabena badisunguila nkayabu tshimpe ne tshibi to. Kabena bangata tshidi Nzambi wangata bu tshibi bu tshidi tshimpe to, peshi kabena bangata bintu bidi Nzambi wamba mudibi bibi bu bimpe nansha. (Musambu wa 37:1, 27; Yeshaya 5:20, 21) Kupita apu, muntu udi musakibue kudi ditshina Nzambi kêna wimanyin’anu pa dimanya dia bidi Yehowa wamba mudibi bimpe ne bidiye wangata bu bibi. Muntu wa mushindu’eu mmunange bidi Yehowa munange ne udi ukina bidi Yehowa ukina. Bu tshipeta, udi wenza malu mu diumvuangana ne mêyi-makulu a Nzambi. Nenku, anu bu mudibi biamba mu Nsumuinu 16:6 (NW), “mu ditshina Yehowa muntu udi wela bualu bubi nyima.” Ditshina Nzambi dia mushindu’eu didi dilua bukole bunene budi busaka bua kukumbaja tshidi muntu kayi mua kukumbaja ne bukole buende nkayende.
9. Mmunyi muvua dijinga dikole dia kubenga kubungamija Nzambi dikale ne buenzeji pa dipangadika dia mukaji kampanda ku Mexique, ne ntshipeta kayi tshiakapeteka?
9 Nansha bikala ditshina Nzambi dituadija kumena munda mua muntu kampanda, didi mua kumukolesha bua kuepuka kuenza tshintu kansanga tshidi mua kumunyingalaja mu matuku a muoyo wende mujima. Tshilejilu, mukaji kampanda musela muimite difu ku ditunga dia Mexique wakebeja Ntemu kansanga malu adi atangila kutuula dîmi. Ntemu wakabadila mukaji eu mvese mivule ne pashishe kuambaye ne: “Ku mêsu kua Mufuki, muoyo udi ne mushinga munene, nansha muoyo wa aba badi kabayi banji kuledibua.” (Ekesode 21:22, 23; Musambu wa 139:13-16) Bakavua bamuambile mu lupitadi se: muana uvua ne bua kuledibua ne bulema. Kadi mpindieu, musakibue kudi tshivuaye mumone mu Dîyi dia Nzambi, mukaji awu wakapangadija bua kulela muanende. Munganga wende wakabenga kumonangana nende tshiakabidi, ne bayende wakafuna bua kumubenga, kadi yeye kakashintuluka to. Kunyima, wakalela muana wa bakaji—kayi bulema, wa makanda a mubidi mimpe ne mulengele. Musakibua kudi dianyisha, wakakeba Bantemu ne wakatuadija kulonga nabu Dîyi dia Nzambi. Mu tshidimu tshimue, yeye ne bayende bakatambushibua. Kupita bidimu bikese, mu mpuilu kampanda wa distrike, bavua ne disanka dia kumonangana tshiakabidi ne Ntemu wa kumpala, ne kumulejabu muanabu wa bakaji wa bidimu binayi. Dinemeka diakane bua Nzambi ne dijinga dikole dia kubenga kumubungamija, bushuwa, bidi ne buenzeji bukole mu nsombelu wa muntu.
10. Ditshina Nzambi didi mua kukolesha bantu ku didipikula ku mishindu kayi ya bienzedi bibi?
10 Ditshina Nzambi didi ditukolesha bua kuepuka dienza mulongolongo wa malu mabi. (2 Kolinto 7:1) Padi ditshina Nzambi didimibua bimpe, didi mua kuambuluisha muntu bua kulekela mpekatu ya mu musokoko idi mimanya anu kudiye yeye nkayende ne Yehowa. Didi mua kumuambuluisha bua kudipikula ku bukuatshiki bua maluvu ne ku dinua diamba. Munu wa diamba wa kale wa ku Afrike wa ku Sud udi umvuija ne: “Pangakatuadija kupeta dimanya dia Nzambi, ngakatuadija kabidi kukolesha ditshina dia kumutumbula anyi kumubungamija. Mvua mumanye se: uvua umona, ne mvua njinga bikole bua kuanyishibua ku mêsu kuende. Biakansaka ku dibutula diamba dimvua nadi ne pashishe kudiela mu nkumba.” Ditshina Nzambi ndiambuluishe bantu binunu ne binunu mu mishindu ya muomumue.—Nsumuinu 5:21; 15:3.
Dikubibua ku ditshina bantu
11. Nku buteyi kayi budi bumuangalake kudi ditshina Yehowa dimpe ditukuba?
11 Ditshina Nzambi dimpe didi kabidi dituepula ku ditshina bantu. Mu mushindu mukese anyi munene, bantu bavule mbanyongopija kudi ditshina bantu. Nansha bapostolo ba Yezu Kristo bakamulekela ne kunyema pakamukuatabu kudi basalayi mu budimi bua Jestemanyi. Kunyima, mu lubanza lua muakuidi munene, katshiyi ne nkatshinkatshi wende ne mukuatshike buôwa, Petelo wakavila se: kavua umue wa ku balongi ba Yezu ne se: kavua nansha mumumanye to. (Mâko 14:48-50, 66-72; Yone 18:15-27) Kadi, bapostolo bakambuluishibua bua kupetulula nkatshinkatshi wa mu nyuma. Ku lukuabo luseke, mu matuku a Mukalenge Yewakime, Uriya muana wa balume wa Shemaya wakatamba kukuatshika buôwa buakamufikisha ku dilekela kusadila bu muprofete wa Yehowa ne kunyema ditunga, kadi wakakuatshibua ne kushipibua.—Yelemiya 26:20-23.
12. (a) Bilondeshile Nsumuinu 29:25, ntshinyi tshidi tshikuba ku ditshina bantu? (b) Mmunyi mudi dieyemena Yehowa mua kudiunda?
12 Ntshinyi tshidi mua kuambuluisha muntu bua kutshimuna ditshina bantu? Kunyima kua mumane kudimuija se: “ditshina bantu ke didi diteya buteyi,” Nsumuinu 29:25 (NW) udi usakidila ne: “Muntu udi weyemena Yehowa neakubibue.” Dieyemena Yehowa ke nshindamenu. Dieyemena dia mushindu’eu ndiashila pa dimanya ne dimonamona malu. Pa kulonga Dîyi diende, tudi tumona tshijadiki tshia buakane bua njila ya Yehowa. Tudi tuibidilangana ne mianda idi ileja dieyemena diende, bulelela bua malaya ende (kusangisha ne dia dibiishibua ku lufu), dinanga diende ne bukole buende bupite buonso. Nenku, patudi tuenza malu bilondeshile dimanya adi, kuenza malu adi Yehowa utulomba ne kulekela ne muoyo mujima adiye utukandika, tudi tutuadija kubabidila buludiludi bukubi buende bua dinanga ne dieyemena diende. Tudi tudimuena tshijadiki tshia se: bukole buende budi mu ditumika bua kukumbaja disua diende. Dieyemena dietu kudiye didi didiunda, ne dimueyemena edi, dimunanga dietu ne dijinga dietu dikole dia kuepuka kumubungamija bidi bidiunda. Dieyemena dia mushindu’eu ndiashila pa tshishimikidi tshishindame. Didi dituambuluisha bu muaba mukolesha bua kuepuka ditshina bantu.
13. Mmunyi mudi ditshina Nzambi mua kutuambuluisha ku mudimu wetu wa ku mubidi, ku nzubu, ne mu kalasa?
13 Dieyemena Yehowa dietu, disangisha ku ditshina Nzambi, nebitushindike bua kuenza tshidi tshiakane nansha biatukanyina mfumuetu wa mudimu bua kutuipata ku mudimu bua dibenga dietu dia kudibuejakaja mu ngenzelu kampanda wa diibila mu mianda ya bungenda-mushinga. (Fuanyikija ne Mika 6:11, 12.) Ditshina Nzambi dia mushindu’eu ndiambuluishe bena nkristo binunu ne binunu bua kutungunuka mu ntendelelu mulelela padibo batuilangana ne buluishi bua kudi bena dîku diabu badi kabayi bena kuitabuja. Didi kabidi dipetesha bansonga badi baya mu kalasa dikima dia kudimanyisha bu Bantemu ba Yehowa ne dibapa bukole bua kumona mua kupita ne disekibua dia kudi balongi nabo badi basendeka mêyi-makulu a mu Bible babela. Bua bualu ebu, mushikankunde kampanda Ntemu wakamba ne: “Bidi bansonga ba mu bulongolodi ebu bela meji kabiena ne mushinga. Bidi Yehowa wela meji ke bidi ne mushinga.”
14. Mmunyi mutu basadidi ba Yehowa bafika ku ditshimuna nansha padi mioyo yabo mu njiwu?
14 Dishindika dia muomumue didi dikolesha bena nkristo balelela bua kushindama mu njila ya Yehowa nansha padi mioyo yabu mu njiwu. Mbamanye se: badi ne bua kutekemena dikengeshibua dia kudi bena mu bulongolodi ebu. Badi bavuluka se: bakatuta bapostolo mfimbu ne kabidi se: Yezu Kristo muine wakatutshibua ne kushipibua kudi bantu babi. (Mâko 14:65; 15:15-39; Bienzedi 5:40; fuanyikija ne Danyele 3:16-18.) Kadi basadidi ba Yehowa badi ne dishindika dijima dia se: udi mua kubakolesha bua kunanukila; ne kabidi se: ne diambuluisha dia kudi Nzambi badi bafika ku ditshimuna; ne pashishe se: bushuwa, Yehowa neafute aba badi ne lulamatu—nansha biakengedibuabi dibiishibua ku lufu bua kuikala ne muoyo mu bulongolodi buende bupiabupia. Dinanga diabo bua Nzambi disangisha ku ditshina Nzambi bidi bibasaka ne bukole buonso bua kuepuka kuenza bualu kayi buonso budi mua kumubungamija.
15. Ntshinyi tshiakambuluisha Bantemu ba Yehowa bua kulama muoyo wabo mutoke mu tumponyi tua disubishilangana tua bena Nazi?
15 Disakibua edi diakambuluisha Bantemu ba Yehowa bua kubenga kutshina malu makuate buôwa a tumponyi tua bena Nazi tua disubishilangana mu bidimu bia 1930 ne 1940. Bakalama mu mutshima mubelu wa Yezu udi mu Lukas 12:4, 5, (Mukenji Mulenga): “Nuenu balunda banyi, ndi nnuambila ne: kanutshinyi bantu badi bashipa mubidi, kunyima kabayi ne tshikuabo tshia kuenzabo. Nennuleje unudi ne bua kutshina: nutshine udi, yeye mumane kushipa, muikale ne bukenji bua kuela mu dijimba. Bushuwa ndi nnuambila, wa nenku numutshine.” Nenku, Gustav Auschner, Ntemu uvua mu kamponyi ka disubishilangana ka Sachsenhausen, wakafunda kunyima ne: ‘Basalayi ba SS bakakuma August Dickmann tshingoma ne kukana bua kutukuma bingoma tuetu buonso bavua bashale bituabenga kutua biala pa dibeji divua mua kujadika divila ditabuja dietu. Muntu nansha umue wa kutudi kakatua tshiala pa dibeji adi to. Tuvua ne buôwa buvule bua kubenga kubungamija Yehowa kupita bua ntende ya tshingoma.’ Ditshina bantu didi difikisha muntu ku divila ditabuja, kadi ditshina Nzambi didi dikolesha muntu bua kushalaye mushindamene pa bidi biakane.
Dikubibua dia muoyo
16. Ntshinyi tshiakambuluisha Nowa bua kulama njila muakane munkatshi mua makumi a bidimu too ne ku Mvula wa Kabutu, ne ntshipeta kayi tshiakapetaye yeye ne bena dîku diende?
16 Nowa uvua ne muoyo mu matuku a ku nshikidilu wa bulongolodi buvuaku kumpala kua mvula wa kabutu. Yehowa uvua mupangadije bua kubutula bulongolodi bubi bua mu tshikondo atshi, bua bubi bua bantu. Kadi, mu tshikondo atshi, Nowa uvua mu bulongolodi abu buvua buule ne tshikisu, tshiendenda tshibiatshibi, ne dilengulula disua dia Nzambi. Nansha muvua Nowa umanyisha buakane, “kabakateya ntema too ne pavuile mvula ne kubabutula buonso.” (Matayi 24:39, NW) Kadi, Nowa kakasesuka mudimu uvua Nzambi mumutekela kumpala kuende. Wakenza “bilondeshile bionso bivua Nzambi mumutumine dîyi. Wakenza nanku menemene.” (Genese 6:22, NW) Ntshinyi tshiakambuluisha Nowa bua kutungunuka ne ngenzelu muimpe bidimu bivule too ne pakafika Mvula wa Kabutu? Ebelu 11:7 (NW) udi wandamuna ne: “Ku ditabuja, kunyima kua bamane kumupetesha didimuija dia Nzambi pa malu avua kaayi manji kuenzeka, wakaleja ditshina Nzambi.” Bu tshipeta, yeye ne mukajende ne bana bende ba balume ne bakaji babo bakakubibua ku Mvula wa Kabutu.
17. (a) Kakuyi ditangila bidi bakuabo bantu benza, ntshinyi tshitudi ne bua kuenza? (b) Bua tshinyi aba badi batshina Yehowa badi bushuwa bantu bena disanka?
17 Tudi ne muoyo mu tshikondo tshidi ne nsombelu mivule bu ivuaku mu matuku a Nowa. (Luka 17:26, 27) Mubelu mmufidibue tshiakabidi. Buakabuluibua 14:6, 7 (NW) udi utuambila bua muanjelu kampanda udi ubuuka munkatshi mua diulu udi udimuija bantu ba tshisamba tshionso, tshisa tshionso ne muakulu wuonso bua “kutshina Nzambi ne kumupa butumbi.” Nansha bantu badi pepi nebe benza tshinyi, teya ntema ku mêyi aa, ne pashishe alabaja dibikila edi kudi bakuabo. Anu bu Nowa, enza malu mu ditabuja ne leja ditshina Nzambi. Dienza diebe dia nunku didi mua kukulombola ku dikubibua dia muoyo webe ne mioyo ya bakuabo bavule. Bu mutudi tumona bipeta bimpe bidi aba badi batshina Nzambi mulelela banowa, tudi’anu ne bua kupunga ku mêyi a Mufundi wa misambu muenzeja ku spiritu wakimba ne: “Muena disanka mmuntu udi utshina Yehowa, udi utamba kusankila mu mêyi-matuma ende.”—Musambu wa 112:1, NW.
Mmunyi muwandamuna?
◻ Mbimue bipeta kayi bia mpatshi bidi bifumina ku ditshina Nzambi mulelela?
◻ Mmunyi mudi meji adi ne miji miashila pa ditshina Nzambi mua kutukuba?
◻ Bua tshinyi ditshina Nzambi didi ditukandika ku dienza malu mabi?
◻ Mmunyi mudi ditshina Nzambi ditukuba ku ditshina bantu?
◻ Ditshina Nzambi didi ne buenzeji kayi pa nsombelu wetu wa mu matuku atshilualua?
[Bimfuanyi mu mabeji 16, 17]
“Muena disanka mmutshinyi wa Yehowa, udi usankila bikole mu mêyi-matuma ende.”—Musambu wa 112:1, NW