Mukanda wa Kudi Kasumbu Kaludiki

TUETU Bantemu ba Yehowa tudi ba diakalenga bushuwa! Ki ng’anu bualu tudi bamanye Yehowa, Nzambi umuepele mulelela udi ne muoyo, mufuki wa bionso to, kadi bualu tudi kabidi ne dîna diende ne tumuenzela mudimu. Ndibenesha bunenapu kayi bu edi!​—Yesh. 43:12; Eb. 8:11.

Tudi ne ditekemena dia kupeta lupandu ne tudi ne mudimu wa kuyisha lumu luimpe lua Bukalenge bua bantu bakuabu bamone pabu mua kutendelela Yehowa ne kumanyisha ditekemena dietu edi. (Mat. 24:14; Lomo 10:13, 14; 1 Tes. 5:8) Tudi kabidi ne disanka dia kuikala bu bena muntu badi batendelela Nzambi ba pa buloba bujima badi banangangane ne bambuluishangana. Diakalenga kayipu edi ditudi nadi!

Mbiakanyine mudi Bible utulomba ne: ‘Nukuatshile Yehowa mudimu ne disanka. Buelayi bienu mu bibuelelu biende ne disakidila, buelayi mu biendedi biende ne misambu ya kumutumbisha nayi. Numusakidile, nuvudijile dîna diende disanka. Bualu bua Yehowa udi muimpe; luse luende lujalame ludiku tshiendelele, lulamatu luende lua bushuwa ludiku too ne ku bikondo bionso.’ (Mus. 100:2-5) Kusadila Yehowa ne disanka mmuanda udi upetangana ne kuikala balunda bende ba menemene. Yehowa utu wenza bua malanda etu nende kuakanawu, ne tuetu tudi ne mushindu wa kuakolesha. Patudi badie nende bulunda bua nunku, tudi bamanye ne: Yehowa udi dîba dionso pabuipi bua kutuambuluisha ne kutupa makanda patudi nawu dijinga. Tudi batekemene bushuwa se: neatupe makanda a mu nyuma ne neatuludike bimpe bua tuetu kumona mua kutantamena ntatu ya mu tshikondo tshitudi etshi tshia ku nshikidilu. Nansha mutudi tupeta ntatu mivule, tudi anu ne disanka mu mudimu wetu ne tuela Yehowa tuasakidila dituku dionso, anu mudi Dîyi diende dituvuluija, ‘Yeye ke udi utulama’​—1 Pet. 5:7, MMM.

Yehowa mmutuenzele malu manene a bungi tshidimu tshishale. Mu Mpungilu wa Distrike wa “Benji ba Dîyi dia Nzambi” tuvua ne disanka dia kuikala pamue ne bawetu bakuabu binunu bivule badi bitabuja malu atudi tuitabuja petu, tuetu kuimba ne kudia pamue nabu ku mesa a mu nyuma a Yehowa. Mu Dilonga dia Mukanda dia Tshisumbu, tuakakolesha ditabuja ne dilonga dia mukanda wa Prêtons attention à la prophétie de Daniel! Tuvua kabidi ne disanka dia kupeta volime 1 wa mukanda mupiamupia wa: La prophétie d’Isaïe, lumière pour tous les humains. ‘Dikopo dietu ndiwule ne pa mishiku.’​—Mus. 23:5, MMM.

Ndisanka kayipu dia kumanya ne: bana betu ba mu nyuma miliyo ne miliyo, ba balume ne ba bakaji, mbadisangishe bua kusadila Yehowa! Kabienaku bienza disanka bua kubala luapolo lua mushindu udi mudimu wa buambi muye bikole kumpala anyi? Tuvua kabidi ne disanka bua kumona miliyo mivule ya bantu babuele mu Tshivulukilu tshia Lufu lua Mukalenge, nansha muvuaku ntatu mikole. Patudi tutangila budimi budi bualabale pa buloba bujima, bidi bimueneka patoke ne: “Bulelela, bintu bia kunowa bidi bia bungi.” (Luka 10:2) Tshidimu tshishale, kuvua muayene wa balongi ba Bible 5 555 ku lumingu luonso, balongi aba e kuya kumpala kufika too ne ku ditambula. Nansha mudi mudimu wa dinowa muikale wa bungi mu amue matunga kupita mu makuabu, tudi anu ne disanka bua bionso bidi Yehowa wenda ukumbaja ebi. Ntshijadiki tshimueneke patoke tshia mudiye ubenesha madikolela masanga a basadidi bende.

Dibaka dia Nzubu ya Bukalenge mipiamipia mbualu bukuabu budi busankishe bantu bikole. Tudi ne disanka divule dia kumona mudi bana betu ba mu matunga adi kaayi ne mpetu ya bungi badifile ne muoyo mujima bua mudimu eu. Tusumbu tua bibaki bavuabu balongeshe mua kuibaka bakadi bibake Nzubu ya Bukalenge ya bungi. Bawetu aba badi baya ku tshisumbu ne ku tshisumbu mu ditunga diabu bua kuenda kulombola midimu eyi ya dibaka dia Nzubu ya Bukalenge. Bu mutshidibi bikengela Nzubu ya Bukalenge ya bungi, badi bela lubila bamanyisha bana betu badi mu matunga mapele bua badifile ku budisuile bua mudimu eu. Biwikala udi mu ditunga dia nanku, ntshinyi tshidi tshikukanda bua wewe kudifila? Ndisanka kayipu didi nadi bana betu dia kuikala ne wabu Nzubu wa Bukalenge mudibu mua kudisangishila bua kutendelela Yehowa! Bushuwa, buonso badi ne dianyisha kudi bana betu ba pa buloba bujima badi bafila mpetu yabu bua mudimu eu wa dibaka kuenzekawu biakane.

Diumvua bua mutudi babinge ku tubadi didi dituenza disanka dia bungi. Kadi, mu matunga mavule mudi banene badi bakeba bua katutungunuku ne kutendelela Yehowa. Nansha bua bionso ebi, tudi anu bashindika se: nansha baluishi betu bikale bungi kayi ne basadidi bende bamueneka bu badi kabayi ne bukole, kabiakumukolela bikalaye musue bua kubambuluisha. (2 Kul. 14:11) Ne disanka munda, tudi tunuela kalumbandi, nuenu bana betu bonso badi badisuike bua kushala anu mu ntendelelu mulelela.

Bu mutudi tukumbaja ne disanka majitu etu a buena-Kristo, tutungunukayi ne kukolesha ditabuja dietu ne tueyemene Yehowa bua kumona buludiki buende. (Nsu. 3:5, 6) Katuteketshi mu maboko, nansha bikale Yehowa mua kulekela muena lukuna utukengeshe. Vuluka muvua Elisha mukankamije musadidi wende uvua ne buôwa ne: ‘Kutshinyi nansha, bualu bua badi netu mbapite badi nabu ku bungi.’ (2 Bak. 6:15-17) Anu bu muakenzekabi mu matuku a Elisha, lelu’eu tshiluilu tshia Yehowa tshia mu diulu tshidi pabuipi bua kukuba malu a ntendelelu mukezuke. Tudi batangile kumpala ne ditekemena bualu bua malu onso adi mu bianza bia Yehowa ne kakuena tshisamba tshidi mua kutuangana nende mpala ne kutshimuna. Ukadi muteke Muanende mu bukalenge ne mumupeshe bukokeshi buonso. “Disanka didi kudi bonso badi bamueyemena.”​—Mus. 2:1-6, 12.

Bana betu basuibue nuenu bonso nudi ku muoyo wetu misangu yonso. Tudi tusambila dîba dionso bua yonso wa kunudi ‘ikale mukumbane ne mutuishibue bikole bua malu onso adi Nzambi musue.’​—Kolos. 4:12, NW.

Bana benu,

Kasumbu Kaludiki ka Bantemu ba Yehowa