Lenga mutshima wa mulongi webe
1 Kumpala kua Yezu kuya mu diulu wakambila bayidi bende bua kuyisha bakuabu mua “kuenza” malu onso avuaye mubambile. (Mat. 28:19, 20) Padi malu adi muntu uteleja amulenga ku muoyo, udi ufika ku “dienza” tshivua Yezu muambe. (Mus. 119:112) Mmunyi muudi mua kulenga mutshima wa muntu uudi ulonga nende Bible?
2 Lomba Yehowa akuludike: Kuvuija bantu bayidi mmudimu wa kudi Nzambi. Tshidi ne mushinga wa bungi bua tuetu kumona mua kukumbaja mudimu wetu bimpe mmabenesha ende, kadi ki mmamanya atudi nau to. (Bien. 16:14; 1 Kol. 3:7) Nunku, kulomba Yehowa diambuluisha bua kulongesha bakuabu bulelela kudi ne mushinga wa bungi.—Yesh. 50:4.
3 Ujingulule tshidi mulongi webe witabuja: Bua kupeta meji a kumanya tshia kuamba bua kulenga mutshima wa muntu, bidi bikengela kuanji kumanya tshidiye witabuja ne bua tshinyi udi utshitabuja. Bua tshinyi mulongi udi umona dilongesha kampanda dimusankisha? Tshidi tshimujadikila ne: ndilelela ntshinyi? Dimanya dia mushindu’eu didi mua kutuambuluisha bua kuakula ne busunguluji.—Bien. 17:22, 23.
4 Patula ngenyi ya meji miangatshila mu Bible: Mulongi udi ne bua kufika ku diumvua bulelela bimpe. (Bien. 17:24-31) Tulejayi bimpe tshitudi tutekemenyina malu kampanda. (1 Pet. 3:15) Kadi wenze nunku misangu yonso mu bulenga ne lutulu.
5 Shindika dilongesha edi ne bilejilu: Bilejilu kabiena anu biambuluisha mulongi bua kumvuaye patupu to, kadi bidi kabidi bilenga mutshima wende. Bilejilu bidi bilenga lungenyi ne mutshima wa mulongi. Yezu uvua wenza nabi mudimu misangu ya bungi. (Mako 4:33, 34) Kadi bua tshilejilu kuambuluishatshi muntu, tshidi ne bua kuikala tshipetangana ne bualu bunudi nuyikila, ne tshikale tshitangila kabidi nsombelu wa mulongi webe.
6 Leja mushinga wa ditumikila bulelela: Bantu batu basue kumanya mushinga wa ditumikila bidibu balonga. Wambuluishe mulongi webe bua amone lungenyi ludi mu mêyi a Paulo adi mu 2 Timote 3:14-17.
7 Kuteketshi mu mikolo bikala mulongi kayi wenza biudi umulongesha to. Bantu bonso kabakuteleja nansha. (Mat. 13:15) Nansha nanku, bamue bantu badi balua bena ditaba. (Bien. 17:32-34) Wikale udienzeja bua kulenga mitshima ya bantu ne lumu luimpe bua kuambuluisha bavule bua kuitaba ne “kuenza” bionso biakalomba Yezu.