Madimi adi matoke bua kunowa
1. Mudimu wa mushinga ukadi mutuadije mmudimu kayi?
1 Pakajikija Yezu kuyisha muntu mukaji wa mu Samaleya, wakambila bayidi bende ne: ‘Bandulukayi, numone madimi adi matoke katataka bua kunowabu.’ (Yone 4:35, 36) Mudimu wa kuyisha bantu badi bitaba Dîyi dia Nzambi ukavua mutuadije. Yezu ukavua mumone muvuawu ne bua kuenzeka pa buloba bujima. Bu mudi Yezu Mukalenge mu diulu, mmutungunuke amu ne kuambuluisha badi bawenza. (Mat. 28:19, 20) Bu mudi mudimu eu mutangile ku ndekelu, mmalu kayi adi aleja ne: mmutungunuke ne kuya anu kumpala?
2. Tela malu adi aleja ne: mudimu wa dinowa udi wenda uya kumpala.
2 Mudimu wa dinowa udi wenzeka pa buloba bujima: Mu tshidimu tshia mudimu tshia 2009, bungi bua bamanyishi pa buloba bujima buvua buvule ne bia pa lukama 3,2. Mu matunga adibu bakandike lumu luimpe, bamanyishi bavua bavule ne bia pa lukama 14. Mu luapolo luvuabu bafila ngondo yonso, bungi bua malonga a Bible buvua bupite pa 7 619 000 (bungi ebu mbupite bungi bua bamanyishi bonso ne mbupite bua malonga a Bible bua tshidimu tshishale ku bantu basue kutua ku 500 000). Bu mudi mudimu wenda uvula mu matunga a bungi, badi bakeba bikole ba misionere ba mu Gilada. Bantu badi bakula miakulu mienyi mu teritware ya mu matunga a bungi badi bitaba lumu luimpe bikole. Bidi bileja patoke mudi Yehowa ukuatshisha bikole mudimu wa kuyisha bu mukadi dinowa ditangile ku ndekelu. (Yesh. 60:22) Udiku umvua disanka bua kuyisha mu teritware wenu anyi?
3. Bamue badi mua kuamba tshinyi bua mudimu wa dinowa mu teritware wabu?
3 Mudimu wa dinowa mu teritware wenu: Bantu bakuabu badi mua kuamba ne: “Bena mu teritware wanyi kabatu batamba kuteleja to.” Kakuyi mpata, mu imue teritware, bantu batu bateleja kadi mu mikuabu kabatu bateleja to. Nansha mu ivuabu batuteleja kumpala, kabatshiena batuteleja kabidi to. Bamue bamanyishi badi mua kuamba ne: bantu ba bungi bavua mua kututeleja mu teritware ayi bakadi bitabe bulelela, tshidi tshishale ntshia kukebulula anu bakese badi bashalemu. Mmuomu anyi?
4. Tudi mua kumona mudimu wetu wa buambi mushindu kayi? Bua tshinyi?
4 Padi dinowa dituadija, ditu dilomba kuenza mudimu wa bungi too ne padidi dijika. Yezu wakaleja mudibi bikengela kuikala ne mitalu mu mudimu wa dinowa. Wakamba ne: ‘Bintu bia kunowa bidi bia bungi, kadi bena mudimu badi banyabanya. Nunku, nulombe Mukalenge wa bintu bia kunowa, atume biende bena mudimu mu kunowa kuende.’ (Mat. 9:37, 38) Mukalenge wa dinowa Yehowa, ke udi wambuluisha bua muntu amanye bulelela dîba kayi dionso ne muaba onso udiye. (Yone 6:44; 1 Kol. 3:6-8) Kadi tuetu tudi ne mudimu kayi? Bible udi wamba ne: ‘Kuna maminu ebe ne dinda, kuikishi dilolo.’ (Muam. 11:4-6) Nunku, padi mudimu wa dinowa mutangile ku ndekelu, ki ntshikondo tshia kuvunga maboko to.
5. Tudi ne bua kutungunuka ne kuyisha ne tshisumi mu teritware udi bantu bamueneka kabayi bateleja bua tshinyi?
5 Tutungunukayi ne kunowa: Nansha bikalabu bakadi bayishe bantu mu teritware wetu misangu ya bungi, kadi bamueneka kabayi bateleja, tutungunuke amu ne kuenza mudimu ne tshisumi ne mitalu. (2 Tim. 4:2) Ntatu itu ikuata bantu lelu idi ibafikisha ku dishintulula lungenyi luabu ne kuela meji bikole bua malu adi mua kubafikila. Padi bana bakola, badi mua kujinga bua kuikala mu bukubi ne kupeta ditalala dia mu lungenyi. Padi bantu batumona tutungunuka amu ne kubayisha, badi mua kututeleja. Bantu badi kabayi mua kututeleja lelu badi mua kututeleja malaba. Tudi ne bua kuyisha nansha bantu badi babenga lumu luimpe ku bukole.—Yeh. 2:4, 5; 3:19.
6. Bikala bena mu teritware wetu kabayi batuteleja, tshitudi mua kuenza ntshinyi bua kuikala amu ne tshisumi?
6 Bikala bena mu teritware wetu kabayi batuteleja, ntshinyi tshitudi mua kuenza bua kuikala anu ne tshisumi? Pa kumbusha diyisha ku nzubu ne ku nzubu, tudi kabidi mua kukeba mishindu mikuabu ya kuyisha bu mudi: miaba idibu bapanyina bintu anyi ku mudimu ne ku telefone. Tudi nansha mua kushintulula mbuelelu ya miyuki bua bantu kututelejabu bimpe. Tudi mua kushintulula mêba atudi tuyisha ne kutuadija kuyisha bu mudi ku dilolo anyi mêba adi bantu mua kuikala ku mbanza yabu. Tudi nansha mua kulonga muakulu mupiamupia bua kuyisha bantu ba bungi. Tudi mua kulua bampanda-njila ba pa tshibidilu bua kualabaja mudimu wetu, anyi kuya muaba udi bamanyishi bakese. Tuetu tumona mudimu wa dinowa eu mu mushindu muimpe, netudienzeje bua kuwenza ne muetu muonso.
7. Netuenze mudimu wa dinowa too ne dîba kayi?
7 Ba bidime batu ne matuku makese bua kupola bia pa madimi, nanku kabatu baladikija mudimu anyi bawenza ne lulengu mu tshikondo atshi to. Ke mutudi petu ne bua kuenza mudimu wa dinowa udi Nzambi mutupeshe. Kadi netuwenze too ne tshikondo kayi? Netuwenze dîba dionso dia ‘ku nshikidilu kua tshikondo etshi,’ too ne palua “nshikidilu.” (Mat. 24:14; 28:20) Anu bu bena mudimu ba Nzambi ba kale, tudi petu basue kujikija mudimu udibu batupeshe. (Yone 4:34; 17:4) Nunku, tutungunukayi ne kuyisha ne tshisumi ne disanka, ne tuikale ne lungenyi luimpe too ne ku nshikidilu. (Mat. 24:13) Mudimu wa dinowa utshidiku.
[Lungenyi lunene lua mu dibeji 2]
Padi dinowa dituadija, ditu dilomba kuenza mudimu wa bungi too ne padidi dijika