Mpungilu ntshikondo tshia disanka!

¹ Mpungilu ya Bantemu ba Yehowa mbikondo bia disanka dia bungi be! Bisangilu bia nunku mbiambuluishe bikole (kukadi bidimu bipite pa lukama) bua bulongolodi buetu kufikabu ku diya kumpala mushindu udibi bienzeka eu. Tudi bamone mushindu udi Yehowa ubenesha mudimu utudi tuenza pa buloba bujima (katshia ku mbangilu kuawu). Mu mpungilu wetu wa kumpala wakenzekela ku Chicago (Illinois, mu 1893), bantu 70 ba ku bantu 360 bavua babuelemu bakatambula bua kuleja patoke ne: bavua baditshipe kudi Yehowa. Ku bantu 9 454 055 bavua babuele mu Mpungilu ya Distrike ya “Benji ba Dîyi dia Nzambi” tshidimu tshishale etshi, bantu 129 367 bavua batambule. Mbualu bulenga kayipu ebu budi buenza disanka!

² Katshia ku tshikondo tshivuabu bafunda Bible, bisangilu bia bantu ba Nzambi ng’umue mushindu munene wa kulongesha bantu mikenji ya Yehowa. Tshilejilu, mu tshikondo tshia Ezela ne Nehemiya, bantu bavua bateleja pavuabu bababadila Mikenji “ku dinda tô ne ku munda munya.” (Neh. 8:2, 3) Bantu “kusankabo bikole” bualu bakajingulula bimpe Mikenji. (Neh. 8:8, 12, Mukanda wa Mvidi Mukulu) Tuetu petu tudi tusanka bua mudi mpungilu itupetesha mushindu wa kulonga malu mimpe ne kudia biakudia bia mu nyuma bidi Yehowa utupa “mu tshikondo tshiakanyine” ku butuangaji bua “mupika wa lulamatu ne wa budimu.” (Mat. 24:45, NW) Bu muakamba Yezu ne: muntu udi ne bua kuikala ne muoyo bua “dîyi dionso didi dipatuka mukana mua Yehowa,” tudi tumona se: mpungilu idi ne mushinga wa bungi bualu idi itukolesha mu nyuma.​—Mat. 4:4, NW.

³ Kudienzeja bua kubuelamu kudi ne difutu dimpe: Mu tshidimu etshi, tuetu bonso tudi ne bua kudifundila muntu ne muntu tshipatshila tshia kubuela mu Mpungilu wa Distrike wa “Balongeshi ba Dîyi dia Nzambi” matuku onso asatu. Tudi ne bua kudilongolola bua kuikala kufika kumpala kua dîba dituku dionso ne kushala too ne patudi tuamba “Amen!” wa disambila dia ndekelu. Bua kukumbaja malu onso aa, mbimpe tuakaje programe wetu. Bidi mua kuikala bikole bua kupeta matuku a dikisha ku mudimu bua kubuela mu mpungilu. Kadi tudi ne bua kuangata dipangadika, ki nkulekela malu adikumbanyina nkayawu to. Bituikala dijinga ne miaba ya kulala peshi makuta a kufuta njila, tudi ne bua kudianjila kudilongolola kumpala kua dîba. Bionso bituenza ne bukole buetu buonso, nebipatule bipeta bimpe.

⁴ Bantu ba Yehowa kabena bafuanyikija mushinga wa mabenesha a dibuela mu mpungilu ne wa mfranga to. Tangila bilejilu bia bamue bavua bapangadije bua kubuela mu Mpungilu wa bantu bafumine mu matunga a bungi wa “Disua dia Nzambi” mu 1958 mu provense wa New York City. Muanetu wa balume mukuabu wakakanga midimu yende ya diashilangana nzubu mu mbingu ibidi bua kuambuluisha bu muena budisuile ne kubuela mu mpungilu. Muanetu mukuabu wa mu bidiila bia Iles Vierges wakapanyisha tshitupa tshinene tshia maloba ende bua dîku diende dijima (divua ne bantu basambombo) dipete mushindu wa kubuela mu mpungilu au. Nsongalume mukuabu ne mukajende bakapanyisha buatu buabu bua motere bua bapete mushindu wa kuya ne bana babu bonso basatu mu mpungilu. (Wa kumpala uvua ne bidimu muanda-mutekete, wa ndekelu uvua ne ngondo ibidi.) Bana ba muntu bakuabu basatu bavua basombele mu provense wa Californie, bakabambila ku mudimu ne: nuenu badidinge bapumbishe, badi banumbusha ku mudimu. Kadi nansha nanku, bakaya amu ku mpungilu. Mpungilu au wakabasankisha bikole kabayi mua kumupua muoyo.

⁵ Yehowa udi utubenesha patudi tuenza muetu muonso: Yehowa utu umona ne ubenesha bantu bende padibu benza muabu muonso mua kuenza. (Eb. 6:10) Tshilejilu, mu mpungilu wa bantu bafumine mu matunga a bungi wa “Didiunda dia Teokrasi” wa mu 1950, bantu bavua babuelemu bakateleja muyuki munene wa: “Bulongolodi bupiabupia.” Muanetu Frederick Franz wakajula bantu bonso mioyo kulu pakelaye lukonko ne: “Kanuenaku ne disanka dia kumanya ne: muaba eu, dilolo edi, munkatshi muetu emu, mudi bantu bikala mua kulua bakalenge mu buloba bupiabupia anyi?” Nansha mukadiku kupite bidimu bipite pa 50, tutshidi amu tusanka bua muvuabu bumvuije bimpe Musambu 45:16.

⁶ Tatu wa dîku mukuabu muikale muntu wa dianyisha dia bungi, wakafunda mêyi adi alonda aa panyima pa mumane kubuela mu mpungilu wa distrike wa tshidimu tshishale: “Bana betu, kanuena mua kumanya mushindu udi mpungilu eu mupandishe mioyo ya bantu to. Tuvua baye ne dîku dianyi mu tshimenga tshinene bua kukeba mudimu, kadi tuakabanga kulenduka mu nyuma. . . . Tuvua batuadije kulengulula malu a mu nyuma. Tuakafika too ne ku dilekela kubuela mu bisangilu ne kupatuka mu buambi. . . . Mpungilu eu mmutufululule, tukadi mpindieu tudifundila kabidi bua kuenza malu a mu nyuma ne tudilongolola bua kuakumbaja.”

⁷ Yehowa udi utupesha biakudia bia mu nyuma bitudi nabi dijinga. Udi utulongoluela mesa adi ne biakudia bia mushinga mu mpungilu yetu. Dianyisha ditudi nadi bua bionso bidiye utupesha ebi didi ditupa mushindu wa kuamba muakamba Kônelio pakaluabu kumutangila kudi Petelo ne: ‘Katataka buonso buetu tudi munemu ku mêsu kua Nzambi bua kumvua malu onso akukuambila Mukalenge.’ (Bien. 10:33) Tusankayi ne tudifundilayi tshipatshila tshia kuikala ‘ku mêsu kua Nzambi’ mu bitupa bionso bia Mpungilu wa Distrike wa “Balongeshi ba Dîyi dia Nzambi” wa tshidimu etshi!