Baledi, longeshayi bana bibidilu bimpe

¹ Muntu katu uledibua ne bibidilu bimpe, katu ubipeta mu mpukapuka to. Kulongesha bana mua kuikala ne bibidilu bilenga kutu mene kuangata dîba. “Kulongesha” muaba eu kudi kumvuija “kubueja munda kakese ku kakese” anyi “kubueja dimata ku dimata.” Nenku baledi badi ne bua kusuminyina ne dilongesha bua bamone mua ‘[kukolesha] bana bimpe ne dibela ne didimuja bia Mukalenge.’​—Ef. 6:4.

² Tuadijayi nabu anu ku buana: Bana batekete batu ne meji a dikema a kukuata ne kuenza malu mapiamapia. Nansha mutu bantu bakulumpe bamona kulonga muakulu mupiamupia kuikale kukole, bana badi kabayi banji kubuela mu kalasa buobu badi mua kulonga miakulu ibidi anyi isatu musangu umue. Kuedi meji ne: muanebe kêna mua kupeta bikadilu bilenga bualu utshidi mutekete nansha. Padi baledi batuadija kulongesha muana Bible anu utshidi mutekete menemene kabayi bimanyika dilongesha edi, muana neakole ne dimanya dia bungi diamuvuija muntu udi ne ‘meji adi amufikisha ku lupandu.’​—2 Tim. 3:15.

³ Ikala ne tshibidilu tshia kupatuka mu mudimu wa budimi: Tshimue tshibidilu tshimpe tshia kupesha muana mu bidimu bidiye wenda ulonga malu mashilashilangane ntshia kuyisha lumu luimpe lua Bukalenge bua Nzambi misangu yonso. Bua kulongesha bana mudimu eu, baledi ba bungi batu batuadija kuyisha nabu ku nzubu ne ku nzubu patshidibu batekete. Padi baledi bikale ne tshibidilu tshia kupatuka mu budimi, bana babu badi bafika ku dinanga mudimu eu ne ku diwenza ne lukunukunu. Baledi badi mua kuleja bana mushindu udibu mua kuenza pabu bitupa bionso bia mudimu eu.

⁴ Kudifundisha mu Kalasa ka Mudimu wa Teokrasi kudi kabidi kuambuluisha bana. Kudi kubalongesha bibidilu bimpe bia dilonga ne mushindu wa kuikala ne ngumvuilu muakane wa bidibu babala. Badi bamanya mua kuyikila ne bantu bakuabu malu a mu Bible, mua kubapinganyina bua kuyikila ne kulonga nabu Bible. Dilongesha dia nunku edi didi mua kubapetesha meji a kuenza bumpanda-njila ne kuipatshila bua kuenza midimu mikuabu ya pa buayi. Bena ku Betele ba bungi ne ba-misionere bavule batu basanka padibu bavuluka muakatuadijabu dienza midimu mu Kalasa ka Mudimu wa Teokrasi, bamba mudi kalasa aka kabambuluishe bua kuikala ne bibidilu bimpe.

⁵ Tuetu bonso tudi bu dima mu bianza bia Mufumbi Munene, Yehowa. (Yesh. 64:8) Padi dima ditshikale dibishi, mbitekete bua kufumba nadi bintu. Padidi ditamba kuma didi dishila bu dibua. Ke mudibi kabidi bua bantu. Patshidibu bana, badi balonga malu kakuyi lutatu to. Nenku mbitambe buimpe kubalongesha patshidibu bana. Ku buana buabu ke tshikondo tshia kulonga malu, ke tshikondo tshidibu balama malu abavuija bantu ba bibidilu bimpe peshi bibi. Nuenu baledi badi balama bana bimpe, tuadijayi kulongesha bana bibidilu bimpe mu mudimu wa buena-Kristo patshidibu batekete.