Dikonkonona dia buobume bulelela bua buena-muntu mu bande wa video wa Unis grâce à l’enseignement divin
Mutangidi wa tshijengu kampanda uvuapu pavua muanetu mukuabu ulonga ne muntu mukaji kansanga uvua kayi muanji kubanga kubuela mu bisangilu bia tshisumbu. Yeye e kumulomba bua kutangila bande wa video wa Unis grâce à l’enseignement divin. Lumingu alu wakabuela mu bisangilu ne wakamba ne: uvua ne disanka dia bungi dia kubuelamu. Bua tshinyi bande wa video eu wakapatula bipeta bia mushindu eu pa lukasa? Bivua bisankishe mamu eu bikole pa kumona buobumue bua buena-muntu bua mushinga mukole budi munkatshi muetu pabi bantu bakuabu eku bikale ne tshikisu ne bakinangana.—Yone 13:35.
Tangila bande wa video eu bua kumona ne kumvua mudi ditalala ne dinanga didi nadi Bantemu ba Yehowa munkatshi muabu pa buloba bujima. Panyima wele meji pa nkonko eyi:
(1) Bua tshinyi “Dilongesha dia Nzambi” divua tshiena-bualu tshikumbanyine bua mpungilu ya distrike ivua mienzeke mu 1993-1994?—Mika 4:2.
(2) Bulelela bua mu Bible buvua bumvuija tshinyi kudi amue mêku? Budi bumvuija tshinyi buebe wewe?
(3) Bua tshinyi mbimpe bua Yehowa atulongeshe?—Mus. 143:10.
(4) Nntatu kayi idi ikengela kutantamena bua kulongolola mpungilu ya bantu bafuma mu matunga a bungi?
(5) Mmunyi muuvua mumone dikumbana dia Musambu 133:1 ne Matayo 5:3 mu mpungilu ya bena Kristo iuvua mubuele?
(6) Tshijadiki tshia patoke tshidi tshileja bukole bua bipeta bia dilongesha dia Nzambi ntshinyi?—Buak. 7:9.
(7) Mbungi kayi bua bavua batambule mu bena Kristo balelela buvua bupite bua katshia ne katshia?
(8) Mmêyi kayi mamba kudi Mika, Petelo ne Yezu adi enda akumbana munkatshi mua Bantemu ba Yehowa?
(9) Tshidi tshikujadikila ne: dîku dia disanka ne dikale mu buobumue ki tshilota ntshinyi?
(10) Nnganyi uwaleja bande wa video eu ne bua tshinyi?
Kunyima kua muanetu wa bakaji mukuabu mumane kumona bande eu, wakumvuija mu mêyi makese ne: “Bande wa video eu neangambuluishe bikole bua kuikala mvuluka ne: bana betu bena Kristo ba bungi pa buloba bujima badi basadila Yehowa ne lulamatu dîba edi. . . . Buobumue buetu bua buena-muntu budi ne mushinga bushuwa!”—Ef. 4:3.