“Tudi benze mudimu mu teritware wetu misangu ne misangu!”

¹ Utuku mumone ne: udi muyishe misangu ne misangu mu teritware webe ne bilua kumueneka ne: kamutshiena bantu badi bu mikoko anyi? Pamu’apa utu wamba ne: ‘Ndi mumanye mushindu wandamuna bantu. Bua tshinyi kutungunuka ne kupinganyina bantu badi kabayi nansha banyisha bulelela?’ Ntshia bushuwa se: teritware ya bungi bakadi benzenzamu mudimu. Kadi, mbimpe tuikale amu ne lungenyi luimpe pa bualu ebu, tumbushayi lua lubi. Bua tshinyi? Bala malu anayi adi alonda aa.

² Mbandamune masambila etu: Yezu wakamba ne: ‘Bulelela, bintu bia kunowa bidi bia bungi, kadi bena mudimu badi banyabanya. Nunku nulombe mukalenge wa bintu bia kunowa, atume bena mudimu mu kunowa kuende.’ (Luka 10:2) Kukadi bidimu bivule bitudi tulomba Yehowa diambuluisha. Tukadi mpindieu ne bena mudimu bavule miaba ya bungi ivua ikengela kuyisha. Ne tudi mpindieu tuyisha mu teritware imue imue njila ne njila. Katuenaku ne bua kusanka bua mudi Yehowa muandamune masambila etu anyi?

³ Disuminyina didi dipatula bipeta bimpe: Nansha mu teritware idibu batamba kuyisha, mutu anu mupeteka bantu batu bitaba mukenji wa Bukalenge, bafika too ne ku dimanya bulelela. Nanku, tudi ne bua kutungunuka ne kupinganyina bantu njila ne njila ne ditekemena dia kupeta bakuabu ba mutshima muimpe. (Yesh. 6:8-11) Anu bu muakenza bayidi ba Yezu ba kumpala, “nutambe kuya” kudi bantu ba mu teritware idibu banupeshe, nubajule dijinga dia kumanya malu a bungi a Bukalenge bua Nzambi.​—Mat. 10:6, 7, MML.

⁴ Mu ditunga dia Portugal bisumbu bia bungi bitu biyisha mu teritware yabi lumingu luonso, kadi bana betu batu amu bapeta bantu badi bu mikoko. Muanetu wa bakaji mukuabu udi ne lungenyi luimpe udi wamba ne: “Bangabanga ne kupatuka mu buambi dinda dionso, ntu nsambila Yehowa bua angambuluishe mpete muntu udi wanyisha bua kulonga Bible.” Dimue dituku wakumvuangana ne bena mudimu ba mu nzubu mukuabu wa dikoselangana nsuki bua kulonga nabu Bible. Kadi, anu muntu mukaji umue ke wakalua. Wakamba ne: “Nansha mudi bakuabu kabayi banyisha, meme ndi muanyishe.” Anu mu ngondo muine au, muntu mukaji eu wakatuadija kulombola malonga a Bible abidi. Matuku makese panyima wakatambula ne pashishe kudituaye mu bumpanda-njila!

⁵ Mudimu udi wenda wenzeka: Badi benda bamuangalaja lumu luimpe anu bu muakadianjila Yezu kuamba. (Mat. 24:14) Nansha mu miaba idi bantu kabayi ‘batumvuila,’ ku diambuluisha dia mudimu wa diyisha utudi tuenza, bamue bantu badi benda baditeka ku luseke kampanda. Tudi bamane kumanya ne: bamue kabakuanyisha, peshi mene nebabenge bulelela. Kadi nansha nanku, bantu ba nanku tudi anu ne bua kubamanyisha dilumbuluisha dia Yehowa didi dienda dilua.​—Yeh. 2:4, 5; 3:7, 8, 19.

⁶ Katuena banji kujikija mudimu to: Ki ntuetu badi ne bua kupangadija tshikondo tshidi mudimu wa diyisha ne bua kujika to. Yehowa mmumanye tshikondo menemene tshidiwu ne bua kujika. Mmumanye bikalaku kutshidi bantu bakuabu mu teritware wetu badi mua kuanyisha lumu luimpe. Lelu, bamue bantu badi mua kuamba ne: kabiena bibasankisha to, kadi dishintuluka dia amue malu mu tshimpitshimpi mu nsombelu wabu (bu mudi: dijimija mudimu, disama dikole, lufu lua muntu wabu kampanda) didi mua kuenza bua bantu aba batuadije kuteleja lumu luimpe mu tshikondo tshikuabu. Bantu ba bungi batu babenga bua kuteleja malu atutu tuyisha anu bualu mbatumanye bibi peshi anu bualu kabena ne dîba dia kututeleja. Diya kubatangila njila ne njila mu bulunda didi mua kubafikisha ku diteleja.

⁷ Bantu badi bakole bidimu bishale ebi ne bakadi ne mêku badi bangata muoyo ne mushinga wa bungi ne badi badiela nkonko idi anu Dîyi dia Nzambi mua kuandamuna. Muntu mukaji mukuabu wakabikila Bantemu babidi ku nzubu kuende ne kubambilaye ne: “Pantshivua muana mutekete, tshivua ngumvua tshivua mamu wipatshila Bantemu ne ubambila ne: kabivua bimusankisha to, pabu tshivuabu bakeba, nkuyikila amu nende malu a mu Bible. Ngakadiambila tshikondo atshi ne: pangakola, panselabu ne pangikala nkadi kuanyi, nembikile Bantemu ba Yehowa bua balue kuanyi bua kungumvuija malu a mu Bible.” Ke tshiakenzaye, ne biakasankisha Bantemu bavuaye mubikile kuende.

⁸ Udiku mua kuenza mudimu bimpe menemene anyi? Misangu yonso kabiena mua kuikala amu bantu batudi tuya kuyisha badi bavuija mudimu wetu mukole bua kuwenza mu teritware wetu to. Imue misangu tuetu bine ke batu bakoleshisha patupu mudimu eu. Tutu tupatuka mu buambi badianjile kuikala ne lungenyi lubi anyi? Bidi mua kunyanga ngikadilu wetu kabidi ne dîyi dietu ne tshilunji tshitudi natshi. Ikala ne lungenyi luimpe ne mpala wa muntu udi ne disanka. Teta mbuelelu mupepele. Ikala ushintulula mbuelelu yebe ne enze muebe muonso bua kuyilengeja. Pamu’apa udi mua kushintulula lukonko luutu ubanga nalu muyuki peshi kushintulula mvese. Konka bana betu bakuabu malu adibu bamone abasankisha mu mudimu udibu benza mu teritware au. Patuka mu buambi ne bamanyishi bashilashilangane ne kabidi ne bampanda-njila bua umanye tshidi tshienza ne: mudimu wabu wikale mulenga.

⁹ Yehowa udi wanyisha ne ubenesha mudimu wa diyisha Bukalenge, ne patudi tuwenza bidi bileja mutudi bamunange ne banange bantu netu. (Mat. 22:37-39) Nunku tuenzayi mudimu wetu too ne padiwu ujika, katuyi tupungila bua kuyisha anyi kuenza kua mudimu misangu ne misangu mu teritware umue umue.