‘Teleja bua uvudije dimanya diebe’
1 Mukanda wa Nsumuinu udi wakula bua meji bienze bu adi ela mbila amba ne: ‘Umvuayi, bualu bua nengambe mianda minene; ne ku mishiku yanyi nekupatuke mêyi makane. Ndi mua kuleja bantu lungenyi, ndi meji a kukuatshisha nawu bantu; nungumvuile; bua badi balamata mu njila yanyi badi ne disanka. Bualu bua wansangana udi usangana muoyo, udi upeta diakalengele kudi Yehowa.’ (Nsu. 8:6, 14, 32, 35) Mêyi aa adi umvuija bimpe dilongesha didi dituindile mu Mpungilu wa Distrike wa “Balongeshi ba Dîyi dia Nzambi.”
2 Mbakebulule tshidi bantu ba Nzambi bonso pa buloba bujima bikale natshi dijinga, pashishe mbalongolole mpungilu bua kukumbaja dijinga adi. Ditumikila dilongesha dia mu nyuma ne mibelu mimpe ayi nedituambuluishe bua kuikala ne disanka, kulama malanda mimpe ne Yehowa ne kushala mu njila udi ufikisha ku muoyo wa kashidi. Bushuwa, tudi ne bua ‘kuteleja bua kuvudija dimanya dietu.’—Nsu. 1:5, MMM.
3 Kumpala kua programe kutuadijaye: Bua malu atualonga mu mpungilu kutuambuluishawu, tuikale bamane kusomba pa miaba yetu ne bateye matshi bimpe padi programe utuadija. Nunku muntu ne muntu udi ne bua kudianjila kudilongolola bimpe. Bualu bunene nkubanga kudilongolola kumpala kua dîba. Mbimpe kulala pa dîba dituku didi kumpala kua mpungilu. Kubika pa dinda menemene bua muntu yonso unudi nende adilongolole kumpala kua dîba ne adieku kantu. Kufika kumpala kua dîba bua kupeta miaba ya kusomba ne kuenza malu adi akengela kuenza bangabanga ne programe kutuadijaye. Bantu nebabangishe kubuela mu 8:00 ne dituku dionso programe neikale utuadija mu 9:30.
4 Bu mudi tshipatshila tshinene tshia didisangisha edi tshikale tshia kutumbisha Yehowa ‘mu masangisha a bantu bende,’ tshitupa tshionso tshidi ne bua kutuadija mu mushindu udi utumbisha Nzambi wetu. (Mus. 26:12) Bua nanku, bantu bonso badi ne bua kuikala bamane kusomba pa miaba yabu kumpala kua kumanyishabu musambu wa mbangilu. Bionso ebi bidi biumvuangana ne mubelu wa mu Bible eu: “Bionso bienzeke biakane ne bilondangane bimpe.” (1 Kol. 14:40, MML) Bidi bisua kumvuija tshinyi? Paudi umona mulombodi musombe ku tshiakuidi eku mijiki idila, ndaku musangu umue pa muaba webe. Nebikuambuluishe bua wewe kuimba pebe ne muoyo mujima musambu wa mbangilu wa tshitupa tshionso tshia mpungilu bua kutumbisha Yehowa.—Mus. 149:1.
5 Munkatshi mua programe: Ezela ‘uvua mujadike mu mutshima wende bua kukeba mikenji ya Yehowa ne bua kuyenza.’ (Eze. 7:10) Mmunyi mutudi mua kulongolola ta kujadika mitshima yetu bua kulonga malu adi Yehowa utulongoluela? Pawabala biena-bualu bia miyuki bidibu baleje pa dibeji dia programe, udikonke ne: ‘Ntshinyi tshidi Yehowa ungambilamu? Mmushindu kayi undi mua kulonda malu onso aa bua kungambuluishawu, ne kuambuluishawu kabidi dîku dianyi?’ (Yesh. 30:21; Ef. 5:17) Utungunuke ne kudiela nkonko eyi mu mpungilu mujima. Funda malu audi ujinga bua kulua kuenza nawu mudimu pashishe. Ku ndekelu kua tshitupa tshionso tshia mpungilu, nuikale nuyikidilangana malu au. Nebikuambuluishe bua kushala muavuluke ne bua kuatumikila.
6 Kushala mushindika lungenyi pa bualu bumue munkatshi mua mêba mavule kudi mua kuikala bualu bukole. Kadi ntshinyi tshidi mua kutuambuluisha bua kuepuka ditanaja? Mêsu atu ne bukokeshi budi mua kuambuluisha muntu. Misangu mivule, malu atudi tutangila basumishe ke atu aludika ntema yetu. (Mat. 6:22) Bua nanku, lekela kuikala ukenzakana dîba dionso diudi umvua mutoyi. Mêsu ebe ikale matangile anu kudi ngamba-malu. Londesha mu Bible webe padibu babala mvese, ne wikale mukangule Bible padibu bumvuija mvese.
7 Dinanga dia bena Kristo nedituambuluishe bua kubenga kutatshisha bakuetu dîba didi mpungilu mu dienzeka. (1 Kol. 13:5) Etshi ‘ntshikondo tshia kupuwa’ ne kuteleja. (Muam. 3:7) Nunku, epuka diteka mitoyi ne ditambakanangana tshianana tshianana. Udianjile kudilongolola bua kutambi kututa misesu ku nkumba to. Ki nkudia peshi kunua padi dîba kadiyi dianji kukumbana dia kudia to, amba amu wewe usama ne bikengela kudiaku kantu anyi kunua mâyi. Bantu badi ne telefone ya ku bianza, biamu bia kamera ne bia foto bamanye mua kuenza nabi mudimu bimpe bua kabakebedi nabi bakuabu ditanaja to. Baledi badi ne bua kuenza muabu muonso bua kusomba pamue ne bena mu mêku abu onso, ne bansonga, bua kumona mushindu wa kutangila bana babu bonso.—Nsu. 29:15.
8 Tshidimu tshishale mukulu mukuabu udi mubuele mu mpungilu misangu ne misangu kukadi mpindieu bidimu bia bungi wakamba ne: “Ngakamona ne: kuvua bualu bukuabu buakavuija mpungilu au wa pa buende menemene. Muntu bu yonso uvua ufunda malu, ne bana pabu ke tshivuabu benza. Bivua bienza disanka pa kubimona. Bantu bavua balonda mu Bible yabu pavua bangamba-malu babalomba bua kumubulula pa imue mvese.” Kalumbandi aku bua bantu badi bateya ntema mushindu’eu! Kabiena amu bituambuluisha patupu to, tuetu ne batudi nabu mu mpungilu, kadi bidi kabidi bitumbisha Yehowa Nzambi, Mulongeshi wetu Munene.—Yesh. 30:20.