Enza mudimu ne disanka
1 Yezu wakamba ne: mu tshikondo tshia dikalaku diende, bantu ba bungi ‘kabakumanya bualu [ebu],’ anu bu muakenzekabi mu matuku a Noa. (Mat. 24:37-39) Nenku, tudi badianjile kumanya ne: bantu ba bungi kabakuteleja lumu luimpe lua Bukalenge to. Ntshinyi tshidi mua kutuambuluisha bua kuenza mudimu wetu eu ne disanka?—Mus. 100:2.
2 Tshia kumpala, tudi ne bua kumanya se: mukenji wetu ne mudimu wetu wa diyisha mbitupesha kudi Nzambi. Bua kuamba bulelela, patudi tuenza muetu muonso, kadi bantu kabayi banyisha bitudi tubayisha, Yehowa ke udibu babenga. Patudi tuvuluka ne: Yehowa udi wanyisha mudimu wa buambi utudi tuenza ne lulamatu, nebituambuluishe bua kuwenza ne disanka mu mutshima.—Yak. 1:25.
3 Tshibidi, kutshidi anu bantu badi bitaba njila wa lupandu wa Yehowa. Nansha mudi ba bungi kabayi banyisha bulelela, kutshidi amu bantu batudi mua kufuanyikija ne mikoko ba kukeba nansha mpindiewu utukadi kule menemene mu tshikondo tshia ku nshikidilu. Nenku bidi bikengela tutungunuke ne kuyisha, kuya “mu ditunga nansha musoko,” bua ‘kukeba muntu wa malu makane.’—Mat. 10:11-13, MMM.
4 Ikala ne mmuenenu muimpe: Malu mabi adi mu bitendelelu bia dishima mmatonde bamue bantu bikole. Bakuabu badi “batata, bamuangalake,” bionso ebi bua ndongoluelu wa malu eu. (Mat. 9:36) Ba bungi malu mmabapite mutu bualu kabena ku mudimu, kabena ne mushindu wa kudiondopesha kua munganga, peshi mbapange nansha dikuta dia kudikuatshisha nadi. Diumvua malu aa bimpe nedituambuluishe bua kutungunuka ne kuyisha. Enza bukole bua kutuadija diyuki dishindamene pa malu adi atamba kutatshisha bantu ba mu teritware wenu. Ubambuluishe bamanye se: anu Bukalenge bua Nzambi ke buajikija ntatu yabu. Enza mudimu ne Bible, ubaleje amue malu masunguluke mu mikanda yetu bua lumu luimpe lubalenge ku muoyo.—Eb. 4:12.
5 Benji ba dîyi dia Nzambi ba disanka badi bavuluka dîba dionso ne: ‘Disanka dia Yehowa mbukole buetu.’ (Neh. 8:10) Katujimiji disanka dietu to. “Pikala bena mu nzubu ewu bakanyine bupole, bupole buenu nebushalemu. Pikalabo kabayi babuakanyine, bupole buenu nebunupinganyine.” (Mat. 10:13, MMM) Yehowa udi ujululula disanka dietu ne utupeshilula bukole patudi tunanukila ne lutulu mu mudimu wende wa tshijila. Udi kabidi utubenesha bua lulamatu luetu.