Kuelakanyi to!
1 Patudi pabuipi ne kuya mu buambi bua ku nzubu ne ku nzubu, kujuka bua kupatuka ku wetu nzubu ke kudi mua kuikala bualu budi mua kutukolela. Kudiumvua ne: katuena bakumbane bua kuenza mudimu eu kudi mua kutufikisha ku dielakana bua kuya kuambila “bantu ba mishindu yonso” bulelela. (1 Tim. 2:4, NW) Kadi bua tshinyi katuena ne bua kuelakana bua kuyisha lumu luimpe?
2 Mmukenji wa Yehowa: Yehowa mmumanyishe dîyi diende mu Bible. Patudi tutuadila bakuetu mukenji eu, tudi tubamanyisha ngenyi yende, kadi ki nyetu to. (Lomo 10:13-15) Padi bantu babenga mukenji wa Bukalenge, Yehowa ng’udibu babenga. Kadi, kabiena bitutekesha mu maboko to. Tudi bashindika se: mukenji eu neufike ku dilenga mitshima ya bantu badi ne dijinga dikole dia kumona nsombelu wa panu ushintuluka ne badi bamanye se: badi ne bua kulonga malu a bungi a mu nyuma.—Yeh. 9:4; Mat. 5:3, 6.
3 Yehowa udi ukoka bantu: Muntu uvua ubenga kututeleja kale udi mua kufika mpindieu ku ditaba bualu nsombelu wende udi mua kuikala mushintuluke ne bumue mmufike ku ditekesha mutshima wende. Mpindieu Yehowa udi mua kuleja muntu au bulenga ne ‘kumukoka.’ (Yone 6:44, 65) Padibi bienzeka nunku, tudi ne bua kuanyisha bua Yehowa akuate netu mudimu ne kulekela banjelu batulombole tupete bantu ba nanku.—Buak. 14:6.
4 Nzambi udi utupesha nyuma wende: Nyuma munsantu udi utuambuluisha bua kuakula “ne dikima, batekemena kudi [Yehowa].” (Bien. 14:1-3, Mukanda wa Mvidi Mukulu [Katolike, MMM]) Patudi tuvuluka ne: bukole ebu budi butukuatshisha mu mudimu wetu, katuakuelakana bua kumanyisha bantu netu bulelela, peshi bena mudimu netu, balongi netu, balela betu, bantu badi balonge tulasa tua bungi ne bakuabu badi ne bubanji.
5 Yezu wakatulongesha mushindu wa kuenza mudimu: Yezu uvua wela nkonko ivua yelesha bantu meji, ufila bilejilu biakanyine ne welangana meji ne bantu pa Dîyi dia Nzambi. Uvua umvuija bulelela ne muoyo mujima mu mushindu mupepele uvua ukoka bantu. Ngenzelu yonso eyi itshidi anu mimpe too ne matuku etu aa. (1 Kol. 4:17) Bikondo ne miaba itudi tuyisha bidi mua kushilangana, kadi mukenji munene wa Bukalenge udi wuowu anu umue umue au.
6 Tudi ba diakalenga bua mudi Yehowa ukuata netu mudimu bua kuambuluisha bantu mu mushindu wa pa buawu udi mua kubapandisha. Katuelakanyi to! Tuikalayi ne dikima ne tulekele Yehowa ‘atunzuluile tshibi tshia dîyi’ bua bumue tuamona mua kumanyisha bakuetu lumu luimpe.—Kolos. 4:2-4.