Tutumbishayi Yehowa ne bienzedi bietu bilenga

¹ Padi tshipepele tshikole tshia mvunde tshikukuatshila mu njila, nebikuenze disanka wewe mupete kaba ka kubuela. Padi mu nzubu muudi unyemena muikale ka-luya kimpe ne benamu bakuakidila bilenga, udi usanka bua kusombamu. Mudimu wa diyisha Bukalenge udi uleja bantu muaba wa kusokomena wa nunku bua kunyema ndongoluelu wa Satana eu. Bienzedi bietu bidiku mua kuambuluisha bakuabu bua bamone mushindu udi muaba mulenga wa kusokomena eu muikale usankisha bantu anyi? Mbulelela, bualu Yezu wakamba ne: bantu bavua ne bua ‘kumona malu mimpe atudi tuenza, ne kutumbisha Tatu wetu udi mu diulu.’​—Mat. 5:16, Muanda Mulenga Lelu.

² Ntshinyi tshitudi ne bua kuenza bua bienzedi bietu kusakabi bakuabu bua kunanga Yehowa ne kubuela mu bulongolodi buende? Tudi ne bua kutumikila mêyi a Yezu adi mu Luka 6:31 ne 10:27 mu malu etu onso a buatshia buila. Nebitusake bua kuleja ne: tudi banange bantu netu, nenku tudi tushilangana ne banga bantu badi kabayi baditatshisha bua bakuabu.

³ Muanetu wa bakaji mukuabu uvua mu mazuwa a mâyi wakamona munga nsongakaji uvua ne kusama kukole bua luendu lua pa mâyi kayi ne mushindu wa kutshiungaye muanende mutekete. Muanetu eu e kumulombaye bua kumulamina muana. Nsongakaji wakebeja muanetu eu tshivuaye mua kumufuta, kadi yeye kumuambila ne: ‘Witabe bua kuyikila ne Bantemu ba Yehowa paluabu kuebe.’ Ke tshiakenza nsongakaji. Lelu’eu yeye ne bayende m’Bantemu. Bualu bulenga ebu buakabafikisha ku ditaba mukenji wa Bukalenge.

⁴ Tuikalayi ne bikadilu bilenga mu nsombelu wetu mujima: Ngikadilu wetu muaba utudi basombele, patudi ku mudimu anyi mu kalasa, ne mêba atutu tujikija mukodi, utu ufikisha bakuabu ku dituelela meji kampanda, tuetu ne tshitendelelu tshietu. Nunku, tudiebejayi ne: ‘Mmunyi mudi bantu bakuabu bangangata meme ne dîku dianyi? Bena mutumba batuku bangata nzubu wetu ne lupangu luetu bu miaba milama ne mankenda anyi? Ku mudimu ta mu kalasa, tutuku bamanyike bu bena mudimu ba tshisumi batu bafika anu pa dîba anyi? Tudiku tumueneka kudi bakuabu bu bantu ba mvuadilu muimpe ne wa kunemeka anyi?’ Bienzedi bietu bimpe bidi mua kuvuija ntendelelu wa Yehowa, ntendelelu udi usankisha bantu bakuabu bikole.

⁵ Petelo wakatudimuija ne: bantu bavua ne bua kupenda bena Kristo. (1 Pet. 4:4) Ke bualu kayi tudi ne bua kuikala bajadike se: bikadilu bitudi nabi kabiena bitukebela bijanu to. (1 Pet. 2:12) Bikala bienzedi bietu bia dituku dionso bitumbisha Nzambi utudi tutendelela, netuikale bu miendu miteka kuulu, idi ileja bakuabu muaba muimpe wa kusokomena udi Yehowa mulongolole.​—Mat. 5:14-16.