Tangila! Nzubu wa Bukalenge mu Niue
NIUE ntshidiila tshikese tshia mabue a busanga ku Pasifike wa ku Sud, kilometre 2 160 ku Nord-Est wa Nouvelle-Zélande. Bilondeshile broshire kampanda wa malu a ngendu, dîna dia Niue ndifumine ku miaku ibidi, Niu, mbuena kuamba ne: “mutshi wa koko,” ne e, mbuena kuamba ne: “bandila,” anyi “tangila.” Broshire eu udi wamba ne: “Mianu ya bantu idi yamba ne: bena Polynésie ba kumpala bakasapu bakamba mêyi aa kunyima kua difika diabu pakamonabu mitshi ya koko ivua ikola mu buloba abu.”
Lelu’eu, Bantemu ba Yehowa mu Niue badi mua kuditambisha pa kuambila bakumbudi ne: “E! Fale he Kautu ha mautolu!” mbuena kuamba ne: “Tangila! Nzubu wetu wa Bukalenge!” Bua tshinyi badi bumvua nyanji miondoke ya mushindu’eu pa bidi bitangila nzubu eu? Bantemu ba Yehowa mu miaba yonso badi mua kuditambisha bua Nzubu yabu ya Bukalenge, nangananga padibu buobu nkayabu bayibaki. Kadi kuibaka Nzubu wa Bukalenge pa tshidiila kampanda tshia kule kule ku Sud munkatshi mua mbuu munenanenayi wa Pasifike mmuanda mukuabu mene. Bulelela, Niue udi amu ne bualabale bua kilometre karé 260, ne mu tshidiila tshijima mudi amu bantu 2 300.
Kuvua lukonko lua kumanya eu uvua mua kuibaka Nzubu wa Bukalenge. Tshisumbu anu tshimue tshia ku Niue tshidi amu ne Bantemu 32. Biamu binene bionso bidi bikengedibua bua mudimu, bu mudi tuminyo, tutumba, ne biambudi bia majitu, mbia mbulamatadi. Kupita’apu, bintu bikuabu bionso bia luibaku—biamu, beton, bia kuasa nabi musaka, nshinga ya nzembu ne milonda ya mâyi, biamu bia mêyi, ne nkuasa—bivua ne bua kutuadibua ku mazuwa kumbukila ku Nouvelle-Zélande kudi bena mudimu kampanda wa diambula bintu badi batumika anu musangu umue mu mbingu itanu. Ne kabidi, buloba bua mabue bua tshidiila etshi buvua mua kuvuija mudimu wa luibaku mukole, ne nzubu uvua ne bua kuibakibua bua kàlù kuupuka palua mpepele mikole ya luya. Bushuwa, mmudimu wa dikema bua muntu kayi yonso!
Kadi, kuvua dishilangana dinene muab’eu. Bua Bantemu ba Yehowa, Nzubu wa Bukalenge mmuaba wa mushinga bua ntendelelu mulelela mu ditunga, ne badi bakeba bulombodi ne diambuluisha kudi Yehowa Nzambi. (Musambu wa 56:11; 127:1) Bana betu bena nkristo mu Nouvelle-Zélande, pamue ne bena mu tshisumbu tshia bena Niue ku Auckland, bakalua kuambuluisha kasumbu kakese ka Bantemu mu Niue, pa kubapetesha dikuatshisha dienza ne muoyo mujima bua programe eu wa luibaku.
Dipangadika bua kutuadija
Mu Kabalashipu 1994 ku muaba wa diibakila Nzubu wa Bukalenge mu Rotorua, Nouvelle-Zélande, dibikila diakenjibua bua aba bavua mua kusua kudifila mu mudimu wa ku Niue. Bualu bua dikema, bana betu bena nkristo 200, balume ne bakaji bakadifila ku budisuile. Ku buonso aba, bakasungula bantu 80, pa kukonga bena mudimu wa mabaya, baakaji ba biamu bikole bia luibaku, balongolodi ba milonda ya mâyi, benji ba misaka, bametshi, balabi ba mukubu, bena mudimu wa nzembu, balongolodi ba biamu bia mêyi, benji ba beton, batutshi ba madioto, ne benji ba midimu mikuabu.
Bana betu aba bakanji kuzola plan wa nzubu, ne kuyabu kumpala, ne dieyemena Yehowa. Umue wa ku bakulu babidi ba tshisumbu tshia ku Niue, ngenda-mushinga muena ditunga, wakatuadija kuenza malongolola bua kuambuisha bintu bionso bivua bikengedibua ku mazuwa. Diumvuangana pa mushinga wa pa buawu bua luendu lua ku ndeke ne muaba wa kutudila dikavua dienjibue bua bena mudimu benyi, bavua banyishe ku budisuile bua kudifutshila nkayabu njila, ne bakavua bamanyishe matuku a luibaku. Programe wa diibaka uvua ne bua kujika mu matuku 20, kutuadija mu dia 4 Luabanya too ne mu dia 23 Luabanya 1995, pavuabu ne bua kubanjija Nzubu wa Bukalenge.
“Ngakumvua bua musangu wa kumpala buôwa bukole pangakamona muaba [wa luibaku],” ke muakamba mulombodi wa mudimu eu, uvua mufumine ku Nouvelle-Zélande lumingu lumue kumpala bua kulongolola bintu. “Buloba buonso budi dibue. Nebikengele mbingu ibidi amu bua kumbula bina bia tshishimikidi tshia nzubu.” Kadi kavua mumanye bimpe bukole bua Bantemu bena ditunga, ke muakitabaye pashishe. “Bana betu bena Niue mbamanye bimpe mabue aa,” ke muakambaye. “Mbamanye muaba wa kututshila dibue bua se: dikosolokangane mu bitupa bikese.” Bakajikija diumbula biina bia tshishimikidi tshia nzubu mu matuku abidi!
Mu dia 4 Luabanya kasumbu ka kumpala kambula ku ndeke ka Bantemu ba ku Nouvelle-Zélande kakafika, ne mudimu wa beton wakenjibua. Pavua tusumbu tulondangane tua bena mudimu tufika, bitupa bishilashilangane bia mudimu bivua bienda bijikijibua. Matuku a mudimu avua atuadija mu dinda pa dîba dia 7 ne dikonkonona dikese dia mvese wa mu Bible bua dituku dionso. Bamue bana betu bavua batumika mêba 12 ku dituku mu luya lupite pa degré 36. Ndekelu wa bionso, mu dia 23 Luabanya, malaba wonso akavua malandakaja. Tshimanyinu tshidi tshikoka ntema tshienza pa mutshi wa mangaya tshivua tshifunkuna nzubu muibaka eu bu “Nzubu wa Bukalenge wa Bantemu ba Yehowa.”
Mmuenenu wa dieleshangana diboko ne wa diakidila benyi
Bualu bua mushinga budi buambuluishe bua kulubuluja mudimu eu buvua dieleshangana diboko dia bantu ba ku Niue. Bena musoko ba muab’eu, ne milowo pa kumona mmuenenu wa bana betu, bakafila mapa a biakudia ne mfranga. Bavule bavua bangata diibaka dia nzubu bu mudimu wabu. Banene ba mbulamatadi ne bangenda-mushinga bakambuluisha ne midimu yakapita ne kule bivua bitekemenyibue. Biamu bia mudimu bìvuà bikengedibua biakapetshibua, ne ditanda dia mudimu wa mabaya kabidi. Kumpanyi wa diambula bintu ku mazuwa wakafika too ne ku dituma tshiakabidi mazuwa ende bua kujadika se: bintu bia mudimu bivua bikengedibua bivua ne bua kufika pa dîba dikumbane.
Bakumbudi bakanyisha bushuwa mudimu mukole ne diakidila benyi dia Bantemu bena Niue, bakapeshangana nzubu ne bintu biabu. “Bana betu ba bakaji ba muab’eu bavua ba kuanyina,” ke muakamba muena mudimu umue wa diibaka. Kusakidila ku biakudia bia midi bia kapia dituku dionso, bana betu ba bakaji bavua bateka pa mêsa biakudia bia mu dinda lunkelu luonso pa dîba 6:30. Bamue bavua babiika pa dîba 4:30 patshiatshia bua kulamba biakudia. Muena mudimu wa diibaka umue wakamba ne: “Ndi ngela meji ne: tudi bapete nsombelu mulenga muab’eu mu Niue kupita mutudi ku metu.”
Mu dia 10 Luabanya tshikandakanda tshia Niue Star tshiakamanyisha muanda eu mu tshiena-bualu tshia pa dibeji dia kumpala tshivua ne mutu wa bualu eu: “Nzubu wa Bukalenge wa kumpala mu Niue” ne foto wa bena Nouvelle-Zélande ne bena Niue batumika ku muaba wa luibaku. Tshiakalonda ne: nzubu eu udi ne bualabale bua metre karé 280 ne miaba ya kusombela bua bantu pankatshi pa 70 ne 100. Tshiena-bualu etshi tshiakasakidila ne: “Mudimu eu bushuwa udi mua kujikijibua mu [mbingu] ibidi, kadi mu nsombelu eu nebawalabaje. Mu tshitupa tshikadiwu etshi, amu matuku abidi kunyima kua mudimu mumane kutuadija, tshishimikidi, makunji, mikamba ne musaka bikadi bienjibue, kumpala kua dîba difundibue.”
Ngenda-mushinga kampanda wa mu tshidiila etshi wakasua bua se: Tshidiila tshijima tshia Niue tshitangile mudimu eu ne tshilongeleku. Wakamba ne uvua utekemena se: bivua ne bua kuleja muntu yonso tshidi mua kuenjibua padiku dinanga ne dieleshangana diboko.
Musumba wa bantu 204 wakalua ku dibanjija. Bualu buakatamba kulenga ku muoyo bua bateleji buonso buvua dinaya dia pa buadi muvua bana betu ba balume, ba bakaji, ne bana bena Niue, baleje mu musambu ne dija maja diibaka dia Nzubu eu wa Bukalenge. Bakela kasumbu ka biibaki tuasakidila, ne kabidi Yehowa, muena spiritu úvuá musake bieledi bia lungenyi, mioyo, ne bianza bua kukumbaja mudimu eu.—Yeshaya 40:28-31.