Buena-muntu bua bena Kristo budi ne mushinga kayi?

¹ “Kakuena muntu udi muditole pa nkaya kayi dijinga ne bakuabu to.” Mêyi aa nga mukuabu mufundi wa tusala wa mu bidimu bia 1600 ne adi ambulula anu tshidi Bible wamba bua dijinga dinene didi nadi muntu yonso: buena-muntu. (Nsu. 18:1) Malanda etu ne bena Kristo bakuabu adi akumbaja dijinga edi. Mmu mishindu kayi idi yambuluisha?

² Mu mudimu wa buambi: Bumue bualu bunene mmushindu utu bana betu batukankamija ne batukuatshisha mu mudimu wa buambi. Yezu wakatuma bayidi bende “ku babidi ku babidi” bua kuyisha. (Mâko 6:7; Luka 10:1) Bilondeshile tshilejilu etshi, patudi mu mudimu wa buambi ne bakuabu, tudi tumona bulelela bua mêyi adi mu Muambi 4:9, 10. Patudi tuenza mudimu wetu eu pamue ne bakuabu, ditabuja, butumike ne dinanga dia binetu bidi bitupesha dikima ne bijululula lukunukunu luetu.

³ Budiku bua kutuambuluisha: Buena-muntu buetu budi kabidi butukankamija ne butuleja tshia kuenza mu ntatu ne kukandamena mateta. Disomba ne bana betu bena Kristo didi mua kukoka ntema yetu ku mvese kampanda idi yakula bua malu adi atutangila. Badi nansha mua kusambila bua bualu buetu bu mututu petu tubasambidila. (2 Kol. 1:11) Nunku tshilejilu tshiabu tshimpe tshidi tshitusaka bua kuenza malu malenga ne tshitukankamija.

⁴ Mu bisangilu: Patudi tubuela pa tshibidilu mu bisangilu bia tshisumbu, bulunda ne bena Kristo netu budi butupa masanka. (Eb. 10:24, 25) Badi balongeshamu malu a bungi a mu nyuma, ne patudi tubuela mu bisangilu tudi tukolesha malanda etu ne bena kuitabuja netu. Mu bisangilu ebi tudi tupeta mushindu wa kuteleja mudi bana betu baleja ditabuja diabu padibu ne midimu ya kuenza ku tshiakuidi peshi padibu bandamuna munkatshi mua bakuabu badi mu bisangilu. (Lomo 1:12) Tudi tukolesha kabidi malanda etu patudi tuyukila ne bakuetu kumpala ne panyima pa bisangilu. Bikondo bia nunku bidi bitupesha mushindu wa kulondelangana malu atudi bamone adi akolesha ditabuja. Bidi biambuluisha ngikadilu yetu patudi tusangila pamue ne bantu badi banange Yehowa, banange Dîyi diende, mudimu wende ne bantu bende.​—Filip. 2:1, 2.

⁵ Tudi tujinga kuikala bulunda ne bena Kristo netu. Bu bana betu bena Kristo kabayiku, kuenda mu njila mubumbakane udi ufikisha ku muoyo kuvua mua kuikala kukole be. Kadi, bua dinanga ne ditukankamija diabu, tudi mua kutungunuka ne luendu luetu batangile mu bulongolodi bupiabupia buakane bua Yehowa.​—Mat. 7:14.