Tshia kuenza ntshinyi patudi katuyi banji kupeta Tshibumba tshia Nsentedi tshitudi ne bua kulonga?

Imue misangu bisumbu kabitu bipeta Tshibumba tshia Nsentedi pa dîba bua kuya pamue ne programe wa buloba bujima to; kadi tshia kuenza ntshinyi? Kudi malu abidi atu enzeka.

Bua kumpala, mu imue miaba mabuki a Tshibumba tshia Nsentedi kaatu afika misangu yonso pa dîba nansha. Padibi nunku, kasumbu ka bakulu nekenze bua ne: bikale balonga Tshibumba tshia Nsentedi panyima pa ngondo ibidi anyi isatu mu tshisumbu bilondeshile bungi bua matuku aditshi tshienza mu njila kumpala kua buobu kutshipeta. Nanku, muntu yonso wa mu tshisumbu neikale mudianjile kumanya nimero wa Tshibumba tshia Nsentedi wikalabu ne bua kulonga matuku adi kumpala.

Bualu buibidi, imue misangu bidi mua kufika bua kupangila Tshibumba tshia Nsentedi anu bua tshikondo kampanda. Bitu bienzeka nanku kabiyi ku disua dia Socété to. Padibi bienzeka nanku, bisumbu nebilonge Tshibumba tshia Nsentedi tshikadi tshienze tshidimu tshijima. Bidi bisua kumvuija ne: bu bikalabu bavua ne bua kulonga Tshibumba tshia Nsentedi tshia dia 1 Lumungulu 2001 bilondeshile programe wa buloba bujima, kadi kabayi natshi to, nebalonge Tshibumba tshia Nsentedi tshia dia 1 Lumungulu 2000. Kadi bikala dibuki dia Tshibumba tshia Nsentedi difike, badi ne bua kulonda diakamue programe wa buloba bujima. Dîba adi kabakebi bua kulonga kabidi biena-bualu bikadi bimane kupita to. Kasumbu ka bakulu nekalongolole bua ne: benze miyuki ya patoke miashila pa biena-bualu bine abi, muyuki ku tshiena-bualu tshimue. Nunku, bikalaku biena-bualu bia dilonga bibidi anyi bisatu, nebenze pabu miyuki ya patoke ibidi anyi isatu. Bangamba-malu basungulabu nebenze mushindu wa kulamata amu malu adi mu biena-bualu bibapesha kabayi basakidila ngenyi idi kayiyi mu tshiena-bualu atshi to.

Tudi tulomba mumanyishi yonso ne dîku dionso bua kulama bimpe Tshibumba tshia Nsentedi tshitudi tujikija kulonga bua ikale ne mushindu wa kupeta pa lukasa tshia tshidimu tshishale bikalaku kakuyi tshipiatshipia tshia kulonga bilondeshile programe wa buloba bujima. Société neatungunuke ne kuenza ne muende muonso bua ne: bisumbu bikale bipeta Tshibumba tshia Nsentedi pa dîba bua kumona mua kulonda programe wa buloba bujima.