Tuyishayi ku nzubu ne ku nzubu
1. Ndukonko kayi ludibu batuele bua mudimu wetu wa ku nzubu ne ku nzubu? Bua tshinyi mbatuelalu?
1 Tshibumba tshia Nsentedi tshia kale tshia mu dia 1 Kabalashipu 1893 tshiakaleja mushinga udi nawu mudimu wetu wa diyisha ku nzubu ne ku nzubu. Tshiakamba ne: “Bantu bakadi bayishayishe mu mishindu mishilashilangane ya mudimu wetu mbamanye bimpe ne: mudimu wa kuya ku nzubu ne ku nzubu bua kuyisha ne mukanda wa L’AURORE DU MILLÉNIUM ke mushindu mutambe buimpe wa kuyisha mpindieu.” (Zion’s Watch Tower) Bantu ba pa buloba bujima mbalue kubanga kumanyina Bantemu ba Yehowa ku mudimu eu. Bu mudibi bienda bikola mu amue matunga bua kupeta bantu ku mabu matuku aa, kuyisha kua ku nzubu ne ku nzubu kutshidi anu ne mushinga anyi?
2. Ntshinyi tshidi tshileja ne: mudimu wa diyisha ku nzubu ne ku nzubu mbawangatshile mu Bible?
2 Mmudimu wa mu Bible, ne ngua mushinga mukole: Mudimu wa kuyisha ku nzubu ne ku nzubu mbawangatshile mu Bible. Yezu wakalongesha bayidi bende 70 e kubatuma ku babidi ku babidi bua kuyabu kuyisha ku nzubu ya bantu. (Luka 10:5-7) Bible udi wamba bua bayidi ba Yezu matuku makese panyima pa lufu luende ne: ‘Ku dituku ku dituku, mu ntempelo ne mu nzubu yabu, kabakalekela bua kuyisha ne kubambila lumu luimpe.’ (Bien. 5:42) Mupostolo Paulo pende wakayisha ne tshisumi tshionso ku nzubu ne ku nzubu.—Bien. 20:20.
3. Ngamue malu kayi mimpe adi kuyisha kua ku nzubu ne ku nzubu kutupetesha?
3 Mudimu wa kuyisha ku nzubu ne ku nzubu utshidi anu mushindu muimpe wa kuamba lumu luimpe lelu eu. Udi utuambuluisha bua ‘kukeba’ bantu bimpe ne lungenyi ne bulongame. (Mat. 10:11) Padi bantu ku nzubu yabu, batu batukije mioyo yabu. Patudi tuyukila nabu mpala ne mpala, tumvua mudi dîyi diabu, tumona mudi tshilunji tshia mpala yabu ne malu adi kumbelu yabu, netufike ku dimanya malu atubu banange ne adibu nawu ku muoyo. Malu aa asombele atufikisha ku diyukila nabu bimpe menemene.
4. Mmunyi mutudi mua kufika ku dipatula bipeta bimpe mu mudimu wa kuyisha ku nzubu ne ku nzubu?
4 Ikalaku ushintulula programe webe: Mupostolo Paulo uvua musue kuikala ushintulula malu ende anu bua “bualu bua lumu luimpe.” (1 Kol. 9:23) Pamuapa tudi petu mua kushintulula programe wetu bua kuyisha mêba atu pamuapa bantu ba bungi ku mabu, bu mudi ku dilolo, mu Disambombo ne mu Dia lumingu anyi matuku atu bantu kabayi baya ku midimu. Ikala ufunda bua kumanya ku nzubu yonso kuuvua kuyi musangane bantu, pashishe upingana dituku dikuabu dia mu lumingu anyi dîba dikuabu dia dine dituku adi.
5. Mmunyi mudi bantu badi ne butekete kampanda bua mubidi mua kuyishaku pabu ku nzubu ne ku nzubu?
5 Nansha bantu badi ne butekete kampanda bua mubidi badi pabu mua kuyisha ku nzubu ne ku nzubu. Pamuapa tudi mua kuangataku muanetu wa mushindu eu kuya nende miaba ya pabuipi bua kumonaye mua kuyisha bimpe kabiyi bimutshiokesha. Tshilejilu, muanetu wa bakaji mukuabu uvua kayi upuyakana bimpe uvua uyisha anu ku nzubu umue wenzaku minite 30 ushisha kuya ku mukuabu. Wakumvua disanka dia bungi pakabangabu kuya nende mu buambi kudi bena mu tshisumbu!
6. Bua tshinyi tudi ne bua kuikala ne tshibidilu tshia kuyisha ku nzubu ne ku nzubu?
6 Tuetu tuyisha ku nzubu ne ku nzubu, tudi tutungunuka anu ne kupeta bantu badi bu mikoko. Tshilejilu, muanetu mukuabu wa balume wakakokola ku nzubu kampanda e kumvuaye bamuela dîyi ne: “Buela. Nkadi mumane kukumanya. Bualu ndi mfuma ku dilomba Nzambi bua antumine muntu udi mua kungambuluisha, diakamue mpaudi pebe ukokola apu. Nzambi mmumvue kulomba kuanyi, mukutume.” Bualu ebu budi buleja ne: Yehowa udi ubenesha mudimu wa diyisha ku nzubu ne ku nzubu eu. (Mat. 11:19) Difila ne muoyo webe mujima bua kuikala ne tshibidilu tshia kuyisha ku nzubu ne ku nzubu.