Bena mutumba nebe bamone ne: udi muntu muimpe
1 Yezu wakamba bua “kunanga mukuebe bu muudi mudinange wewe.” (Mat. 22:39, MML) Kakuyi mpata, utu ‘wenzela bena kuitabuja nebe bimpe,’ kadi udiku mua kuya kule ne dinanga diebe, kunanga too ne bena mutumba nebe anyi? (Gal. 6:10) Mmunyi?
2 Pa kumanyisha tshiudi wewe muine: Bena mutumba nebe mbamanyeku ne: udi Ntemu wa Yehowa anyi? Bikalabu kabayi bamanye ne: udi Ntemu, bua tshinyi kubenga kuya kuyikila nabu paudi mu budimi? Udi mua kumona bipeta biuvua kuyi nansha muelele meji to! Anyi paudi ne mushindu, udi mua kubayisha mu mpukapuka. Paudi pambelu, udi mua kumona muena mutumba nebe wenza mudimu mu lubanza luende peshi uya mu njila. Udi mua kuya muaba udiye ne mimuemue. Kuteta bua kumulondela amue malu autu witabuja, kumuambila muaba udi Nzubu wenu wa Bukalenge ne tshinutu nuya kuenzamu. Udi kabidi mua kumutelela mêna a bantu bakuabu badi nenu mutumba batu bayamu pabu. Bikila bena mutumba nebe mu bisangilu. Dipangadika diebe dikale dia kuyisha bantu bonso baudi mumanye lumu luimpe.—Bien. 10:42; 28:23.
3 Ku ngikadilu webe wa tshitembu: Paudi udileja mulunda wa bantu, bidi bibalongesha malu a bungi pa bumuntu buebe ne kukunzuluila pamu’apa njila wa kubayisha. Bidi kabidi ‘bitumbisha diyisha dia Nzambi.’ (Tito 2:7, 10) Ikala ne disanka bua kumona bena mutumba nebe. Ikala mulunda wabu ne ubumvuila. Nemeka mêba atubu basue kushala bapuwe kakuyi mutoyi ne muntu wa tshianana kayi ulua kubatangila. Padi muena mutumba usama, uya kumutangila ne kupu muoyo bua kumuambuluisha to. Padi dîku dikuabu dilua kusombela pabuipi nenu, udi mua kuya kubela muoyo. Malu malenga a nunku adi ashiya bantu ne lungenyi luimpe, adi asankisha mene ne Yehowa.—Eb. 13:16.
4 Pa kuikala ne mankenda: Kuikala muena mutumba muimpe kudi kumvuija kabidi kulama nzubu wetu ne mankenda. Nzubu udi ne mankenda ne lubanza lukomba bimpe bidi biyisha bantu. Kadi padi nzubu ne bukoya ne bintu bitangalakanganemu, bidi mua kupendesha mukenji wa Bukalenge. Nunku, tudi ne bua kulongolola bimpe ne kulama bintu bietu ne mankenda, bu mudi: nzubu, lubanza ne mashinyi ta dikalu.
5 Kuleja bantu badi kabayi Bantemu ba Yehowa disanka kudi kujadika bushuwa ne: udi munange bantu nebe. Kadi ntshinyi tshidi mua kulua kuenzeka? “Bua midimu yenu mimpe idibo bamona,” bamue ba kudibu badi mua ‘kutumbisha Nzambi.’—1 Pet. 2:12.