“Ndi ne bua kumuangala anyi?”

¹ Bua kuandamuna ku dîyi divua Yezu mutume dia ‘kuya kuvuija ba bisamba bionso bayidi,’ basadidi ba Yehowa ba bungi badi badilambule mbamuangale bua kuya kuenza mudimu miaba idibu dijinga ne bamanyishi bavule. (Mat. 28:19) Badi bidikija Paulo, wakandamuna ku dibikila edi, dia ne: “Pitshila ku Makedonia, ulue kutukuatshisha!” (Bien. 16:9, Muanda Mulenga Lelu) Mmunyi mutudi mua kumuangala mu buimpe?

² Ela tshidia tshimue ku musangu: Ku teritware ya tshisumbu tshienu kudiku teritware idibu benzela mudimu amu mu mpukapuka anyi? Bikalabi nanku, udi mua kulaminyina makanda ebe bua kuenzela mudimu mu teritware eyi. Bangabanga ne kupangadija bua kuya muaba mukuabu, anji kuyikila ne bakulu benu bua kumanya bikalabu bamone se: udi mukumbane mua kumuangala. Udi kabidi mua kukonka mutangidi wa tshijengu tshienu bikalaye mumanye tshisumbu tshia pabuipi muudi mua kuya kuenza mudimu webe. Ku lukuabu luseke, pawikala mumane kubala mushinga wa dipangadika diebe, udi mua kujinga bua kuya kuambuluisha mu tshitupa tshikuabu tshia ditunga peshi mu ditunga dikuabu. Wewe muikale ne dijinga edi, wewe ne kasumbu ka bakulu benu anjayi kufundila biro bia filiale bia muaba uudi ujinga kuya kuenzela mudimu, pa kumvuija nsombelu webe wa mu nyuma. Bidi mua kuikala bia meji bua kuanji kuya kumona muaba muine au kumpala kua kupangadija biwikala mua kumuangala bua kashidi peshi bua tshikondo tshîpi.

³ Ikala mudimuke paudi uya muaba mukuabu: Bana betu ba bungi batu bamuangala baya mu matunga makuabu bualu badi bakeba mua kuikala ne nsombelu muimpe peshi banyema bualu badi babakengesha. Mu dienza nanku, bamue mbamate mu bianza bia bantu badi kabayi banemeka mikenji, babalaya bua kubambuluisha bua kushalabu mu ditunga dipiadipia edi pabi anu bua kulua kubadia makuta abu ne pashishe kubanyema. Imue misangu bantu babi aba batu mene bateta bua kuenzeja benyi midimu mibi ku bukole. Padibu babenga, badi babalekela babanga kumona dikenga mu ditunga mudibu balue kusomba. Nunku nsombelu wa benyi aba udi ulua kukola upita ne uvuabu nende mu ditunga diabu. Badi mua kufika too ne ku dilomba bana betu bakuabu bua kubatekabu ku nzubu yabu ne kubambuluisha mu mishindu mikuabu, bilua kuvudija kabidi majitu mu mêku makuabu a bena Kristo badi eku baluangana ne yabu ntatu. Bamue bena mêku kabatshiena basomba bonso kaba kamue, ne mbifikishe mêku abu ku dijimija makanda a mu nyuma anu bua dimuangala dibi edi.​—1 Tim. 6:8-11.

⁴ Biwikala musue kumuangala bua kuya kukeba nsombelu mulenga, ikala muvuluke ne: nansha wewe muye kusombela muaba kayi, ntatu kayakukushila muaba to. Mbipepele bua kutantamena ntatu muaba uudi mumanye muakulu ne nshidimukilu wa bantu badipu kupita kuya ku babende ne kutuadija nsombelu mupiamupia uudi kuyi muibidilangane nende.