Udi mujingulule tshidiye umvuija anyi?

¹ Mudimu wa Bukalenge udi wenda udiunda lukasa pa buloba bujima. (Yesh. 60:22) Anu bu kale, Société mmumanye mudibi bikengela kushindamena pa ngikadilu wa mu nyuma wa bulongolodi buetu bua teokrasi ne kuleja patoke dishilangana didi pankatshi pa midimu yetu ne ya Babulona Munene. Ke bua tshinyi kubangila mu dia 1 dia ngondo wa kumpala tshidimu etshi, bamanyishi ne bantu bonso batu banyisha mikanda ya Société badi bayipeta kakuyi dibalomba makuta bungi kampanda to. Ngenzelu eu udi ushindika menemene mutudi tueyemena spiritu wa Yehowa. Bana betu ba bungi mbafundile Société mikanda baleja dianyisha diabu bua ngenzelu mupiamupia eu. Tudi tumona mpindieu mumanyishi yonso, too ne bana badi bamanye kubala bikale muntu ne muntu ne tshiende tshibejibeji dîba dia dilonga dia Tshibumba tshia Nsentedi.

² Ku lukuabu luseke, tudi bapete ngumu idi ileja ne: bamue bamanyishi ki mbumvue meneneme mudi ngenzelu mupepeja eu ushintulula mushindu utuvua tuyisha kumpala to. Kabena nansha bumvuija tshidi tshikuatshisha mudimu wetu to. Tshiabu tshidibu bamba tshidi amu ne: tudi tufila bibejibeji bietu ‘tshianana’; bakuabu badi bapesha bantu mikanda yonso idibu bakeba kabayi nansha batangila bikalabu nayi dijinga menemene to. Nunku, patudi tukonkonona malu manene a mushindu mupepeja eu wa kuabanya mikanda yetu, mbimpe tudikonke ne: ‘Tudiku bajingulule tshidi ngenzelu eu umvuija anyi?’​—Luka 24:45.

³ Tudi basue bua mikanda yetu ikumbaje tshipatshila tshiayi: kuambuluisha bantu bua bamanye bimpe malu malenga adi Yehowa mulongolole. Kufila mikanda tshifilafila kudi bantu badi kabayi banyisha malu a mu nyuma nkuyinyanga. (Eb. 12:16) Pakadiisha Yezu bantu batue ku 10 000 ne mampa atanu ne mishipa mikese ibidi, wakalongesha bualu butudi mua kutumikila patudi tufila biakudia bia mu nyuma ku diambuluisha dia mikanda yetu. Musangu au, Yezu wakaleja ne: biakudia bivua bia kupesha bantu ‘bavua nabi dijinga,’ ne se: ‘tshintu nansha tshimue katshivua ne bua kujimina’ to. (Yone 6:11, 12) Bia muomumue, mikanda yetu katuena ne bua kuyipesha bantu badi kabayi bamanye mushinga wayi anyi bikala kabayi mua kuyibala to.​—Tangila Matayo 7:6.

⁴ Mmushindu kayi utudi ne bua kufila mikanda mu buambi? Bua mikanda itudi tuabanya kukumbajayi tshipatshila tshiayi, bidi bikengela tumanye aba badi basankidila bulelela ne mutshima wabu wonso. Mmunyi mutudi mua kumanya ne: muntu kampanda udi wanyisha bulelela? Padi muntu witaba bua kuyikila netu. Padiye uteya ntema ku biudi umuambila, muikale wandamuna ku nkonko ne uleja mmuenenu wende. Padiye wakula nebe ne kanemu, bu udi wakula ne muinende. Padiye ukulonda dîba diudi ubala Bible. Patudi tumona bimanyinu ebi bidi bileja mudi muntu usankidila bulelela, tudi mua kuamba ne: pamu’apa neabale mikanda yonso ituamushila. Nunku, mumanyishi udi ne bua kuikala ne busunguluji bua bungi bua kujadika bikala muntu kampanda muakanyine bua kumupesha mukanda anyi peshi udi usanka anu patupu bua kupeta tshintu kayi mutshitudile makuta. Muntu udi mua kupeta mukanda anyi kupanga kuupeta bilondeshile dijinga dilelela didiye muleje anyi kayi muleje bua mukenji wa Bukalenge.

⁵ Pa tshibidilu, tudi ne bua kumvuija mudi mapa adi bantu bafila ku budisuile akuatshisha mudimu wetu patudi tushiila bantu badi basankidila bulelela mikanda bua musangu wa kumpala. Tuetu bashale balame mu lungenyi ne: mikanda yetu nya kushiya anu kudi bantu badi bajinga bua kumanya bivule ne badi bajinga bua kuyibala, netulonde dîyi edi. Pamu’apa bantu ba bungi badi basankidila bulelela nebadipangadijile bua kufila mapa ku budisuile misangu yalonda ituaya kubatangila. Bakuabu badi mua kukonka ne: ‘Udi ne mushinga kayi?’ Tudi mua kubambila mu tshikoso ne: mudimu wetu ki ng’wa bungenda to, kadi tudi tufila mikanda yetu kudi bantu badi bajinga bua kuyibala kakuyi dibafutshisha mfranga. Tudi mua kubambila ne: muntu yonso udi musue kukuatshisha mudimu eu udi mua kufila dipa dikese ku budisuile. Ku musangu ne ku mukuabu, padibi bimueneka bikumbanyine, tudi mua kujula tshilumbu tshia dikuatshisha mudimu wa Bantemu ba Yehowa pikala muntu eu utudi tukumbula kayi ne tshibidilu tshia kufila mapa.

⁶ Mumanyishi yonso udi ne bua kuikala ne amvelope wa kuela mapa adi bantu bafila aa. Pashishe dituku dia tshisangilu tshidi pabuipi, udi ne bua kuela dipa dionso kayi umbusha dikuta nansha dimue mu kashete kalongolola bua mapa a nunku mu Nzubu wa Bukalenge bua kukuatshisha mudimu wa pa buloba bujima wa Bantemu ba Yehowa. Ki mbiakanyine bua mumanyishi anyi mpanda-njila kutulaye mfranga eyi bua bualu bukuabu nansha. Padi muntu utudi bapetangane nende mu buambi ufila dipa, mmutekemene muende muonso bua se: dipa adi nedifike bua kukuatshisha mudimu wa pa buloba bujima udi bantu ba Yehowa benza. Mbimpe kuambila bantu ne: mapa onso atudi tupeta mu buambi anyi adibu bela mu tushete tufunda ne: “Mapa bua mudimu wa pa buloba bujima wa Bantemu ba Yehowa​—Matayo 24:14,” tudi tuangata bua kukuatshisha nawu mudimu wa dilongesha Bible, bualu bonso badi benza mudimu eu badi bawenza ku budisuile, ne muntu nansha umue kêna upeta difutu anyi makasa bua mudimu wende to.

⁷ Bushuwa, bituangata mikanda buetu tuetu, katupu muoyo bua se: tudi petu ne dibanza dia kufila mapa bua kukuatshisha mudimu eu. Tudi batekemene se: spiritu wa Nzambi neasake basadidi bende ne bantu badi basankidila bulelela bua kufila mapa ku budisuile bua kukumbaja makuta matula bua mudimu wetu wonso mujima.

⁸ Mmunyi mudi muntu yonso wa kutudi ne bua kuangata ngenzelu mupiamupia eu? Mu bikondo bikole ebi, Yehowa udi wenda ulombola bantu bende, ubapesha meji adi afuma mu diulu adibu nawu dijinga bua kumona mua kuendesha lukasa mudimu wa diyisha munkatshi mua mateyi a bungi adi Satana wela. (Mus. 32:8; Yesh. 30:21) Ku bulombodi bua Mfumu wetu ne Mupandishi wetu Yezu Kristo, tudi babuele mu mparadizu wa mu nyuma mutudi mpindieu tuenzela mudimu munsantu wa kumanyisha lumu luimpe. Tudi ne disanka bualu tudi mu bulongolodi budi spiritu wa Yehowa ulombola.​—Mus. 34:8.

⁹ Ngenzelu eu udi wambuluisha muntu yonso bua kuenza bualu kampanda ne kutangila ne muoyo umue bua kufila kende kantu bua kukumbaja pa makuta matula kudi bulongolodi bua Yehowa. Mpindieu, yonso wa kutudi udi ne bujitu bunene ne diakalenga dia kutumbisha Yehowa ne bintu biende bia mushinga. (Nsu. 3:9) Mushindu utudi tutumikila buludiki bua nyuma wa Yehowa patudi tufila mapa etu udi uleja mutudi bamanye menemene se: Yehowa udi utuangata bu bantu ba kueyemena.​—1 Kol. 4:1, 2.