“Ndi nshala mushindame! Ndi nshala mushindame! Ndi nshala mushindame!”

¹ Mêyi aa nga muena Kristo wa lulamatu wakapanduka ku dishipa dia bantu dia bena Nazi ne adi umvuija kabidi ditantamana dia binunu ne binunu bia Bantemu, batshidi ne muoyo ne bakadi bafue, bakashala bashindame nansha muvua bena Nazi babakengesha. (Ef. 6:11, 13) Malu abu adi aleja dikima divuabu nadi ne mushindu wakatshimunabu adi alenga bikole ku muoyo aa mmalonda mu bande wa video wa: La fermeté des Témoins de Jéhovah face à la persécution Nazie. Tudi tukankamija bantu bonso mu tshisumbu bua kumonabu bande eu ne kulondelangana malu amonabu.

² Keba mandamuna a nkonko eyi: (1) Bua tshinyi Bantemu ba Yehowa bakashala bashindame kumpala kua bena Nazi? (2a) Mmuenenu kayi ivua ibengangana pa bidi bitangila dielangana dia muoyo, ne mbua tshinyi? (2b) Mmushindu kayi uvua bualu ebu bulenge mêku a Bantemu? (3) Mbantemu bungi kayi bakelabu mu maloko manene, mmushindu kayi uvuabu babasunguluja ne bakuabu, ne mmunyi muvua mpulushi ya Gestapo ibenzela malu? (4) Ntshinganyi tshiakabenga bana betu aba kufuta bua kubalekelabu? (5a) Mmunyi ne ndîba kayi divua Bantemu ba Yehowa baleje patoke malu mabi a tshikisu a bukalenge bua Hitler? (5a) Hitler wakenza tshinyi? (6) Mmunyi muvua buena-muntu bua Bantemu ba Yehowa bupandishe muoyo wabu ne wa bakuabu, ku malu a mubidi ne a mu nyuma? (7) Mmusambu wa Bukalenge kayi wakenzabu mu buloko bunene kampanda? (8) Mbilejilu kayi bia balume, bakaji ne bansonga ba lulamatu bidi bikusaka bua kulama muoyo-mutoke kudi Yehowa nansha wewe mua kukenga mushindu kayi? (Tangila kabidi Annuaire 1999, dibeji 144-147.) (9) Bu muudi Ntemu wa Yehowa, bande wa video eu udi ukulongesha tshinyi pa bidi bitangila diditapulula ne bena panu?

³ Tshilejilu tshilenga tshia Bantemu ba Yehowa tshileja mu bande wa video wa Fermeté tshidi mua kuambuluisha bansonga nansha bantu badi kabayi Bantemu bua kutantamena malu makole bu mudi dibenga kumvuila bakuabu, ntatu mitukebela kudi balunda ne kuondo ka muoyo. Biwikala nsonga udi uya mu kalasa ka bikadilu anyi mu iniversite, udiku mua kukeba mushindu bua balongeshi benu kulejabu bande eu mu kalasa anyi? Pamu’apa udi mua kubapesha bande umue ne kubumvuija ne: mbindidimbi bia bualu bumanya anyi filme udi ne dilongesha dia malu a mu nsombelu.

⁴ Bande wa video wa Fermeté mbande mulenga mutambe bua kuleja mushindu udi dilongesha dia Nzambi ditukolesha mu nyuma bua kusankisha Nzambi pa kushala balamate malu adi makane. (1 Kol. 16: 13) Udi mua kumumona ne bonso batu banyisha bulelela.