Ikala ne ntema ku midimu ya Nzambi ya dikema
1 Munkatshi mua matuku asatu malenga a dikema, tuvua badisangishe mu Mpungilu wa Distrike wa “Benji ba Dîyi dia Nzambi.” Tuvua banji kupua muoyo malu atusombele tuenza dituku dionso, e tuetu kushala bashindamije ngenyi yetu pa midimu ya Yehowa ya dikema. Bavua balongolole mpungilu eu bua kukolesha ditabuja dietu kudi Nzambi ne kuitaba Dîyi diende, kukolesha malanda etu nende, ne kuvudija lukunukunu luetu mu mudimu wa buambi. Mmushindu kayi udi malu atuvua balonge au atuambuluisha?—Yone 13:17.
2 Mêku adi atumikila Dîyi dia Nzambi: Muyuki wa bitupa bisatu eu: “Tumikila Dîyi dia Nzambi” wakatuambuluisha bua kukonkonona mushindu udi mêku etu mu nyuma. Bana batu banange kulonga. Nunku, bavua bakankamije baledi badi batshina Nzambi bua benze bua se: dilonga dia Bible mu dîku dikale tshishimikidi padibu ne bua kuibakila dîku diabu bua kuikaladi dikole mu nyuma. Bamfumu ba mêku ba bungi badi balonga ne bana babu batekete broshire mupiamupia wa: Udi mua kulua mulunda wa Nzambi. Kulonga broshire eu mushindu’eu nekuambuluishe bana bua kudiabu malanda mimpe ne Yehowa. Baledi, longeshayi bana mushindu wa kuela meji ku malu adi Nzambi musue. Lejayi nuenu bine ne: nudi bamunange ne nudi banange bienzedi biende. (Mus. 103:2) Enzayi malu pamue bua kudifundila ne kukumbaja malu a mu nyuma ne bua kudifila bikole mu mudimu unudi nukuatshila Yehowa.
3 Dîyi dia Nzambi didi ditutokeshila njila: Tuvua basanke bikole patuvua bapete mukanda mupiamupia wa mu Mfualansa wa La prophétie d’Isaïe, lumière pour tous les humains. Ukadi mubala mukanda eu too ne penyi? Mukanda wa Yeshaya udi udianjila kumanyisha dilumbuluisha didi dikuatshisha buôwa didi ditangila bisamba bidi kabiyi bitshina Nzambi; udi umanyisha kabidi malu malengele a Bukalenge adi Nzambi mulamine bantu bende. (Yesh. 34:2; 35:10) Udi kabidi ukolesha ditabuja ne utuambuluisha bua kueyemena Yehowa ne kuanyisha mishindu yende yonso idiye wenza malu.—Yesh. 12:2-5.
4 Paudi ubala mukanda eu, kubangila ku ntuadijilu kuawu, udi mua kumvua mushindu uvua Yeshaya mulame muoyo-mutoke wende kudi Yehowa nansha muvuaye munkatshi mua bantu babi. Yeshaya pakumvuaye Nzambi ukeba muntu udi mua kuya kumanyisha mukenji wende, wakandamuna ne: ‘Ke meme eu, untume meme!’ (Yesh. 6:8) Kuelangana meji bua muoyo wa budisuile uvua nawu Yeshaya nekutukankamije bua kutungunuka ne kuyisha lumu luimpe, kufila ne muoyo mujima “bumanyishi kudi matunga onso.”—Mat. 24:14, NW.
5 Tuetu bikale tuteya ntema ku midimu ya Yehowa, nebimutumbishe. Nunku, unange mudimu webe wa dikala muenji wa dîyi dia Nzambi!