Nansha mu mateta, lamata ku ditabuja diebe!

‘Bana betu, nububale bu disanka dionso panuapona mu mateta a mishindu ya bungi.’​—YAKOBO 1:2.

1. Bantu ba Yehowa badi bamusadila ne ditabuja ne “disanka mu mutshima” nansha mudiku nsombelu kayi?

BANTU ba Yehowa badi basadila bu Bantemu bende ne ditabuja kudiye ne “disanka mu mutshima.” (Dutelonome 28:47; Yeshaya 43:10) Badi benza nenku nansha mudibu banyunguluka kudi mateta mavule. Nansha mudiku ntatu, badi bapeta busambi mu mêyi aa: ‘Bana betu, nububale bu disanka dionso panuapona mu mateta a mishindu ya bungi; bualu bua nudi bamanye ne: diteta dia ditabuja dienu didi dienzeja ditantamana.’​—Yakobo 1:2, 3.

2. Ntshinyi tshitudi bamanye bua mufundi wa mukanda wa Yakobo?

² Tshiambilu atshi tshivua tshifunda bu mu 62 B.B. kudi muyidi Yakobo, muanabu ne Yezu Kristo. (Mâko 6:3) Yakobo uvua mukulu mu tshisumbu tshia mu Yeruzaleme. Bushuwa, yeye, Kefa, (Petelo), ne Yone ‘bakadi bu makunji’​—mpanda mikole ne mishindika bikole ya mu tshisumbu. (Galatia 2:9) Pakaluabu ne tshilumbu tshia ditengula kumpala kua “bapostolo ne bakulu” bu mu 49 B.B., Yakobo wakafila lungenyi luimpe lushindamene pa Mifundu luvuabu banyishe kudi kasumbu kaludiki ka mu siekele wa kumpala.​—Bienzedi 15:6-29.

3. Ng’amue malu kayi avua nawu bena nkristo ba mu siekele wa kumpala, ne mmunyi mutudi mua kupetela dikuatshisha ditambe bunene ku mukanda wa Yakobo?

³ Bu muvuaye mulami wa mu nyuma muena ditabalela, Yakobo ‘uvua mumanye mudi [“mmuenekelu,” NW] wa bisumbu bia mikoko.’ (Nsumuinu 27:23) Wakajingulula ne: bena nkristo bavua mu mateta makole tshikondo atshi. Ngelelu wa meji wa bamue bena nkristo uvua ulomba dimuakaja, bualu bavua basungulula babanji. Bua ndambu mukuabu, ntendelelu uvua bu tshidingishilu tshia patupu. Bamue bavua benzelangana bibi ne ndimi yabu mipange bukalanga. Lungenyi lua mu bulongolodi ebu luvua ne bipeta bibi, ne bavule kabavua nansha ne lutulu peshi badifile mu masambila. Bushuwa, disama dia mu nyuma divua dikuate bamue bena nkristo. Mukanda wa Yakobo udi wakula bua malu aa mu mushindu udi wibaka, ne mibelu yende idi ne dikuatshisha lelu’eu anu muvuayi nadi mu siekele wa kumpala B.B. Netupete dikuatshisha dinene bituangata mukanda eu bu mutufundila tuetu nsungasunga.a

Patudi tupeta mateta

4. Mmunyi mutudi ne bua kuangata mateta?

⁴ Yakobo udi utuleja mushindu wa kuangata mateta. (Yakobo 1:1-4) Kayi uleja malanda ende a mu dîku pankatshi pende ne Muana wa Nzambi, ne budipuekeshi buonso udi udibikila ne: ‘mupika wa Nzambi ne wa Mukalenge Yezu Kristo.’ Yakobo udi ufundila ‘bisamba dikumi ne bibidi’ bia Izalele wa mu nyuma bidi “bitangalake,” (NW) tshia kumpalampala bua dikengeshibua. (Bienzedi 8:1; 11:19; Galatia 6:16; 1 Petelo 1:1) Mutudi bena nkristo, badi batukengesha tuetu petu, ne tudi ‘tupona mu mateta a mishindu ya bungi.’ Kadi bituavuluka ne: mateta matantamena adi akolesha ditabuja dietu, ‘netuabale bu disanka dionso’ padiwu atutulukila. Bitualama muoyo-mutoke wetu kumpala kua Nzambi mu mateta, bualu ebu nebututuadile disanka dia kashidi.

5. Mateta etu adi mua kukonga binganyi, ne ntshinyi tshidi tshienzeka patudi tuatantamena bimpe?

⁵ Mateta etu adi akonga makenga atu akuata bantu bonso. Tshilejilu, masama adi mua kututatshisha. Mpindieu Nzambi kêna wenza luondapu lua bishima, kadi udi wandamuna ku masambila etu bua kupeta meji ne muoyo mukole bidi bikengedibua bua kumona mua kupita ne masama. (Musambu 41:1-3) Tudi kabidi tukenga bua buakane bu Bantemu ba Yehowa bakengesha. (2 Timote 3:12; 1 Petelo 3:14) Patudi tutantamena bimpe mateta a nunku, ditabuja dietu nditetshibue, didi dilua dia “ngikadilu muteta.” (NW) Ne padi ditabuja dietu ditshimuna, ebi ‘bidi [“bipatula,” NW] ditantamana.’ Ditabuja dikolesha kudi mateta nedituambuluishe bua kutantamena makuabu atshilualua.

6. Mmunyi mudi “ditantamana dikale ne mudimu wadi muimpe tshishiki,” ne mbidia kayi bikuatshishi bitudi mua kuela patudi mu diteta?

⁶ Yakobo udi wamba ne: “Ditantamana dikale ne mudimu wadi muimpe tshishiki.” Bitualekela diteta ditungunuka ne luendu luadi katuyi tukeba bua kudijikija lukasa ku diambuluisha dia ngenzelu mibengangane ne Mifundu, ditantamana nedienze “mudimu” wa kutuvuija bena nkristo ba tshishiki, katuyi bapangile ditabuja. Bushuwa, bikala diteta disokolola butekete kampanda, tudi ne bua kukeba diambuluisha dia Yehowa bua kubutshimuna. Netuambe tshinyi bu diteta mua kuikala buteyi bua kuditua mu tshiendenda tshia masandi? Tusambilayi bua bualu abu ne pashishe tuenze malu mumvuangane ne masambila etu. Bidi mua kutulomba bua kushintulula muaba wetu wa mudimu anyi kuela bidia bikuabu bua kulama muoyo-mutoke kumpala kua Nzambi.​—Genese 39:7-9; 1 Kolinto 10:13.

Kulomba meji

7. Mmunyi mutudi mua kupeta diambuluisha bua kutantamena mateta?

⁷ Yakobo udi utuleja tshia kuenza bituikala katuyi bamanye mua kupita ne diteta kampanda. (Yakobe 1:5-8, MMM) Yehowa kakututobolola bua dipanga dia meji ne dialomba ne ditabuja. Neatuambuluishe bua kuangata diteta ne mmuenenu muakanyine ne kuditantamena. Badi mua kutuvuluija Mifundu kudi bena kuitabuja netu anyi mu dilonga dia Bible. Malu maludika ku bulombodi bua Nzambi adi mua kutupesha mushindu wa kumona tshitudi ne bua kuenza. Spiritu wa Nzambi udi mua kutulombola. (Luka 11:13) Bua kupeta dikuatshisha bu edi, mu mishindu yonso tudi ne bua kulamata bikole kudi Nzambi ne kudi bantu bende.​—Nsumuinu 18:1.

8. Bua tshinyi muelakanyi kakupeta tshintu nansha tshimue kudi Yehowa?

⁸ Yehowa udi utupesha meji bua kutantamena mateta ‘bitualomba ne ditaba, katuyi tuelakana.’ Muelakanyi “mmufuane mavuala a mbu adibo bajula kudi tshipepele, aya eku ne eku” mu mushindu kauyi kudianjila kumanya. Bituikala tutenkakana mu nyuma, ‘katuena ne bua kutekemena nansha tshintu kayi kudi [“Yehowa,” NW].’ Katuikadi ‘bena mioyo ibidi’ ne ‘bakudimuki mu etu malu onso,’ mu masambila nansha mu minga mishindu. Kadi, tuikale ne ditabuja kudi Yehowa, Mpokolo wa meji.​—Nsumuinu 3:5, 6.

Babanji ne bapele badi mua kusanka

9. Bua tshinyi tudi ne kabingila ka kusanka bu batendeledi ba Yehowa?

⁹ Nansha bupele buikale dimue dia ku mateta etu, tuvulukayi ne: bena nkristo babanji ne bapele badi mua kusanka. (Yakobo 1:9-11) Kumpala kua kulua balondi ba Yezu, bena nkristo bela manyi ba bungi bavua ne bintu bikese bia ku mubidi ne bavua babapepeja kudi bantu. (1 Kolinto 1:26) Kadi bavua mua kusanka bua “dibandishibua” diabu ku muanzu wabu wa bapianyi ba Bukalenge. (Lomo 8:16, 17) Kabiyi nanku, bantu babanji bavuabu batumbishe kumpala badi ‘bapuekeshibua’ bu balondi ba Kristo bualu bantu badi babapepeja. (Yone 7:47-52; 12:42, 43) Kadi, bu mutudi basadidi ba Yehowa, buonso buetu tudi mua kusanka bualu bubanji bua pa buloba ne milongo ya mu nsombelu mutumbuke kabiena ne mushinga patudi tubifuanyikija ne mabanji a mu nyuma atudi nawu. Ne ndianyisha kayipu ditudi nadi bua mudi lutambishi lua milongo ya mu nsombelu kaluyi ne muaba munkatshi muetu!​—Nsumuinu 10:22; Bienzedi 10:34, 35.

10. Mmunyi mudi muena nkristo ne bua kuangata bubanji bua ku mubidi?

¹⁰ Yakobo udi utuambuluisha bua kumona se: muoyo wetu kawena musuikila ku bubanji ne malu makumbaja mu bulongolodi ebu. Anu mudi bulengele bua tshilongo kabuyi mua kutshiepula ku difubidila mu ‘luya lukole,’ nenku bubanji bua muntu kabuena mua kulepesha muoyo wende. (Musambu 49:6-9; Matayo 6:27) Udi mua kufua pende mutshikale munkatshi mua dipatshila ‘njila yende,’ pamu’apa mu bungenda. Pa nanku, tshintu tshia mushinga ntshia kuikala ‘mubanji ku mêsu kua Nzambi’ ne tshia kuenza tshionso tshitudi mua kuenza bua kulubuluja bipatshila bia Bukalenge.​—Luka 12:13-21; Matayo 6:33; 1 Timote 6:17-19.

Ba disanka mbadi batantamena mateta

11. Mmatekemena kayi adiku bua aba badi balamata ku ditabuja diabu mu mateta?

¹¹ Nansha tuetu bikale babanji peshi bapele, tudi mua kuikala ne disanka anu bituikala tutantamena mateta etu. (Yakobo 1:12-15) Bituatantamena mateta ne ditabuja dietu dijima, badi mua kutubala bu bena disanka, bualu kudi disanka mu dienza tshidi tshiakane ku mêsu kua Nzambi. Mu dilamata ku ditabuja diabu too ne ku lufu, bena nkristo balela ku spiritu badi bapeta “tshifulu tshia butumbi tshia muoyo,” dibenga kufua mu diulu. (Buakabuluibua 2:10; 1 Kolinto 15:50) Bituikala ne ditekemena dia muoyo pa buloba ne bitualama ditabuja dietu kudi Nzambi, tudi mua kutekemena muoyo wa tshiendelele mu mparadizu pa buloba. (Luka 23:43; Lomo 6:23) Mbuimpe kayipu budi Yehowa muikale nabu kudi bonso badi baleja ditabuja kudiye!

12. Patudi mu lutatu, bua tshinyi katuena ne bua kuamba ne: “Ndi muteyibue kudi Nzambi”?

¹² Yehowa nkayende udiku mua kututeta ne ntatu anyi? Tòo, katuena ne bua kuamba ne: “Ndi muteyibue kudi Nzambi.” Yehowa kêna uteta bua kutufikisha ku dienza mpekatu, kadi mmushindike ne: neatuambuluishe ne neatupeshe bukole budi bukengedibua bua kutantamena mateta bituashala bashindame mu ditabuja. (Filipoi 4:13) Nzambi mmunsantu, nenku kêna ututeka mu nsombelu idi mua kutekesha bukole buetu bua dikandamena malu mabi. Bituadibueja mu nsombelu kampanda mupange bukezuke ne bituenza mpekatu kansanga, katuena ne bua kumubanda, ‘bualu bua Nzambi kêna mumanye mua kuteyibua ne malu mabi, ne yeye muine kêna uteya muntu.’ Nansha mudi Yehowa mua kulekela bua diteta kutunyokadi bua diakalenga dietu, kêna ututeta ne meji mabi nansha. (Ebelu 12:7-11) Satana udi mua kututeta bua kuenza bubi, kadi Nzambi udi mua kutupikula kudi muena bubi au.​—Matayo 6:13.

13. Ntshinyi tshidi mua kuenzeka bituabenga kumbusha dijinga dibi?

¹³ Tudi ne bua kudifila mu masambila bualu nsombelu kampanda udi mua kujudija dijinga dibi didi mua kutufikisha ku mpekatu. Yakobo udi wamba ne: ‘Muntu yonso udi uteyibua kudi lukuka luende pamukokalu ne pamulobeshalu.’ Katuena ne bua kubanda Nzambi bua mpekatu wetu bituikala balekele dijinga dia mpekatu disombe mu mutshima wetu. Bituikala katuyi tumbusha dijinga dibi, ‘didi dimita,’ didi dikolela mu mutshima, ne ‘didi dilela [“mpekatu,” NW].’ Padi mpekatu ukola, udi ‘ulela lufu.’ Bushuwa, tudi ne bua kukuba mitshima yetu ne kukandamena meji matuma ku mpekatu. (Nsumuinu 4:23) Kayina uvua mudimuija ne: mpekatu uvua pabuipi ne kumutshimuna, kadi kakamukandamena. (Genese 4:4-8) Bua nenku, tuambe tshinyi bituatuadija kulonda njila kampanda mubengangane ne Mifundu? Bushuwa tudi ne bua kuikala ne dianyisha biateta bakulu bena nkristo bua kutuludika bua katumonyi mua kuenzela Nzambi mpekatu.​—Galatia 6:1.

Nzambi​—Mpokolo wa bintu bimpe

14. Mmu ngumvuilu kayi mutudi mua kuamba ne: mapa a kudi Nzambi ‘mmakane tshishiki’?

¹⁴ Tudi ne bua kuvuluka ne: Yehowa udi Mpokolo, ki ng’wa mateta, kadi wa bintu bimpe. (Yakobo 1:16-18) Yakobo udi ubikila bena kuitabuja nende ne: “bana betu bananga” ne udi uleja ne: Nzambi udi Mufidi wa ‘kupa kuonso kuimpe ne dipa dionso diakane tshishiki.’ Mapa a Yehowa a mu nyuma ne a ku mubidi ‘mmakane tshishiki,’ anyi makumbane, ki mmapangile tshintu. Adi afuma “muulu,” (NW) muaba udi Nzambi musombele mu diulu. (1 Bakelenge 8:39) Yehowa udi “Tatu wa [“bukenke bua muulu,” NW]”​—dîba, ngondo, ne mitoto. Udi kabidi utupesha butoke bua mu nyuma ne bulelela. (Musambu 43:3; Yelemiya 31:35; 2 Kolinto 4:6) Mushilangane ne dîba ditu dishintuluisha mindidimbi padidi dienda, ne ditu dijalame anu mundamunya jajaja, Nzambi yeye udi misangu yonso mu ndunguluku muende bua kufila bintu bidi bimpe. Bushuwa neatupeshe bidi bikengedibua bua kutantamena mateta bituapetela dikuatshisha dia tshishiki ku ndongoluelu yende ya mu nyuma mifila ku butuangaji bua Dîyi diende ne bua “mupika wa lulamatu ne wa budimu.”​—Matayo 24:45, NW.

15. Ntshinyi tshidi dimue dia ku mapa matambe bulenga a Yehowa?

¹⁵ Ntshinyi tshidi tshikale dimue dia ku mapa matambe bulenga a Nzambi? Ndilela dia bana ba mu nyuma ku diambuluisha dia spiritu munsantu, badi benza mudimu udi utangila lumu luimpe, anyi ‘dîyi dia bulelela.’ Aba badi baledibua mu nyuma badi ‘mamuma makuabu a kumudilu,’ basungula munkatshi mua bantu bua kuikalabu ‘bukalenge ne bakuidi’ mu diulu. (Buakabuluibua 5:10; Efeso 1:13, 14) Yakobo uvua mua kuikala wela meji ku mamuma a kumudilu a orje mafila mu dia 16 Nizan, divua dituku diakabiishibua Yezu, ne ku difila dia mampa abidi a bukula bua blé dituku dia Pentekoste, divua spiritu munsantu muitshikija. (Lewitiki 23:4-11, 15-17) Mu muanda au, Yezu uvua mamuma a kumudilu ne bapianyi nende bindondi ‘mamuma a kumudilu makuabu.’ Netuambe tshinyi bituikala ne ditekemena dia muoyo pa buloba? Ee, kulama mu lungenyi ditekemena dietu edi nekutuambuluishe bua kulamata ku ditabuja dietu kudi Mufidi wa ‘kupa kuonso kuimpe,’ eu udi muvuije muoyo wa tshiendelele mu bukokeshi bua Bukalenge bualu buikale mua kuenzeka.

Wikala ‘muenji wa Dîyi’

16. Bua tshinyi tudi ne bua kuikala ‘ne lukasa ku diteleja kadi ne lujoko ku diakula ne ku difika munda’?

¹⁶ Nansha tuetu bikale tupeta mateta a ditabuja dietu kubangila ku mpindieu anyi katuyi tuapeta, tudi ne bua kuikala ‘benji ba dîyi.’ (Yakobe 1:19-25, MMM) Tudi ne bua kuikala “ne lukasa ku diteleja” dîyi dia Nzambi, kuikala badienji bena butumike. (Yone 8:47) Ku lukuabu luseke, tuikalayi “ne lujoko mu diakula,” pa kuikala ne ntema ku bitudi tuamba. (Nsumuinu 15:28; 16:23) Yakobo udi mua kuikala utulomba bua katuikadi ne lukasa ku diamba ne: mateta etu adi afumina kudi Nzambi. Mbatubele kabidi bua kuikala “ne lujoko . . . ku difika munda. Bualu bua tshiji tshia muntu katshiena tshilela buakane bua [“Nzambi,” NW].” Bikala mêyi a muntu kampanda matufiikishe munda, ‘tutukijayi’ bua kuepuka diandamuna dibi. (Efeso 4:26, 27) Bumfiika munda budi mua kutukebela bilumbu ne kulua diteta kudi bakuabu kabuena mua kupatula tshidi ditabuja kudi Nzambi wetu wa buakane ditulomba. Kabidi, bituikala ne “lungenyi lule,” netuikale “ne lujoko . . . ku difika munda,” ne bana betu balume ne bakaji nebakokibue kutudi.​—Nsumuinu 14:29.

17. Diumbusha bubi mu mutshima ne mu lungenyi didi dikumbaja tshinyi?

¹⁷ Bidi bitukengela bushuwa kumbusha “bukoya buonso”​—tshintu tshionso tshidi tshiendesha Nzambi ku muoyo ne tshimujula tshiji. Kusakidila apu, tudi ne bua ‘kubenga bubi bukuabu buonso.’ Buonso buetu tudi ne bua kumbusha mu nsombelu yetu dipanga bukezuke dia ku mubidi ne mu lungenyi. (2 Kolinto 7:1; 1 Petelo 1:14-16; 1 Yone 1:9) Diumbusha dia bubi mu mutshima ne mu lungenyi diakatuambuluisha bua “kuakidila ne [“bupuekele dikunyibua dia dîyi dia,” NW] bulelela.” (Bienzedi 17:11, 12) Nansha tuetu bikale bena nkristo kukadi bidimu bia bungi, tudi ne bua kutungunuka ne kuanyisha bua bakune bulelela buvule bua mu Mifundu munda muetu. Bua tshinyi? Bualu ku diambuluisha dia spiritu wa Nzambi, dîyi dikuna didi dipatula “bumuntu bupiabupia” budi bufika ku lupandu.​—Efeso 4:20-24, NW.

18. Mmunyi mudi muntu udi muteleji wa dîyi patupu ushilangana ne eu udi kabidi mudienji?

¹⁸ Mmunyi mutudi tuleja ne: dîyi didi mulombodi wetu? Pa kuikala bena butumike “benji ba dîyi, ne ki mbaditeleji patupu.” (NW) (Luka 11:28) “Benji” badi ne ditabuja didi dipatula bienzedi bu mudi didifila ne lukunukunu mu mudimu wa bena nkristo ne difila mandamuna mu bisangilu bia bantu ba Nzambi pa tshibidilu. (Lomo 10:14, 15; Ebelu 10:24, 25) Muteleji patupu wa dîyi “mmufuanangane ne muntu udi uditangila mu lumuenu, umona mudiye.” Udi udimona, pashishe udi uya ne upua muoyo tshidi mua kuikala tshikengedibua bua kulongolola mmuenekelu wende. Bu mutudi ‘bakumbaji ba dîyi,’ ne ntema yonso tudi tulonga ne tutumikila ‘[“mikenji,” NW] mipuangane’ ya Nzambi, idi itangila tshintu tshionso tshidiye utulomba. Nenku budikadidi butudi nabu mbushilangane bikole ne bupika bua mpekatu ne lufu, bualu budi bufikisha ku muoyo. Nenku ‘tutangilayi ne ntema [“mikenji,” NW] mipuangane,’ pa kuyikonkonona misangu yonso ne kuyitumikila. Ne anji kuela meji! Bu mutudi ‘bakumbaji ba dîyi, ki mbaditeleji bena tshipua muoyo,’ tudi ne disanka didi difumina ku dianyishibua kudi Nzambi.​—Musambu 19:7-11.

Bivule kupita dikala batendeledi ba tshidingishilu

19, 20. (a) Bilondeshile Yakobo 1:26, 27, ntshinyi tshidi ntendelelu mukezuke utulomba? (b) Mbimue bilejilu kayi bia ntendelelu udi kayi munyanguke?

¹⁹ Bituikala basue kuanyishibua kudi Nzambi, bidi bikengela tuvuluke ne: ntendelelu mulelela ki ntshidingishilu tshia patupu nansha. (Yakobo 1:26, 27, NW) Tudi mua kuela meji ne: tudi ‘batendeledi badingidiji’ banyishibue kudi Yehowa, kadi mmuenenu wende bua yonso wa kutudi ke udi bushuwa ne bualu. (1 Kolinto 4:4) Tshilema tshinene tshidi mua kuikala dipangila mua ‘kukokesha ludimi.’ Tudi mua kuikala tudidinga bituikala tuela meji ne: ntendelelu wetu udi usankisha Nzambi bituashiminyina bakuabu malu, tudinga, anyi tutumika bibi ne ndimi yetu mu mishindu mikuabu. (Lewitiki 19:16; Efeso 4:25) Bushuwa, katuena basue bua “mushindu wa ntendelelu” wetu wikala “wa patupu” ne kauyi muanyishibue kudi Nzambi bua kabingila kayi konso.

²⁰ Nansha mudi Yakobo kayi utela kanungu konso ka ntendelelu mukezuke, udi wamba ne: ntendelelu eu udi umvuija ‘ditabalela bana ba nshiya ne bakaji bakamba mu dikenga diabu.’ (Galatia 2:10; 6:10; 1 Yone 3:18) Tshisumbu tshia bena nkristo tshidi tshileja diditatshisha dia pa buadi mu dikumbaja majinga a bakamba. (Bienzedi 6:1-6; 1 Timote 5:8-10) Bu mudi Nzambi muikale Mukubi wa bakaji bakamba ne wa bana ba nshiya, tueleshanganayi Nende diboko pa kuenza tshitudi mua kuenza bua kubambuluisha mu nyuma ne ku mubidi. (Dutelonome 10:17, 18) Ntendelelu mukezuke udi kabidi umvuija ‘kudilama kakuyi katoba ka mu bulongolodi ebu,’ nsangilu wa bantu mupange buakane udi ku bukokeshi bua Satana. (Yone 17:16; 1 Yone 5:19) Pa nanku tushalayi batapuluke ku bienzedi bia bulongolodi ebu bupetudi bua Nzambi bua tumone mua kutumbisha Yehowa ne kuikala ne mushinga mu mudimu wende.​—2 Timote 2:20-22.

21. Mu diumvuangana ne mukanda wa Yakobo, nnkonko kayi mikuabu idi miakanyine tuyikonkonone?

²¹ Mibelu ya Yakobo itudi bamone too ne mpindieu idi ne bua kutuambuluisha bua kutantamena mateta ne kulamata ku ditabuja dietu. Idi ne bua kukolesha dianyisha dietu bua Mufidi wa mapa mimpe muena dinanga. Ne mêyi a Yakobo adi atuambuluisha bua kulonda ntendelelu mukezuke. Ntshinyi tshikuabu tshidiye utuambila? Mbidia kayi bikuabu bitudi mua kuela bua kujadika ne: tudi ne ditabuja dilelela kudi Yehowa?

[Mêyi adi kuinshi]

Newandamune munyi?

◻ Ntshinyi tshiatuambuluisha bua kutantamena mateta?

◻ Bua tshinyi bena nkristo badi mua kusanka nansha mudiku mateta?

◻ Mmunyi mutudi mua kuikala benji ba dîyi?

◻ Ntendelelu mukezuke udi umvuija tshinyi?

[Tshimfuanyi mu dibeji 9]

Paudi mu diteta, leja ditabuja mu bukole bua Yehowa bua diandamuna ku masambila

[Bimfuanyi mu dibeji 10]

“Benji ba dîyi” badi bamanyisha Bukalenge bua Nzambi pa buloba bujima