“Benji ba dîyi” bena disanka
“Ne bupole-malu, nuanyishe dikunyibua dia dîyi munda muenu didi mua kupandisha anyima yenu. Kadi, nuvue benji ba dîyi, kanuikadi bateleji patupu.”—YAKOBO 1:21, 22, NW.
1. Mmunyi mudi mvese wetu wa tshidimu bua 1996 ne bua kuangatshibua?
“NUVUE BENJI BA DIYI.” Tshiambilu etshi tshipepele tshidi ne mukenji udi ne bukole. Ntshiangata mu “Mukanda wa Yakobo” mu Bible, ne netshilejibue mu Nzubu ya Bukalenge bu mvese wa tshidimu wa Bantemu ba Yehowa munkatshi mua 1996.
2, 3. Bua tshinyi bivua biakanyine se: Yakobo afunde mukanda udi ne dîna diende?
2 Yakobo, muanabu ne Mukalenge Yezu, uvua muntu muende lumu mu tshisumbu tshia kumpala tshia bena nkristo. Dimue edi kunyima kua dibishiibua ku lufu dia Yezu, Mukalenge wetu wakamuenekela yeye nkayende Yakobo ne pashishe kumuenekela bapostolo buonso. (1 Kolinto 15:7) Kunyima, pakapatudibua mupostolo Petelo mu buloko mu tshishima, wakambila kasumbu kavua kadisangisha ka bena nkristo ne: “Nuambile Yakobo ne bana betu ba mu K[ris]to malu â.” (Bienzedi 12:17) Mbimueneke se: Yakobo, nansha muvuaye yeye muine kayi mupostolo, wakalombola tshisangilu tshia kasumbu kaludiki ku Yeruzaleme pakangata bapostolo ne bakulu dipangadika dia se: kabivua bikengela bua Bampangano badi bakudimuna mutshima kutengudibuabu. Yakobo wakamba malu mu tshikoso, ne dipangadika edi dijadika kudi spiritu munsantu bakaditumina bisumbu bionso.—Bienzedi 15:1-29.
3 Kakuyi mpata, ngelelu wa meji mupie wa Yakobo uvua muakanyine dieyemena divule. Kadi, wakatonda ne budipuekeshi ne: yeye muine uvua anu ‘mupika wa Nzambi ne wa Mukalenge Yezu Kristo.’ (Yakobo 1:1, NW) Mukanda wende mufunda ku spiritu udi ne mibelu mivule mimpe ne makankamija bua bena nkristo lelu’eu. Difundibua diawu divua dijikijibue bidimu bu binayi kumpala kua dibunda dia kumpala dia bena Roma pa Yeruzaleme kudi jenerale Cestius Gallus, kunyima lumu luimpe luakamanyishibua mu bualabale “mu bifukibua bionso bidi muinshi mua diulu.” (Kolosai 1:23, NW) Bivua bikondo bikole, ne basadidi ba Yehowa bavua bamanye bimpe ne: dilumbuluisha Diende dikavua pa kukumbajibua pa ditunga dia bena Yuda.
4. Ntshinyi tshidi tshileja ne: bena nkristo ba kumpala bavua ne dieyemena dinene mu Dîyi dia Nzambi?
4 Bena nkristo aba bakavua ne Mifundu yonso ya tshiena-Ebelu ne mivule ya ku Mifundu ya tshiena-Greke. Anu bu mudibi bileja kudi ditela diabu divule dia mifundu ya kumpala, bafundi ba Bible bena nkristo bavua kakuyi mpata ne dieyemena dinene mu Dîyi dia Nzambi. Bia muomumue, tuetu lelu’eu tudi ne bua kulonga Dîyi dia Nzambi ne disuminyina ne kuditumikila mu nsombelu yetu. Bua kunanukila, tudi tukengela bukole bua mu nyuma ne dikima bidi Mifundu Minsantu ipetesha.—Musambu wa 119:97; 1 Timote 4:13.
5. Bua tshinyi tudi tukengela buludiki bua pa buabu lelu’eu, ne nkuepi kutuabupetela?
5 Lelu’eu bukua-bantu budi buenda busemena pabuipi ne “dikenga dinene, ditu kadiyi dianji kuenzeka katshia ku ntuadijilu wa bukua-bantu too ne mpindieu, tòo, kakuakuenzeka dia mushindu’au kabidi nansha.” (Matayo 24:21, NW) Lupandu luetu ndusuikakaja ku dipeta bulombodi bua Nzambi. Mmunyi mutudi mua kubupeta? Mpa kunzulula mitshima yetu ku malongesha a Dîyi dia Nzambi difundisha ku spiritu. Ebi nebitufikishe ku ‘divua benji ba dîyi,’ anu bu muvua basadidi balamatshi ku mikenji ba Yehowa mu bikondo bia kale. Tudi ne bua kubala ne kulonga Dîyi dia Nzambi ne disuminyina ne kutumika nadi bua kusamuna Yehowa.—2 Timote 2:15; 3:16, 17.
Dinanukila ne disanka
6. Bua tshinyi tudi ne bua kuikala ne disanka mu dipetangana ne mateta?
6 Ku mbuelelu kua mukanda wende, Yakobo udi utela disanka, dimuma dibiidi dia spiritu wa Nzambi. Udi ufunda ne: “Bana betu, nutangile bu disanka panudi mu mateta a mishindu yonso, nudi bamanye ne: bukole bua ditabuja dienu budi bulela dinanukila. Kadi, dinanukila didi padi dienda pamue ne ngenzelu mupuangane, bua nuikale bapuangane kanuyi kalema, kanuyi bashadile ku bualu nansha bumue.” (Yakobo 1:2-4, NW; Galatia 5:22, 23) Mmunyi mutudi mua kuamba se: bidi “disanka” bua kuikala mu mateta mavule? Ee, nansha Yezu wakamba mu Muyuki wende wa pa Mukuna se: “Nudi ba diakalenga padibo banupenda, banukengesha, banushiminyina malu mabi onso bualu buanyi. Nusanke, nusangale, bualu nenupete difutu dinene mu diulu.” (Matewuse 5:11, 12, MMM) Kudi disankishibua dia musangelu pa kumona dibenesha dia Yehowa pa madikolela etu eku tuenza muetu muonso batangile ku tshipatshila tshia muoyo wa kashidi.—Yone 17:3; 2 Timote 4:7, 8; Ebelu 11:8-10, 26, 35.
7. (a) Mmunyi mutudi mua kuambuluishibua bua kunanukila? (b) Anu bu Yobo mmunyi mutudi mua kufutshibua?
7 Yezu yeye muine wakananukila “bua disanka divuabo bamutekele kumpala.” (Ebelu 12:1, 2, NW) Pa kukenketa ne ntema tshilejilu tshia dikima tshia Yezu, tudi petu mua kunanukila! Anu bu mudi Yakobo wamba pabuipi ne ndekelu wa mukanda wende, Yehowa udi ubenesha bia bungi balami ba muoyo mutoke. “Monayi! tudi tuamba aba bakananukila ne: mba diakalenga,” ke mudi Yakobo wamba. “Nukadi bumvue bakula bua kunanukila kua Yobo ne nuakamona mushindu wakamuenzela Yehowa ku nshikidilu, ne nuakamona se: Yehowa mmuwule tente ne disuangana ne luse.” (Yakobo 5:11, NW) Vuluka mushindu uvua muoyo mutoke wa Yobo mufutshibue pakapetululaye makanda a mubidi ne nsombelu wa tshishiki, wa disanka ne banangibue bende. Dinanukila mu muoyo mutoke didi mua kukutuadila disanka dia muomumue mu Mparadizu mulaya wa bulongolodi bupiabupia bua Nzambi, bu nkomenu wa disanka dia kusadila Yehowa biangatshile ku mpindieu.
Dikeba meji
8. Mmunyi mutudi mua kupeta meji malelela, makuatshishi, ne ntshitupa kayi tshidi natshi masambila mu muand’eu?
8 Dilonga dietu dia Dîyi dia Nzambi ne disuminyina, pamue ne diditumikila mu nsombelu, nebipeteshe meji a Nzambi, adi atupetesha mushindu wa kunanukila mateta munkatshi mua dinyanguka dia ndongoluelu wa Satana eu udi wenda ufua. Mmunyi mutudi mua kuikala ne dishindika dia se: tudi mua kupeta meji a mushindu’eu? Yakobo udi utuambila ne: “Pikala umue wa kunudi kayi ne meji, atungunuke ne kualomba kudi Nzambi, bualu udi upesha buonso ne muoyo muimpe kayi utompuela; ne nebamupeshewu. Kadi, atungunuke ne kualomba ne ditabuja, kayi welakana, bualu, muntu udi welakana mmufuane mavuala a mbuu majula kudi tshipepele, aya eku ne eku.” (Yakobo 1:5, 6, NW) Tudi ne bua kusambila ne disuminyina, bikale ne dieyemena dikena ditenkakana dia se: Yehowa neateleje milombo yetu ne se: neayandamune mu tshikondo tshiende tshijadika ne mu mushindu wende yeye muine.
9. Mmunyi mudi Yakobo umvuija meji a Nzambi ne dikuatshisha diawu?
9 Meji a Nzambi ndipa dia kudi Yehowa. Pa kumvuija mapa a mushindu’eu, Yakobo udi wamba ne: “Dipa dilenga dionso ne tshintu tshipuangane tshionso bidi bifuma kuulu, bualu bidi bituluka bifumina kudi Tatu wa butoke bua mu diulu ne muende kamuena dishintuluka, nansha mundidimbi wa nkudimukilu.” Pashishe mu mukanda wende, Yakobo udi umvuija tshipeta tshia dipeta meji malelela padiye wamba ne: “Nnganyi udi muena meji ne bujinguludi munkatshi muenu? Aleje midimu yende ne bupole-malu bua meji ku nsombelu wende wa tshitembu. . . . Meji a kuulu adi diambedi manonoke, pashishe a ditalala, a butshintshikidi, madiakaje bua kutumikila, muule tente ne luse ne mamuma mimpe, kaena aleja matapulukangana a kansungasunga, kaena ne buena-mpala ibidi.”—Yakobo 1:17; 3:13-17, NW.
10. Mmunyi mudi ntendelelu ya dishima mishilangane ne mulelela?
10 Mu nsangilu wa pa buloba bujima wa ntendelelu ya dishima, mu Bukua-buena-nkristo peshi mu matunga makuabu, misangu mivule ntshilele bua batendeledi kuimba misambu, kumvua masambila mambulula, ne pamu’apa kuteleja muyuki kampanda. Dikankamija nansha dimue didi ditangila dimanyisha mukenji wa ditekemena ki ndifidibue, bualu ekleziya mivule kayena imona nkenke ya ditekemena bua matuku atshilualua. Ditekemena dia mpatshi dia Bukalenge bua Masiya bua Nzambi kabena baditela peshi ndiumvuibue bibi menemene. Yehowa udi wamba mu tshi-profete bua bena mu Bukua-buena-nkristo ne: “Bantu banyi bakuenza malu mabi abidi: bakundekela meme, mushimi wa mai a muoyo, bakudiumbuila mena a mai, mena mamane kû[p]uka mene, adi kâi mua kulama mai.” (Yelemiya 2:13) Kabena ne mâyi a bulelela. Meji a kuulu mmapangike [kudibu].
11, 12. (a) Mmunyi mudi meji a Nzambi ne bua kutusaka? (b) Meji a Nzambi adi atudimuija ku tshinyi?
11 Mmushindu kayipu udibi bishilangane munkatshi mua Bantemu ba Yehowa lelu’eu! Ne tshikandi tshia bukole tshibapetesha kudi Nzambi, badi buuja buloba ne lumu luimpe lua Bukalenge Buende butshilualua. Meji adibu bakula mmashindamene bikole pa Dîyi dia Nzambi. (Fuanyikija ne Nsumuinu 1:20; Yeshaya 40:29-31.) Bushuwa, badi batumika mu nsombelu yabu ne dimanya dilelela ne bujinguludi mu dimanyisha malongolola a mpatshi a Nzambi wetu ne Mutufuki. Dijinga dietu didi ne bua kuikala dia se: buonso mu tshisumbu ‘buwujibue ne dimanya dijalame dia disua [dia Nzambi] mu meji wonso ne dijingulula dia mu nyuma.’ (Kolosai 1:9, NW) Pa kuikala ne tshishimikidi etshi, bansonga ne bakulumpe nebikale misangu yonso basakibue bua ‘kuvua benji ba dîyi.’
12 “Meji a kuulu” adi atudimuija ku mpekatu idi mua kufikisha ku dipanga kuanyishibua kudi Nzambi. “Bana betu basuibue, numanye bimpe [ne]:” ke mudi Yakobo wamba. “Muntu yonso udi ne bua kuikala uteleja ne lukasa, ne lujoko ku diakula ne lujoko ku difika munda; bualu, tshiji tshia muntu katshiena tshikumbaja buakane bua Nzambi.” Eyowa, tudi ne bua kuikala tuteleja ne lukasa, ne ntema mibelu ya Nzambi ne kuyitumikila. Kadi, tudi ne bua kudilama ku ditumika bibi ne ‘katupa kakese ka mubidi [aka],’ ludimi. Ku diditambisha, mineku ikena ya meji, anyi ngakuilu wa tshitunu, ludimi ludi mu ngakuilu wa mu tshimfuanyi mua kuosha ‘ditu dinene’ ne kapia. Nunku tudi ne bua kudima bulenga ne didikanda mu malanda etu wonso.—Yakobo 1:19, 20; 3:5, NW.
13. Bua tshinyi bidi bia mushinga bua se tuanyishe “dikunyibua dia dîyi munda”?
13 “Nanku,” ke mudi Yakobo ufunda, “umushayi bukoya buonso, ne tshintu etshi tshidi tshienda tshivulangana: bubi, kadi, ne bupole-malu, nuanyishe dikunyibua dia dîyi munda muenu didi mua kupandisha anyima yenu.” (Yakobo 1:21, NW) Bulongolodi ebu bua lukuka, ne nsombelu wabu wa didileja, wa dinanga bintu bia ku mubidi, wa meme-diambedi pamue ne malu manyanguke, bukadi pa kupita. “Kadi udi wenza mudi disua dia Nzambi udi ushalaku tshiendelele.” (1 Yone 2:15-17) Nunku, mmushindu kayipu udibi bia mushinga bua tuetu kuanyisha “dikunyibua dia dîyi munda”! Meji mapetesha kudi Dîyi dia Nzambi mmashilangane bikole ne bubi bua bulongolodi ebu budi buenda bufua. Katuena basue nansha bumue bua ku bubi abu. (1 Petelo 2:1, 2) Bidi bikengela bua tuetu kuikala ne dinanga dia bulelela ne ditabuja dikole diela miji mu mitshima yetu, bua se: tumone mua kupangadija bua kubenga kusesuka nansha kakese ku njila ya buakane ya Yehowa. Kadi kuteleja Dîyi dia Nzambi patupu nkukumbane anyi?
Kuvua “benji ba Dîyi”
14. Mmunyi mutudi mua kuvua “bateleji” ne “benji” ba Dîyi?
14 Mu Yakobo 1:22 (NW), tudi tubala ne: “Nuvue benji ba dîyi, kanuikadi bateleji patupu, nudidinga nkayenu ne mmuenenu ya dishima.” “Nuvue benji ba dîyi”! Tshiena-bualu etshi ntshizangikibue bulelela mu mukanda wa Yakobo. Tudi ne bua kuteleja, pashishe “kuenza anu nanku”! (Genese 6:22, NW) Bantu bavule lelu’eu badi bamba ne: mbikumbanyine bua kuteleja muyuki kampanda anyi kuditua mu ntendelelu wa tshidingishilu wa ku mpukapuka, kadi badi bashiikila anu pine apu. Badi pamu’apa mua kuela meji ne: bu mudibu ne ‘nsombelu muimpe’ udi mu diumvuangana ne mêyi-makulu abu, abi mbikumbanyine. Pabi Yezu Kristo wakamba ne: “Biasua muntu kundonda, adipidie ne atuale mutshi wende wa tshinyongopelu ne andonde tshiendelele.” (Matayo 16:24, NW) Bienzedi bia didipua muoyo ne dinanukila mu dilonda tshitembelu tshia Yezu tshia dienza disua dia Nzambi mbilombibue patoke bua bena nkristo balelela. Buabu buobu, disua dia Nzambi lelu’eu didi dia muomumue ne muvuadi mu siekele wa kumpala pakatuma Yezu mubiisha ku lufu dîyi ne: “Nunku, ndayi ne nuvuije bantu ba mu matunga wonso bayidi.” (Matayo 28:19, NW) Ntshinyi tshiudi wenza pa bualu ebu?
15. (a) Ntshifuanyikijilu kayi tshidi Yakobo ufila, tshidi tshileja mushindu utudi mua kuvua bena disanka bu “benji ba dîyi”? (b) Bua tshinyi ntendelelu wa tshidingishilu patupu kêna mukumbanyine?
15 Bituatungunuka ne kutangila mu Dîyi dia Nzambi, didi mua kuikala bu lumuenu pa kutuleja menemene mushindu wa bantu utudi. Yakobo udi wamba ne: “Eu udi uditangila mu mukenji mupuangane wa budikadidi, ne udi unanukilamu, muntu awu neikale wa diakalenga pa kuutumikila, bualu kêna muteleji udi upua muoyo, kadi muenji wa mudimu, neikale muena disanka mu diwenza.” (Yakobo 1:23-25, NW) Eyowa, neavue ‘muenji wa dîyi’ muena disanka. Kupita apu, bidi bia mushinga bua kuvua ‘muenji’ mu kanungu kuonso ka nsombelu wetu wa Buena-nkristo. Katudidingi tuetu bine mu diela meji ne: ntendelelu wa tshidingishilu patupu mmukumbane. Yakobo udi utubela bua kutumikila amue malu a ntendelelu mulelela adi nansha bena nkristo bena mitalu mua kuikala pamu’apa balengulule. Udi ufunda ne: “Ntendelelu udi mukezuke ne kayi katoba ku mêsu kua Nzambi ne Tatu, ng’eu: kuambuluisha bana ba nshiya ne bakaji bakamba mu makenga abo ne kudilama kakuyi katoba ka mu bulongolodi ebu.”—Yakobo 1:27, NW.
16. Mmu mishindu kayi muakalua Abrahama “mulunda wa Yehowa,” ne mmunyi mutudi petu mua kulua balunda Bende?
16 Ki mbikumbanyine bua kuamba anu ne: ‘Ndi ne ditabuja kudi Nzambi,’ ne kushiikila anu’apu. Anu bu mudi Yakobo 2:19 uleja: ‘Udi witabuja ne, Nzambi udi umue; udi wenza bimpe; bademon badi bitabuja kabidi, badi bazakala.’ Yakobo udi uzangika ne: “ditabu[j]a kabidi, bikaladi kadî ne kuenza, didi didifuila,” ne udi utela Abrahama pa kuamba ne: ‘Ditabuja diende diakenza mudimu popamue ne kuenza kuende: ne ditabuja diende diakavuijibua diakane tshishiki ku kuenza kuende.’ (Yakobo 2:17, 20-22) Midimu ya Abrahama yakakonga dikumbaja majinga a dîku diende, dileja diakidila benyi, didilongolola bua kufila Izake bu mulambu, ne ‘dimanyisha patoke’ ditabuja dikena ditenkakana mu dilaya dia Nzambi dia “tshimenga tshidi ne bishimikidi bilelela,” Bukalenge butshilualua bua Masiya. (Genese 14:16; 18:1-5; 22:1-18; Ebelu 11:8-10, 13, 14; 13:2, NW) Mu mushindu muakanyine, Abrahama “wakalua kubikidibua ‘mulunda wa Yehowa.’” (Yakobo 2:23, NW) Tuetu petu tudi mua kubadibua bu ‘balunda ba Yehowa’ bituamanyisha ne mitalu yonso ditabuja dietu ne ditekemena mu Bukalenge buende butshilualua bua buakane.
17. (a) Bua tshinyi Rahabe ‘wakabadibua bu muakane,’ ne mmunyi muakafutshibuaye? (b) N’liste mule kayi wa aba ‘bakavua benji ba dîyi’ udi Bible ufila? (c) Mmunyi muakafutshibua Yobo, ne mbua tshinyi?
17 Aba badi ‘bavua benji ba dîyi’ badi bushuwa “babadibua bu bakane ku midimu, ne ki nku ditabuja patupu to.” (Yakobo 2:24, NW) Rahabe ùvua eu wakasakidila midimu ku ditabuja diende mu “dîyi” diakumvuaye pa bidi bitangila bienzedi bia bukole bia Yehowa. Wakasokoka batentekedi bena Izalele ne kubambuluisha bua kupanduka, ne pashishe kusangisha bena mu nzubu wa tatuende bua dibapandisha. Mu dibishiibua ku lufu, mmushindu kayipu wikalaye ne disanka bua kumanya se: ditabuja diende, disakidila ku midimu, diakamufikisha ku dikala nkambua-mukaji wa Masiya! (Yoshua 2:11; 6:25; Matayo 1:5) Ebelu nshapita wa 11 udi ufila liste wa bakuabu ‘bakavua benji’ mu dileja ditabuja diabu, ne nebabeneshibue bia bungi. Katupu kabidi Yobo muoyo, eu wakamba dîba dia mateta makole ne: “dina dia Yehowa ditumbishibue.” Anu bu mutukadi bamane kubimona, ditabuja diende ne midimu yende biakamupetesha difutu dia mpatshi. (Yobo 1:21; 31:6; 42:10; Yakobo 5:11) Bia muomumue, dinanukila dietu lelu’eu bu “benji ba dîyi” nedituale mimuemue ya dianyisha dia Yehowa.
18, 19. Mmunyi mudi bana betu bavua bakengeshibue bua musangu mule ‘bavue benji ba dîyi,’ ne ndibenesha kayi didi mudimu wabu mupete?
18 Munkatshi mua badi bananukile bikole mu kupita kua bidimu mudi bana betu ba ku Mputu wa ku Est. Mpindieu bu mukadibu bumbushe makandika mavule, bulelela mbavue “benji ba dîyi” mu nsombelu wabu mupiamupia. Ba-misionere ne ba-mpanda-njila bafumine ku matunga mena mutumba mbayemu bua kuambuluisha mu mudimu wa dilongesha, ne dilongolola. Filiale wa Finlande ne filiale mikuabu ya pabuipi ya Société Watch Tower mmitume biibaki bapiluke, ne buena-muntu bua kalolo pa buloba bujima mbufile mfranga bua kukuatshisha mudimu wa diibaka dia biro bipiabipia bia filiale ne Nzubu ya Bukalenge.—Fuanyikija ne 2 Kolinto 8:14, 15.
19 Mmushindu kayipu udi bana betu aba bàvuà bakengeshibue musangu mule bandamune ne mitalu mu budimi! Badi ‘benza mudimu mukole ne baditshinta’ bua kukumbaja, mu ngakuilu wa mu tshimfuanyi, pa tuaba tuvua katuyiku mu kupita kua “tshikondo tshisaluke.” (1 Timote 4:10; 2 Timote 4:2, NW) Tshilejilu, mu ngondo wa Tshisanga mushale mu Albanie, mùvuà dikandikibua dia tshikisu tshikole, trakte yonso ya Ngumu ya Bukalenge yakamutumabu idi ne tshiena-bualu tshia “Bua tshinyi muoyo mmuwule ne ntatu nunku?” yakabanyibua mu matuku asatu patupu. Ebi bivua tshipeta tshiakalonda Tshivulukilu tshia lufu lua Yezu, muvua bantu 3 491 babuele—bungi bupite bua bamanyishi babu 538 ba mitalu.
20. Ntshinyi tshidi bungi bua babuedi ba mu Tshivulukilu bua matuku adi panshi aa buleja, ne mmunyi mudi bavule mua kuambuluishibua?
20 Amue matunga pawu adi ne tshiawu tshitupa tshinene mu bungi bua babuedi ba mu Tshivulukilu, budi buvule mu matuku adi panshi aa pa kupita 10 000 000. Mu miaba mivule bantu bapiabapia, ditabuja diabu dikolesha ku dibuela ne disekelela Tshivulukilu, badi ‘benda bavua benji ba dîyi.’ Tudiku mua kukankamija balunda bapiabapia ba bulelela bua kukumbaja malu malomba bua muabi’au anyi?
21. Mu diumvuangana ne mvese wetu wa tshidimu, ntshinyi tshitudi ne bua kutungunuka ne kuenza, ne tshipatshila kayi?
21 Anu bu bena nkristo ba mitalu mu siekele wa kumpala, ne bavulavulayi katshia ku tshikondo atshi, tupangadijayi bua kuenza muetu muonso mu ‘lubilu luetu batangile ku tshipatshila’ tshia muoyo wa kashidi, mu Bukalenge bua mu diulu anyi mu tshitupa tshiabu tshia pa buloba. (Filipoi 3:12-14, NW) Madikolela etu wonso mmakanyine bua kukumbaja tshipatshila atshi. Etshi ki ntshikondo tshia dipingana tshianyima pa kuikala bateleji tshianana, kadi ntshikondo tshidi tshikengela kupita bionso bua ‘kuikala ne bukole ne kutumika.’ (Hagai 2:4; Ebelu 6:11, 12) Bu mutudi ‘banyishe dikunyibua dia dîyi munda,’ nunku ‘tuvuayi benji bena disanka ba dîyi’ mpindieu ne tshiendelele.
Mmunyi muwandamuna?
◻ Mmunyi mutudi mua kunanukila ne disanka?
◻ “Meji a kuulu” ntshinyi, ne mmunyi mutudi mua kutungunuka ne kualonda?
◻ Bua tshinyi tudi ne bua ‘kuvua benji ba dîyi, ne katuyi bateleji patupu’?
◻ N’luapolo kayi idi ne bua kutusaka bua kuvua “benji ba dîyi”?
[Tshimfuanyi mu dibeji 17]
Tunzuluilayi petu dilongesha dia Nzambi mitshima yetu
[Tshimfuanyi mu dibeji 18]
Muoyo mutoke wa Yobo wakafutshibua ne dipetulula diende dia nsombelu wa tshishiki, wa disanka ne banangibue bende