Semena pabuipi ne Nzambi

‘Yehowa, wewe udi mummanye’

“KAKUENA bualu budi mua kunemena muntu bujitu bu kumanya ne: kakuena muntu udi umutangila ne udi umumvuila to.”a Ukatuku pebe muambe mêyi a buena aa anyi? Kutuku muanji kudiumvua ne: kakuena muntu udi uditatshisha bua bualu buebe anyi udi kayi ukumvuila paudi mu lutatu anyi? Pikabi nanku, bidi mua kukukolesha ku muoyo bua kumanya ne: Yehowa udi uditatshisha bikole bua batendeledi bende ne mmumanye malu onso adi abenzekela dituku dionso. Mêyi a Davidi adi mu Musambu wa 139 adi atujadikila bualu ebu.

Bu muvua Davidi mutuishibue ne: Nzambi uvua umutabalela, wakamba ne: “Yehowa, wewe wakutangila munda muanyi, wakummanya!” (Mvese wa 1) Muaba eu, Davidi muangate tshilejilu tshimpe be. Muaku wa tshiena Ebelu udibu bakudimune ne: “wakutangila munda” udi mua kumvuija kumbula or (Yobo 28:3), kutangila buloba (Balumbuluishi 18:2) anyi kukeba bua kumanya malu a tshilumbu kampanda bilondeshila mikenji. (Dutelonome 13:14) Bushuwa, Yehowa mmutumanye bimpe, bienza anu bu ne: udi ukonkonona kalu ne kalu konso ka mu nsombelu wetu. Mukalenge Davidi udi utulongesha ne: Yehowa udi utabalela muntu ne muntu wa ku batendeledi bende. Udi utangila munda muabu ne ubamanya muntu ku muntu.

Davidi udi umvuija mudi Nzambi ukonkonona bantu mu katoba ne mu katoba padiye wamba ne: ‘Wewe muine udi mumanye pangashikama panshi ne pangajuka; udi ujingulula meji anyi pantshidi kule.’ (Mvese 2) Mu ngumvuilu kampanda, Yehowa udi “kule,” bualu udi mu diulu. Kadi, mmutumanye patudi tusomba, imue misangu ku dilolo anyi patudi tujuka mu dînda bua kutuadija midimu yetu ya buatshia buila. Mmumanye kabidi meji etu, majinga etu ne malu atudi basue kuenza. Davidi uvuaku utshina bua muvua Yehowa umukonkonona nunku anyi? Tòo, uvua ne disanka. (Mvese 23, 24) Bua tshinyi?

Davidi uvua mumanye ne: Yehowa udi ne malu mimpe adi amusaka bua kukonkonona batendeledi bende. Wakafunda bua Yehowa ne: ‘Wewe udi ujingulula kuenda kuanyi ne kulala kuanyi panshi, udi mumanye bienzedi bianyi bionso.’ (Mvese 3) Dituku dionso edi, Yehowa mmumanye ‘bienzedi bietu bionso’ tuambe ne: bilema bietu ne malu mimpe atudi tuenza. Utu wimanyina pa malu mimpe peshi pa malu mabi? Muaku wa tshiena Ebelu udibu bakudimune ne: ‘kujingulula’ udi mua kumvuija “kusenga” anyi “kupepula” anu mutu tshidime upepula bisota bua kushala ne ntete idiye nayi bualu. Tshiambilu “udi mumanye” ntshikudimuina ku muaku wa tshiena Ebelu udi mua kumvuija “kunanga.” Padi Yehowa ukonkonona malu adi batendeledi bende benza ne bamba, udi usungulamu adi mimpe. Bua tshinyi? Bualu udi wanyisha bionso bidibu benza bua kumusankisha.

Musambu wa 139 udi utulongesha ne: Yehowa udi utabalela batendeledi bende bikole. Udi ubakonkonona ne ubatangila mu nsombelu wabu wa buatshia buila. Nanku, mmumanye ntatu itu ibafikila ne mmumanye dikenga didibu mua kuikala nadi padi ntatu ya nunku ibatulukila. Udiku umvua muoyo ukusaka bua kutendelela Nzambi wa dinanga eu anyi? Biobi nanku, ikala mujadike ne : Yehowa ‘kakupua muoyo bua mudimu weba ne bua dinanga diwakaleja bua dîna diende.’​—Ebelu 6:10.

[Mêyi adi kuinshi]