Mandamuna ku nkonko yenu

▪ Ndîba kayi didibi mua kukengela bua kuenza kasumbu kakuabu ka Dilonga dia Mukanda dia Tshisumbu?

Nudi ne bua kuela meji bua kuenza kasumbu kakuabu panudi numona ne: bidi bikengela bua tukuabu tuonso tuikale anu ne bantu 15 peshi bashadile ku 15 ku kasumbu kuonso ka muaba wonso udi dilonga dia mukanda dienzekela, nansha kabidi ne bua aka katu ku Nzubu wa Bukalenge. Bua tshinyi bidi bikengela kuenza nanku?

Padi kasumbu ka Dilonga dia Mukanda dia Tshisumbu kikale ne bantu bakese, mulombodi udi ne mushindu wa kuambuluisha muntu ne muntu yonso udi ubuelamu. Kabidi, bantu bonso badi ne mushindu wa kuakula ne kuleja patoke ditabuja diabu. (Eb. 10:23; 13:15) Kuikala ne tusumbu tua bantu bakese miaba ya bungi mu teritware wa tshisumbu kudi kupetesha bantu mushindu wa kuikalabu babuela mu Dilonga dia Mukanda dia Tshisumbu ne mu bisangilu bia mudimu wa budimi. Bisumbu bidi bivudije bungi bua tusumbu tua dilonga dia mukanda mbilue kumona ne: bungi bua badi babuela mu dilonga dia mukanda mbubande pabu.

Kudi mua kuikala malu makuabu adi mua kulomba bua kuenza kasumbu kakuabu, nansha badimu bikale bakese menemene. Ke mudibi mua kuikala bua miaba idi pa nkayayi kule anyi miaba idi ne bantu bapata mu nzubu tente bakuabu bapangila miaba ya kusomba. Imue misangu bidi bikengela kuenza kasumbu kadi mua kuikala kadisangisha patshidi kuisu kutoke bua bawetu bakadi bakulakaje, bena mudimu wa butuku peshi bana betu ba bakaji bena ba-bayabu badi kabayi Bantemu.

Kasumbu konso ka dilonga dia mukanda kadi ne bua kuikala ne bamanyishi bungi bukumbane bashindame mu nyuma ne benji ba mudimu bilenga, mulombodi mupiluke ne muanetu udi mumanye mua kubala bimpe. Bana betu ba balume badi ne bua kuenza bukole bua kukumbaja malu aa mu tshisumbu.

Padi bakulu benza muabu muonso bua tusumbu tua dilonga dia mukanda kuikalatu miaba miakanyine ne bantu bungi bukumbanyine badibu mua kulondesha bimpe, badi bafika ku diambuluisha tshisumbu bua kukolatshi mu nyuma. Padiku mushindu, mbimpe benze tusumbu tupiatupia bua muntu yonso apete diambuluisha dia mu nyuma mu tshisangilu etshi. Udiku mua kuitaba bua dilonga dia mukanda dikale dienzekela kuebe anyi? Bantu ba bungi badi bitabe bua dilonga dia mukanda kuikaladi dienzekela ku nzubu kuabu mbapete mabenesha a mu nyuma.