“Ndi ne mushinga mukole kudi Yehowa!”

MU “BIKONDO [ebi] bikole mua kupita nabi,” basadidi bavule ba Yehowa ba lulamatu badi bananukila diluangana misangu yonso ne nyanji ya didiumvua kabayi ne mushinga. (2 Timote 3:1, NW) Ebi kabiena bikemesha, bualu tshimue tshia ku “bienzedi bia budimu” bia Satana ntshia kuenza bua tuetu kudiumvua ne: katuena banangibue, nansha kudi Mutufuki! (Note kuinshi kua Efeso 6:11, NW) Mu mushindu muakanyine, nimero wa Tshibumba tshia Nsentedi tshia mu dia 1 Tshisanga 1995 uvua ne biena-bualu bibidi bia dilonga mu tshisumbu bifunda ne: “Udi ne mushinga mukole ku mêsu a Nzambi!” ne “Kusakangana ku dinanga ne ku midimu milenga​—Mmunyi?” Biena-bualu ebi bivua bilongolodibue bua kutuvuluija ne: Yehowa udi wangata madikolela etu ne mushinga. Bidi bilonda ebi ng’imue nseka mienza bua kuleja dianyisha ituvua bapete:

“Mu bidimu bianyi 27 bu Ntemu wa Yehowa katshia tshibejibeji kampanda ki ntshianji kuikala ne buenzeji mushindu’eu kundi. Tshivua mua kudikanda bua kudila​—biena-bualu ebi biakantuadila disulakana dinene. Ndi ndiumvua mpindieu munangibue bikole kudi Yehowa. Mbienze amu bu bangumbushe bujitu bunene pa makaya.”​—C. H.

“Ngakabala tshibejibeji etshi misangu inayi mu dituku dimue. Meme kusanka mushindu uvua tshiena-bualu tshiambe ne: bavua bakulongeshe dishima biwitabuja ne: kuena ne mushinga. Nenkuate mudimu ne tshiena-bualu etshi mu mudimu wa bulami ne mu buambi bua ku tshiibi ne ku tshiibi.”​—M. P.

“Satana mmuenze mudimu wa dikema pa kuenza bua se: nansha aba badi banange Yehowa badiumvue kabayi ne mushinga ne kabayi banangibue. Divuluijibua kudi kasumbu ka ‘mupika wa lulamatu’ ne: Yehowa mmutunange bikole ne udi wangata ne mushinga malu wonso makese atudi tuenza buende mbumue bua ku malu adi atamba kukankamija andi mubale. Munkatshi mua bidimu bivule mvua ne nyanji inudi bakule bualu buayi mu biena-bualu ebi. Tshivua ndiumvua muakanyine dinanga dia Yehowa nansha kakese, nunku mvua ngenza madikolela bua kuenza bipitshidile mu mudimu wende bu mushindu wa kupeta dinanga adi. Kadi mvua musonsodibue kudi dipiila ne bundu. Nunku nansha mpitshisha bungi kayi bua mêba mu mudimu, anyi ngambuluisha bantu bungi kayi, mvua ngumvua ne: kabivua bikumbane. Mvua mmona amu dipanga munda muanyi. Mpindieu pandi nsadila Yehowa bua dinanga, ndi ngela meji ne: udi ufukisha mimuemue ne udituta pa tshiadi bualu buanyi. Ebi mbienze bua dinanga dianyi buende yeye didiunde bikole ne mbienze bua meme kusua kuenza bipitshidile. Mpindieu ndi mpetela disanka dinene ku mudimu wanyi bua Yehowa.”​—R. M.

“Ebi bidi bushuwa menemene biena-bualu bitambe buimpe, bidi bitamba kuibaka, eyowa, bia pa buabi bua kulenga mitshima yetu bindi katshia tshiyi muanji kubala! Ndi mubale Tshibumba tshia Nsentedi munkatshi mua bidimu 55, ne kuvua nimero mivule ya tshikuma. Kadi nimero eu mmupite tshintu tshikuabu tshionso tshitudi katshia katuyi bapete bua kutuyisha dielakana, buôwa, ne ditshina bietu bia se: ‘katuena ne mushinga’ ne ‘katuena banangibue’ ne katuena mua kuenza bivule nansha kakese bua ‘kupeta’ dinanga dia Yehowa. Tshibumba tshia Nsentedi etshi tshidi ne mushindu wa diambuluisha dia mu nyuma didi bana betu bakengela ne dijinga dikole. Ndi musue kutumika ne biena-bualu ebi misangu ne misangu pandi ngenza mudimu wa bulami.”​—F. K.

“Bua aba ba kutudi badi baluangana ne dipanga kudiangata ne mushinga, anyi mene ne nyanji ya didipepeja, bidi mua kutamba kutukolela bua kusangisha pamue makanda etu bua kutungunuka mu bulelela. Tshiena-bualu etshi tshivua tshileje nyanji miondoke ya diditeka pa muaba wa bakuabu ne dibumvuila, tshivua anu bu dilabibua dia manyi adi ajikija kusama, wondapa, ku mutshima. Mmunyipu mudibi bikankamija pa kubala mêyi a mushindu’eu mu Tshibumba tshia Nsentedi ne pa kumanya kabiyi mpata ne: Yehowa udi bushuwa umvua! Tuasakidilayi bua dituvuluija ne: Yehowa kêna uteta bua kusonsola bantu bende ku diambuluisha dia dipiila, bundu, anyi buôwa. Nansha mudi didifila dianyi mu mudimu wa buambi dilue kukepela bikole matuku adi panshi aa bua ntatu ya mfranga ne masama mu dîku dietu, ndi amu mpeta disankishibua mu tshindi mukumbane mua kuenza. Ndi mumone se: ndi ne disanka dia bungi mu mudimu pandi ngenza madikolela bua kuvuija dinanga bukole budi bunsaka.”​—D. M.

“Ndi mfuma ku dijikija dibala ‘Udi ne mushinga mukole ku mêsu a Nzambi!’ Tshikoso tshionso ntshimpuekeshishe binsonji ku mêsu. Ndi mufumine mu dîku divua dileja dinanga amu dikese. Mvua mpuekeshibua, mpendibua ne nsekibua. Nunku, ku buana buanyi mvua ndiumvua tshiyi ne mushinga. Ntshidi amu ne nyanji miela miji ya ku kale idi inkengesha bikole pandi mpetangana ne diakabi. Pangakalekela kusadila bu mukulu wa tshisumbu, ngakumvua amu bu dipangila bu pa tshibidilu​—kudi Nzambi, dîku dianyi, ne bana betu mu tshisumbu. Nyanji eyi kayitu ijika lukasa, kadi tshiena-bualu etshi tshidi tshifika pa dîba ntshingambuluishe bua kupetulula ndambu wa nkatshinkatshi. Ntshikenkeshe mmuenenu wanyi.”​—D. L.

“Tuasakidilayi bua tshiena-bualu tshia ‘Udi ne mushinga mukole ku mêsu a Nzambi!’ Mvua nduangana ne didikina dikole ne nyanji miondoke ya dipanga kuikala ne mushinga, bidi ne miji yabi mu diangatshibua ku bukole ku buana. Bidi kabiyi mpata bikumbanyine bua kuangata ngelelu eu mubi wa meji bu tshienzedi tshia budimu tshia Satana nkayende. Bidi nansha mua kukepesha dijinga dia muntu dia kuikala ne muoyo. Ndi bushuwa ne bua kuenza madikolela dituku dionso bua kukandamena dishima dia se: tshiena mua kunangibua. Tshiena-bualu tshidi tshiumvuija bia bungi kundi kupita pamu’apa munudi mua kumanya.”​—C. F.

“Lelu’eu bana betu badi nangananga bandamuna bilenga ku meji a se: Yehowa udi wangata ne mushinga bienzedi bietu bisonsola kudi dinanga pamutu pa dibambidika anyi difinakaja. Dikonkonona dia musangelu wa Yehowa ne bumuntu buende bua disuangana, diditatshisha diende bua muntu ne muntu wa mu tshisamba tshiende, ne mushindu wa dinanga udiye udienzeja yeye muine didi dikankamija ne disaka. Bua bualu ebu, diakamue patuakapeta tshiena-bualu tshia ‘Udi ne mushinga mukole ku mêsu a Nzambi!’ bavule bakaleja dianyisha. Ntshimueneke bu tshidi tshiunzuluile bavule njila bua kudiundisha bipitshidile malanda abu ne Yehowa. Mukajanyi ne meme tudi tujinga kuleja dianyisha bua mfundilu ne diditeka pa muaba wa bakuabu bileja mu bibejibeji bia Tshibumba tshia Nsentedi bia matuku adi panshi aa. Tudi tuenza madikolela bua kutumikila malu a bungi aa patudi tukumbula bisumbu.”​—Kudi mutangidi muena ngendu.

“Ndi mubadi wa lulamatu munkatshi mua bidimu pamue ne 30, kadi katshia tshiena muanji kubala bualu kampanda budi busaka nunku, budi buibaka nunku. Mifundu ya bukole, mitumika nayi mu mushindu muimpe mmingambuluishe bua kutuula mashimi wonso masokome mu nyanji yanyi meme muine, pa kumpetesha mushindu wa kusemena pabuipi ne Yehowa. Munkatshi mua bidimu bivule mvua nsadila Yehowa bua dipiila. Mvua amu ne ngumvuilu wa mu buongo wa tshia-bupikudi ne wa dinanga dia Nzambi. Tuasakidilayi bua biena-bualu bia busunguluji ne bia meji bia mushindu’eu. Ndi mutekemene bua kubala bivule bifuanangane nabi.”​—M. S.

“Mu bidimu bianyi 29 bionso bia dikala mu bulelela, tshiena mua kuvuluka tshikondo tshivua tshiena-bualu kampanda tshimpeteshe diandamuna bu nunku dia dianyisha ne dia nyanji miondoke munda muanyi. Nansha mungakakoleshibua ne dinanga dinene ne kudi dîku dikubianganyi, tshitu nansha musangu umue mudiumvue muakanyine bua kuikala ne muoyo, anyi mene muakanyine bua kusadila Yehowa. Kunyima kua tshiena-bualu etshi, ngakatua binu, ne dishikunkila dikole meme kuela Yehowa tuasakidila. Nendame tshiena-bualu etshi mu lungenyi bua kashidi. Nendiangate nkayanyi mushindu mushilangane bualu mpindieu ngapetshi dijingulula dia se: ndi ne mushinga mukole kudi Yehowa.”​—D. B.