Bia mudimu bidi bitulongesha, bitusaka ku ditumikila ne bitupesha bukole
1 Bidi ne bukole bua kulongesha bantu malu a Bible ne makuabu adi atangila Bantemu ba Yehowa. Mbisake bantu ba bungi bua kulamata bulelela ne muoyo umue. Mbikoleshe ditabuja ne dianyisha dia bantu badi badilambule kudi Nzambi. Mbinganyi abi? Tudi tuakula bua filme ya video idi bulongolodi bua Yehowa bupatule. Ukadiku mubandile yonso dikumi eyi ikadibu bapatule anyi? Kukadi matuku bungi kayi katshia wayibandila? Utu ukuata nayi mudimu mu buambi anyi? Mu mpungilu wa distrike, bavua bamanyishe dipatuka dia filme wa video wa 11 udi ne tshiena-bualu ne: Nsangilu wa bana betu bonso ba buloba bujima (Angl.). Ukadi mumulombeshe anyi? Mmunyi mudi bia mudimu bilenga ebi mua kukuambuluisha menemene?
2 Tshiena-bualu tshia: “Ikalayi nulonga Dîyi dia Nzambi mu dîku,” tshia mu Tshibumba tshia Nsentedi tshia dia 1 Kashipu 1999, tshivua tshitulomba bua “kudilamina ndambu wa dîba ditutu tulonga mu dîku bua kutangila tshitupa tshia bande wa video . . . wa Société ne pashishe kuyukilanganapu.” Bilondeshile mubelu eu muimpe, netuikale tuakula bua filme ne filme wa video ku ngondo yonso mu Tshisangilu tshia Mudimu. Tudi tukankamija muntu yonso wa mu tshisumbu bua adianjile kumona filme kampanda wa video kumbelu bangabanga ne kumukonkononabu mu Tshisangilu tshia Mudimu.
3 Ngondo eu tudi tutuadija ne filme wa video wa kumpala utuvua bapatule udi wamba ne: Les Témoins de Jéhovah—Un nom, une organisation. Ubandila filme eu ne lubatshi bua umanye mua kuandamuna nkonko eyi:
▪ Nku tshinganyi kudi Bantemu ba Yehowa batambe kumanyikila?
▪ Malu onso adibu benza ku Betele adi umvuangana ne mvese kayi?
▪ Ntshindidimbi kayi tshidi tshiangatshila mu Bible tshiuvua mumone balongolola, bakuata foto ne bazola bua kutshipatula mu mikanda yetu?
▪ Ntshinyi tshidi tshikukemesha bua mushindu udibu balongolola mikanda yetu?
▪ Kubangila mu 1920 too ne mu 1990, mmikanda bungi kayi idi Société mupatule?
▪ Munkatshi mua bantu ba Nzambi, mbanganyi nangananga badi mua kukumbana bua kuenza mudimu ku Betele?—Nsu. 20:29.
▪ Mmalu kayi adi bena dîku dia Betele benza bu tshilejilu tshimpe tshidi Bantemu ba Yehowa bonso mua kuidikija?
▪ Ntshinyi tshidi tshikukemesha paudi umona mudimu udibu benza ku Betele bua bantu ba bungi kupetabu mushindu wa kumvua lumu luimpe?
▪ Nkuepi kudi mfranga idi ikuatshisha mudimu wa pa buloba bujima ifumina?
▪ Mmudimu kayi utudi mua kukuata ne lukunukunu, ne netuwenze ne lungenyi kayi?—Yone 4:35; Bien. 1:8.
▪ Udi umvuaku bishi bua tshidi bulongolodi buetu tuetu Bantemu ba Yehowa?
▪ Mmunyi muudi mua kukuata mudimu ne filme wa video eu mu buambi?
Mu Tshisua-munene netuakule bua filme wa video wa: La Bible: un récit historique exact, des prophéties dignes de foi.