Tumanyishayi dîna dia Yehowa ne malu adiye wenza
1 ‘Nusakidile Yehowa, nubikile dîna diende, numanyishe bienzedi biende munkatshi mua bukua bantu. Mitshima ya badi bakeba Yehowa isanke.’ (Mus. 105:1, 3) Mufundi wa Musambu eu uvua usanka bikole pavuaye umanyisha bakuabu malu adi atangila Yehowa ne “bienzedi” biende. Mbienzedi kayi abi? Kakuyi mpata, mmalu adi atangila bukalenge bua Nzambi ne ‘lumu lua lupandu luende.’—Mus. 96:2, 3; 145:11, 12.
2 Bu mukadi Tshivulukilu tshia mu 2001 pabuipi, kudi malu a bungi adi atusaka bua kusanka bua bionso bidi Yehowa utuenzela. Mmushindu kayi? Kakuyi mpata, Didia dia Mukalenge ntshibilu tshitambe bunene tshia ku tshidimu bua bena Kristo balelela bonso. Kakuena tshikuabu tshibilu bu etshi pa kumona mushinga, kipatshila ne mushindu ututshi tshienzeka. Ntshikondo tshitudi bonso ne bua kuvuluka malu adi Yehowa ne Yezu benze bua lupandu luetu. Ke bualu kayi bana betu batu bayisha bikole mu tshikondo tshia Tshivulukilu, bua kumanyisha “lumu luimpe lua lupandu.”
3 Newikale mpanda-njila muambuluishi anyi? Bantu bavua bampanda-njila bambuluishi mu ngondo muinayi wa tshidimu tshishale bavua 7 644 mu Congo-Kinshasa ne 556 mu Congo-Brazzaville. Tshidimu etshi, katuenaku mua kuvuija ngondo muisatu ne muinayi, ngondo ya pa buayi pa kuvudija dienza dietu dia mudimu wa buambi anyi? Ngondo muisatu udi ne matuku a Disambombo ne a Dia lumingu atanu atanu. Pa kudilongolola bua kuenza mudimu wa bungi mu Disambombo ne mu Dia lumingu, bamanyishi ba bungi mbafike ku dimona ne: badi mua kulua bampanda-njila bambuluishi. Bua kukumbaja mêba 50 malomba ku ngondo, mpanda-njila muambuluishi udi ne bua kuenza mêba 12 lumingu luonso. Konkonona ne ntema programe ya tshilejilu idi mu kazubu kadi mu dibeji 4. Kudiku umue udi mukukumbanyine anyi? Pikalabi kabiyi nanku, udi mua kudienzela webe bua kumona mua kuikala mpanda-njila muambuluishi mu ngondo muisatu ne muinayi tshidimu etshi.
4 Bakulu batuadije kuambuluisha ne kuenza bionso bidi bikengela ku mpindieu bua mudimu kuenzekawu muvule. Tshidimu tshishale, mu tshimue tshisumbu muvua bakulu ne basadidi ba mudimu bonso baditue mu bumpanda-njila buambuluishi, biakenza ne: bawetu 64 ba ku bamanyishi 121 ba mu tshisumbu atshi benze bumpanda-njila buambuluishi mu Tshisanga. Kusankabu kabidi pakamonabu bantu basambombo batuadija kuyisha ne kufila luapolo lua mudimu mu Luabanya ne Tshisanga. Bushuwa, etshi ke tshikondo tshimpe tshidi bana ne bapiabapia mua kuyikila ne bakulu bua bamanye ni bakadi bakumbaje malu malomba bua kutuadijabu mudimu wa diyisha.
5 Didifila mu mudimu ne muoyo mujima didi ditutuadila masanka: Bisumbu bidi bidifundila bipatshila bisunguluke ne bienza muabi muonso bua kubikumbaja bidi bipeta masanka a bungi. Bimue bidi mua kuangata dipangadika dia kuyisha kujikija teritware wabi mujima, kunemenena pa buambi bua mushindu kampanda pa kumbusha ebu bua ku nzubu ne nzubu, anyi bua kuyishila ku nshinga, mushindu muimpe wa kupeta bantu batubu kabayi basangana kumbelu anyi badi miaba itubu kabayi babueja bantu.
6 Bubedi anyi bukulakaje bidi mua kutekesha muntu mu mikolo bua kadifidi kabidi ne muende muonso mu mudimu wa buambi anyi? Muanetu mukuabu wa bakaji wa mvula 86 uvua disama dia kansere dikuate kakateketa nanku to. Nansha bua muvua mukolo wende muwule, wakenza bumpanda-njila buambuluishi mu ngondo muinayi wa tshidimu tshishale. Kuyishila ku nshinga ke kuakamuambuluisha bua kudifila bikole mu buambi, kupetaye mushindu wa kutumbisha Yehowa bikole. Bumpanda-njila ebu buakamukankamija yeye ne tshisumbu tshiabu.
7 Udilongolole bimpe bua Tshivulukilu: Tshidimu etshi Tshivulukilu netshienzeke mu dia 8 ngondo muinayi. Bu muenzekatshi mu Dia lumingu, bantu ba bungi nebikale ne mushindu wa kubuelamu. Tudi mua kutekemena bua bantu ba bungi kubuelamu bituadienzeja bua (1) kuikalamu tuetu bine ne (2) kubikila bakuabu bua kuluamu pabu. Mbanganyi batudi ne bua kubikila?
8 Tangila muaba uutu ufunda mêna a bantu bavua basankidileku bulelela dîba diuvua mubayishe, udi mua kubabikila nansha wewe kuyi mubapinganyine misangu ya bungi. Mbingu ibidi anyi isatu kumpala kua Tshivulukilu, utuadije kubapinganyina bonso ne tubeji tua dibikila mu Tshivulukilu. Pawikale ne mushindu, udi nansha mua kufutshila badi banyisha mua kulua njila.
9 Mu bimue bisumbu, kabatu babanya tubeji tuonso tua dibikila natu bantu mu Tshivulukilu to. Sekretere wa tshisumbu tshionso udi ne bua kuenza bua bamanyishi bapete tubeji etu pa dîba diakanyine bua kumonabu mua kutuabanya tuonso. Udi mua kufunda ku tshiamu anyi ku tshianza dîba ne muaba mujalame wenzekela Tshivulukilu munyima mua kabeji aka. Anyi udi mua kulamikaku kabeji kakuabu kadi kaleja adrese wa muaba udi Nzubu wenu wa Bukalenge, bikala Tshivulukilu ne bua kuenzekelamu. Tudi tunuvuluija bua numanye ne: mbimpe muntu adifidile kudi bantu tubeji tua dibikila natu mu Tshivulukilu.
10 Tuvulukayi bawetu badi kabatshiyi bayisha: Bidi bienza disanka padi mulongi wa Bible udilambula kudi Yehowa ne pashishe utambula. Bia dibungama, ku tshidimu tshionso, bamue badi balekela kudisangisha netu, balekela kumanyisha bantu nabu dîna dia Yehowa ne malu adiye muenze. Mbimpe tuditatshishe bua bualu buabu. Nansha mudi ba bungi badi kabatshiyi bayisha aba kabayi balekele bulelela, mbalekele kuyisha pamu’apa bualu badi ne malu adi abatatshisha, anyi ntatu mikuabu idi mibatekeshe mu maboko. (Mat. 13:20-22) Banga badi batalale mu nyuma badi dijinga ne kubatua mpanda bua kupinganabu mu tshisumbu bangabanga ne ndongoluelu eu wa Satana kubaminayi bajima. (1 Pet. 5:8) Tshidimu etshi tuenzayi muetu muonso mu tshikondo tshia Tshivulukilu tshia musangu eu bua kuambuluisha bawetu bakadi balekele kuyisha bua balue kabidi bamanyishi ba lumu luimpe.
11 Sekretere wa tshisumbu udi ne bua kufila kudi balombodi ba dilonga dia mukanda mêna a bonso badi kabatshiyi bayisha. Komite wa Mudimu wa Tshisumbu udi ne bua kulongolola makumbula a bulami bua kuya kutangila bawetu bonso badi kabatshiyi bayisha aba. Pikalabi bikengela kulonga nende Bible, bena komite wa mudimu nebasungule muanetu udi mukumbanyine bua kulombola dilonga edi. Nansha mudibi kabiyi bikengela bua dilonga edi kunengadi matuku a bungi, udibu bambile bua kudilombola udi ne bua kubala mêba adiye ulonga ne muntu au, kubala makumbula mapiamapia ne dilonga dia Bible.
12 Mu ngondo muinayi wa tshidimu tshishale, muanetu mukuabu wa bakaji uvua uyisha ku nzubu ne ku nzubu wakapesha munga nsongalume bibejibeji mu njila. Nsongalume au kumulejaye ne: uvua musele Ntemu uvua katshiyi uyisha. Wakebeja muaba uvua Nzubu wa Bukalenge ne kuambilaye muanetu wa bakaji au bua kuluaye kubatangila. Biakafikisha muntu eu ne mukajende ku dibuela mu tshisangilu tshiakalonda ne kuitaba bua kulonga Bible.
13 Udilongolole bua kuvudija mudimu webe. Mufundi wa Misambu wakamba bua kumanyisha dîna dia Yehowa ne malu adiye muenze. Wakamba kabidi ne: ‘Numuimbile misambu, numuimbile misambu ya kumutumbisha nayi, nuyikilangane bua malu ende onso a kukema. Nutumbile mu dîna diende dia tshijila.’ (Mus. 105:2, 3) Tulejayi mutudi tuangata ne mushinga dîna dinene dia Yehowa ne “malu ende a kukema” pa kuyisha muetu muonso, bua tshikondo tshia Tshivulukilu tshia musangu eu tshishale muanda utudi katuyi mua kupua muoyo!
[Kazubu mu dibeji 4]
Programe idi mua kuambuluisha bamanyishi badi basue kulua bampanda-njila bambuluishi bua kukumbaja mêba 12 ku lumingu
Dituku Mêba
Dimue 1 2 − −
Dibidi 1 − 3 −
Disatu 1 2 − 5
Dinayi 1 − 3 −
Ditanu 1 2 − −
Disambombo 5 4 3 5
Dia lumingu 2 2 3 2
Bungi: 12 12 12 12
Umue wa ku programe eyi mmukukumbanyine anyi? Pikalayi kayiku, dienzela webe programe.