Bande wa video udi ne malu atudi ne bua kuelela meji bikole
“Bande eu udi weleshangana meji bikole!”
“Uvua muntuile bikole be!”
“Mvua mumvue mua kudila!”
1 Ke muuvuaku pebe mumvue pawakamona bande wa video wa Les jeunes s’interrogent. . . Comment me faire de vrais amis? bua musangu wa kumpala anyi? Kukadi ndambu wa bidimu uvua muanetu mukuabu wa balume utshivua nsonga mupete lutatu lua bungi anu bualu uvua wenda ne balunda babi. Bakamufikisha ku dilekela kunanga malu a Yehowa, kumufikishabu ne ku dikosa nende malanda. Pakapatulabu bande wa Les vrais amis nsonga au wakalua kuamba ne: “Pamvua ntangila bande eu misangu ne misangu, binsonji bivua bimpueka ku mêsu. Meme kuela Yehowa tuasakidila bua muvuaye mungambuluishe anu pa dîba.” Bande eu wakamusaka bua kushintulula nsombelu wende ne bua kubanga kuenda ne balunda bimpe. Wakamba kabidi ne: “Mbimueneke ne: nuenu badi bapatule bande eu nudi bamanye bimpe ntatu itu bansonga bapetangana nayi.” Nuenu baledi ne nuenu bana, kanuenaku mua kutangila kabidi bande eu panualonga mu dîku musangu udi ulua anyi? Panudi nutangila bande eu, ikalayiku nuanji numuimanyika ku ndekelu kua tshitupa tshionso bua kuandamuna nkonko idi mu bikoso bidi bilonda ebi mu bulelela kanuyi nutshinangana.
2 Mbangilu: Mulunda muimpe nnganyi?—Nsu. 18:24.
3 Malu atu apangisha bantu bua kudia bulunda: Ntshinyi tshiudi mua kuenza bua kubenga kudiumvua bu ne: bantu bonso mbakubenge? (Filip. 2:4) Bua tshinyi mbimpe wewe kulengeja bikadilu biebe? Kadi nnganyi udi mua kukuambuluisha bua kubilengeja nanku? Ntshinyi tshidi mua kukupetesha mushindu wa kupeta balunda ba bungi? Kadi udi mua kubapetela penyi?—2 Kol. 6:13.
4 Bulunda ne Nzambi: Mmunyi muudi mua kudia bulunda bua menemene ne Yehowa? Bua tshinyi mbimpe wewe kudienzeja bua kubudia nanku? (Mus. 34:8) Nnganyi udi mua kutamba kukuambuluisha bua wewe kushemeja bulunda buebe ne Nzambi?
5 Balunda babi: Balunda babi mbalunda kayi? (1 Kol. 15:33) Mmunyi mudi balunda babi mua kunyangila muntu buena Kristo buende? Muyuki wa mu Bible wa bualu Dina udi ukulongesha tshinyi?—Gen. 34:1, 2, 7, 19.
6 Bualu bua matuku etu aa: Ntshinyi tshiakafikila Tara pavuaye udiumvua muikale anu nkaya? Wakamba tshinyi bua kudibingisha bua bulunda buvuaye mudie ne basonga bavua kabayi Bantemu bu yeye? Balunda bende abu bakamuteka mu nsombelu kayi mubi? Ntshinyi tshivua tshipangishe baledi ba Tara bua kumona ne: Tara ukavua mu nsombelu mubi? Kadi mmunyi muvuabu bashintulule malu abu bua kumona mua kumuambuluisha bua kujalamaye mu njila wa Yehowa? Mmunyi muvua muanetu wa bakaji kampanda uvua mpanda-njila muleje muvuaye mulunda muimpe wa Tara? Bua tshinyi bena Kristo badi ne bua kulonda tshidibu bambe mu Nsumuinu 13:20 ne mu Yelemiya 17:9? Ndilongesha kayi dia mushinga divua Tara mupete?
7 Tshitupa tshia ndekelu: Mmalongesha kayi audi mupete mu bande wa video eu? Mmunyi muudi mua kuambuluisha nende bantu bakuabu?—Mus. 71:17.