Yehowa udiku bulelela ukutabalela anyi?

Mamu mukuabu uvua ne lutatu lua kuitaba ne: Yehowa uvua mua kumona kudiye bualu budi mua kumusaka bua kumutabalelaye. Wakamba ne: “Lungenyi lua kudimona tshiyi ne mushinga ludi mua kuikala imue misangu lutatu lundi nduangana nalu.” Udiku pebe ne lungenyi lua nunku anyi? Biobi nanku, udi mua kudiebeja ne: Yehowa udiku bulelela utabalela yonso ku batendeledi bende anyi? Diandamuna didi ne: eyowa! Tudi tupeta bijadiki bia mudi Yehowa utabalela muntu mu mêyi a Yezu adi mu mvese eu.​—Bala Yone 6:44.

Ntshinyi tshivua Yezu uvua mumanye bumuntu bua Yehowa ne disua diende bimpe kupita bantu bonso muambe? (Luka 10:22) Yezu wakumvuija ne: “Muntu kena mua kulua kundi padi Tatu udi muntume kayi mumukoke nansha.” Nunku, bua tuetu kulua bayidi ba Kristo ne batendeledi ba Yehowa Tatu wetu wa mu diulu, anu Yehowa nkayende mutukoke kudiye. (2 Tesalonike 2:13) Tuetu Bumvue tshivua Yezu usua kuamba, netumone mudi mêyi ende ajadika mudi Nzambi utabalela muntu yonso wa kutudi.

Mêyi a ne: Yehowa udi utukoka kudiye adi umvuija tshinyi? Muaku wa pa muanda wa mu tshiena Greke udibu bakudimune “kukoka,” badi kabidi benza nawu mudimu bua kuakula bua kukoka mishipa mu tupamba. (Yone 21:6, 11) Yehowa udiku utukoka ku bukole kabiyi ku disua dietu, utuenzeja bua kumuenzela mudimu ku bukole anyi? Tòo. Yehowa mmutupeshe budikadidi bua kudisunguila malu, kena wenzeja muoyo wetu bua kukangukawu. (Dutelonome 30:19, 20) Yehowa udi ukeba munkatshi mua mioyo ya miliyo ne miliyo ya bantu badi pa buloba ebu, ukeba bantu badi ne mmuenenu muakane. (1 Kulondolola 28:9) Padiye upeta muntu wa mushindu eu, udi umuakidila ne musangelu wonso. Mushindu kayi?

Yehowa udi ukoka ne lutulu muntu udi ne muoyo “mudiakaje.” (Bienzedi 13:48) Yehowa udi wenza nunku mu mishindu ibidi: ku diambuluisha dia mukenji wa lumu luimpe wa mu Bible udi ulenga muntu yonso wa kutudi ne ku diambuluisha dia nyuma wende muimpe. Padi Yehowa umona muoyo wa muntu udi mudiakaje bua kuteleja bulelela bua mu Bible, udi wenza mudimu ne nyuma wende bua kuambuluisha muntu eu bua umvue ne atumikile bulelela ebu mu nsombelu wende. (1 Kolinto 2:11, 12) Kakuyi diambuluisha dia Nzambi, katuena mua kulua bayidi balelela ba Yezu ne kulua batendeledi ba lulamatu ba Yehowa to.

Mêyi a Yezu adi mu Yone 6:44 adi atulongesha tshinyi bua Yehowa Nzambi? Yehowa udi ukoka bantu bualu udi umona bualu kampanda buimpe mu mioyo yabu ne udi utabalela yonso wa kudibu. Pakumvua mamu utudi batele kuulu eku bimpe bualu bulelela bua mu Bible budi bukolesha ebu, biakamuambuluisha. Udi wamba ne: “kuikala mutendeledi wa Yehowa ndiakalenga dinene ditambe. Bikala Yehowa yeye munsungule bua kuikala mutendeledi wende, mbuena kuamba ne: mmungangate ne mushinga ku mêsu kuende.” Kadi wewe pebe udi wela meji kayi? Mushindu udi Yehowa utabalela mutendeledi wende yonso udiku ukusaka bua kusemena pabuipi nende anyi?