Kuyisha ne mêyi mapepele nkutambe buimpe
1 Bua tshinyi bitu bitamba kukemesha bantu badibu babayisha kudi bamanyishi batshidi bapuekele? Bitu bikemesha bantu bualu batu bayisha ne mêyi mapepele. Bamanyishi bakuabu badi mua kuela meji ne: bua kuyisha bimpe bidi bikengela kuakula ne miaku mikole. Pabi, malu akadi menzeke adi aleja ne: kuyisha ne mêyi mapepele nkutambe buimpe.
2 Yezu wakayisha Bukalenge bua Nzambi bimpe mu mushindu mupepele, kulongeshaye kabidi ne bayidi bende bua kulondabu ndongeshilu wende. (Mat. 4:17; 10:5-7; Luka 10:1, 9) Uvua utuadija miyuki yende ne mêyi, nkonko ne bilejilu bipepele bua kukoka ntema ya bavua bamuteleja ne kulenga mitshima yabu. (Yone 4:7-14) Mbimpe tulonde tshilejilu tshiende bua kuyisha bantu malu mapepele adibu mua kumvua kakuyi lutatu.
3 “Lumu luimpe lua Bukalenge” ke mukenji utudi ne bua kuyisha. (Mat. 24:14) Paudi wangata Bukalenge bu tshiena-bualu tshiebe tshinene, nebikuambuluishe bua wewe kuikala kuyisha mu mêyi mapepele. Akula bua malu adi atangila bakuteleji. Bamamu mbatambe kusua malu adi atangila dîku diabu kupita a tshididi. Tshidi ne mushinga menemene kudi tatu wa dîku mmudimu wende ne tshidiye mua kuenza bua kukuatshisha dîku diende. Bansonga badi baditatshisha bua tshikalabu matuku atshilualua, bakulakaje buobu badi badila anu bua makanda abu a mubidi ne mushindu wa kupeta ka kudiambuluisha naku. Bantu batu batamba kujinga kumanya malu adi apitakana miaba idibu kupita adi enzeka kule. Wewe mumane kuyikila ne bantu malu atu atangila bantu bonso, udi mua kubaleja panyima mabenesha apeta bena butumike mu bukokeshi bua Bukalenge bua Nzambi. Mêyi makese, mapepele ne masunguluke, kusakidila ku mvese wa mu Bible, adi mua kuikala mushindu mulenga mutambe wa kukoka ntema ya badi bakuteleja.
4 Udi mua kutuadija diyuki pa kuamba ne:
▪ “Ndi mujadike ne: wewe pebe udi witaba se: kudi masama mavule adi akengesha bantu adi kaayi nansha ne manga to. Kadi utuku mumanye ne: Nzambi mmulaye bua kujikija masama onso, kujikija kabidi ne lufu anyi?” Lekela muntu andamune, ne pashishe bala mu Buakabuluibua 21:3, 4.
5 Tulengayi mitshima ne lungenyi lua bantu ba bungi mu teritware yetu ne malu mapepele matokesha bimpe patudi tubayisha, tubambuluishe bua bamanye malu adi atangila Yehowa ne ditekemena dia kupeta muoyo wa kashidi.—Yone 17:3.