Dilongololayi “mu buakane ne mu bulongame”
1 Bua mpungilu wa distrike kupitaye bimpe, bidi bikengela bua bantu ba bungi badifile bikole mu midimu. Balombodi ba mpungilu badi balongolola muaba muakanyine wa kuenzela tshisangilu etshi ne miaba ya bantu kulala. Muntu umue umue ne bena mêku majima badi badilongolola bua kuenza luendu ne kupeta miaba ya kutudila. Bisumbu pabi bidi bilombola bana betu badi badifile bua kuenza mudimu ku budisuile mu bibambalu bia bungi mudibu bakeba bantu. Tshipatshila ntshia ne: “bionso bienzeke anu mu buakane ne mu bulongame.”—1 Kol. 14:40, MMM.
2 Paudi wenza mudimu pamue ne badi balongolola mpungilu, uvuluke ne: mudimu eu utu wangata ngondo mivule; imue misangu nansha bidimu bua kuujikija. Nkama ne nkama ya bana betu batu bapitshisha dîba dia bungi bua malu kuakanawu bimpe. Bitu bikengela kufutshila miaba, kukeba bintu bia mudimu ne kubikila badi mua kuenza mudimu. Didianjila kudilongolola edi didi dipetesha bantu bonso mabenesha a mu nyuma. Ntshinyi tshitudi mua kuenza bua tuetu kuambuluisha petu?
3 Tuikalayi ne bikadilu bimpe padibu batuakidila miaba ya kulala: Tudi ne bua kueleshangana diboko ne badi batangila malu a dipesha bantu miaba ya kulala. Bituikala balongolole bua kutudila mu dîku kampanda dia Bantemu netu, tudi ne bua kudianjila kubamanyisha bua kabafidi dîna diabu mu bantu badi basue kuakidila benyi ku mabu to. Patudi bamane kulomba muaba ne batupeshawu mu dîku kampanda, tudi ne bua kuya anu muaba udibu batusunguile au. Katuena ne bua kushintulula muaba kunyima ne kumvuangana ne muntu mukuabu bua kutudila kuende to. Kuenza nunku kudi mua kutekesha bana betu mu maboko ne kabakuitaba kabidi bua kupesha bantu miaba ya kulala to. Bamue ba kutudi badi ne balela babu mu musoko udi mpungilu wenzekela badi mua kuanyisha bua kutudila kua balela babu aba. Kuenza malu mushindu’eu nkuimpe bua kumoma mua kuyisha bena ku nzubu kuatudilabu aku, ne kabidi kupeta mushindu wa kubabikila bua kuluabu pabu mu mpungilu. Nanku mushindu udi upeteka wa kushila bana betu badi benza luendu bua kulua ku mpungilu kadi kabayi ne balela babu mu musoko au miaba idi ku nzubu ya bena Kristo netu bakuabu.
4 Padibu batupeshe muaba wa kulala mu dîku kampanda, musangu umue padi mpungilu ujika, katushadi kabidi matuku a bungi kumbelu kuvuabu batuakidile aku to, tshianana tudi tunemeshila bana betu bujitu patupu. Patudi batudile kua bana betu, tudi ne bua kunemeka bintu biabu ne malu adi abatangila anu buobu nkayabu. Bu mutudi benyi, katuena ne budikadidi bua kulenga biamu bia bende, mikanda ne bikuabu bintu padi muena kumbelu kayi mutupeshe dianyisha to. Bia muomumue kabidi, ki mbimpe bua tuetu kudibuelela miaba mikuabu ya mu nzubu idibu kabayi batuanyishile bua kubuela to. Tudimukayi bua bana batudi balue nabu kabenji pabu malu makandika aa to. Tudi ne bua kuleja kanemu pa kubenga kuenza mitoyi, kuakula ne dîyi dikole, kukuma biibi bikole patudi tubinjila ne malu makuabu.
5 Bu mutudi bapete diakalenga dia kutuakidilabu kudi bana betu aba, tuenze bua katubatudishi mfranga to. Ki mbuobu badi ne bua kutudisha ne kutuenzela malu makuabu to, amba anu buobu basue kutuenzela nawu ku disua diabu. Muntu yonso udi ne bua kudilongolola kumpala kua kulua ku mpungilu ne kulama makuta ende bua kudia ne kufutshila dîku diende njila pikalabi bikengedibua. Muanetu mukuabu wakapana tshitupa tshia lupangu luende bua kufuta njila bua kuya kubuela mu mpungilu ne kuenza malu makuabu. Uvua mupangadije bua kudipangisha bimue bintu bua kumona mua kubuela mu mpungilu kadi kayi utekela udi umuakidila bujitu pa mbidi to.
6 Bikalabu batupeshe Nzubu wa Bukalenge bua kulalamu, tudi ne bua kuikala ne bukalanga bua kumona mua kupetangana bimpe ne bakuetu bonso batuasangana muaba au. Katuena ne bukenji bua kubikila muntu mukuabu bua alue pende kusomba netu mu nzubu au padibu kabayi batuanyishile kudi tshibambalu tshidi tshitangila malu a miaba ya kulala. Tudi ne bua kulama Nzubu wa Bukalenge ne mankenda ne bulongame. Bantu bonso badi ne bua kudibela ne kuepuka ditekela bakuabu badi basue kuikisha mutoyi. Nunku mbimpe kuepuka miyuki idi iya too ne mundankulu. Nujime miendu anyi nuyipuekeshe pa dîba dinudi bumvuangane. Muntu yonso udi ne dijinga dia kulala bua kumonaye mua kujuka ne bukole mu dinda ne kuya mu mpungilu dituku didi dilonda. Padi mpungilu ujika, nudi ne bua kumbuka mu Nzubu wa Bukalenge bualu bisumbu bidi ne bua kubangisha bisangilu biabi. Panudi numbuka mu Nzubu wa Bukalenge, ikalayi bajadike ne: nudi bamushiye ne mankenda ne bamulongolole bimpe. Nuenu benze malu nunku bushuwa nebileje ne: nudi ne kanemu kudi bana betu ne kabidi nebipeshe Nzambi utudi tutendelela lumu.—1 Pet. 1:15, 16.
7 Mutudi basadidi ba Yehowa Nzambi, tudi ne mushindu wa kuleja ngikadilu yende mu malu onso atudi tuenza. Bidi biumvuija kabidi didilongolola bua kubuela mu mpungilu mudibu batumbisha dîna dia Nzambi. Vuluka ne: Yehowa “kena Nzambi wa malu mabuelakane, kadi udi Nzambi wa ditalala.” (1 Kol. 14:33) Nunku, tuenzayi mushindu wa ne: bantu bonso badi batumona bamone ngikadilu wa Yehowa eu mu bitudi tuenza; ngikadilu yetu ne mushindu utudi basombe ne bantu; bionso ebi patudi tudilongolola bua kubuela mu Mpungilu wa Distrike wa “Balongeshi ba Dîyi dia Nzambi.” Babandidi ba mutshima muimpe mbafike ku dijingulula ne: bantu ba Yehowa badi badisangishe mbadilongolole “mu buakane ne mu bulongame.”—1 Kol. 14:40; Mus. 68:26.