Baledi, longeshayi bana biangatshile patshidibu batekete

¹ ‘Yisha muana mu njila udiye ne bua kuendela; nunku pakolaye, kena umukamu.’ (Nsu. 22:6) Baledi, binuikala kanuyi basue bua bana ‘bumuke’ mu njila wa bulelela, ntshikondo kayi tshinudi ne bua kutuadija dibalongesha? Biangatshile anu patshidibu batekete!

² Pakamba Paulo ne: dilongesha Timote malu a mu nyuma diakabanga “ku buana,” mbimueneke ne: uvua usua kumvuija ne: katshia pavuaye muana wa mu maboko. (2 Tim. 3:14, 15) Nenku, Timote wakalua muntu mushindame bimpe menemene mu nyuma. (Filip. 2:19-22) Baledi, nuenu penu nudi ne bua kulongesha bana benu kutuadija “ku buana” mudibi bikengela bua ‘kukolabu kumpala kua [Yehowa].’​—1 Sam. 2:21, Mukanda wa Mvidi Mukulu [Katolike, MMM].

³ Bapeshayi mâyi adibu nawu dijinga bua kukolabu: Anu bu mutu mitshi mitekete dijinga ne mâyi dîba dionso bua kukolayi bimpe, bana ba bidimu bionso badi dijinga ne mâyi a bulelela bua mu Bible bua kukolabu ne kuluabu basadidi ba Nzambi bapie mu nyuma. Dilonga dia mu dîku dia pa tshibidilu ke tshia kumpala tshidi tshikengela kuenza bua kulongesha bana bulelela ne kubambuluisha bua kushemejabu malanda abu ne Yehowa. Kadi baledi, nuatangilayi lumvu lua muana ne muana. Bua bana batshidi batekete, pamu’apa kubalongesha katantshi kîpi misangu ya bungi nekupatule bipeta bimpe kupita kulepesha dilonga ditudi tuenza bumue misangu anu mikese.​—Dut. 11:18, 19.

⁴ Kanuikadi nupepeja meji adi nawu bana benu a kulonga nansha. Balondelayi malu a bantu ba mu Bible. Balekelayi bikala bazola bimfuanyi bia malu a mu Bible anyi benza manaya pa malu a mu Bible. Ikalayi nuenza mudimu bimpe ne bande yetu ya video kabidi ne eyi ya diteleja ne drama ya malu a mu Bible. Akaja malu a kulonga mu dîku bua ikale makumbanyine bidimu bia bana ne makokeshi adibu nawu a dilonga. Dilongesha dia ku mbangilu nedikale dipepele, dikese; kadi padi muana wenda ukola, nudi mua kudikolesha ne kuya nadi kumpala kadiyi dimana. Enza bua dilongesha dia mu Bible dikale dia musangelu ne dishindamena pa malu mashilashilangane. Udi musue bua bana bebe ‘bajinge’ Dîyi dia Nzambi anyi? Nunku wenze muebe muonso bua dilonga dikale dibasankisha.​—1 Pet. 2:2.

⁵ Enzayi bua badifile mu midimu ya mu tshisumbu: Fundilayi bana benu bipatshila bidibu ne bua kulonda ku tshimue ku tshimue bua badifile bikole mu midimu ya mu tshisumbu yonso. Tshipatshila tshiabu tshia kumpala ntshinganyi? Baledi ba bana bakuabu batekete babidi bakamba ne: “Tuakabanga kubalongesha bonso babidi bua kuikalabu basomba tshimuma mu Nzubu wa Bukalenge.” Pashishe, longeshayi bana mua kuandamuna mu abu mêyi nkayabu mu bisangilu ne bua bafike ku didifundisha mu Kalasa ka Mudimu wa Teokrasi. Mu buambi badi mua kudifundila bua kufila trakte ku nzubu ne ku nzubu, kubala mvese mu Bible, kufila bibejibeji ne kuyikila ne bantu ku nzubu yabu.

⁶ Filayi tshilejilu tshimpe tshia disanka: Bana bebe batuku bakumvua dituku dionso wakula bualu bua Yehowa ne umusambila anyi? Batuku bakumona ulonga Dîyi diende, ubuela mu bisangilu, upatuka mu buambi ne uleja muudi ne disanka dia kuenza disua dia Nzambi anyi? (Mus. 40:8) Bidi ne mushinga bua kumonabu malu au ne bua nuenu kuenza bonso pamue nabu. Nsongakaji mukuabu ukadi mpindieu mukole udi ulonda bua bualu bua mamuende uvua mubakoleshe bana basambombo too ne ku diluabu Bantemu ba lulamatu ne: “Bualu buvua butusankisha bikole kudi Mamu buvua tshilejilu tshiende tshilenga; tshivua tshituyisha bikole kupita miaku ya mukana.” Munga muledi wa bana banayi wakamba ne: “Tshiambilu tshia ne: ‘Yehowa ikale kumpala kua malu onso’ katshivua anu miaku ya patupu kadi tshivua nsombelu wetu menemene.”

⁷ Baledi, tuadijayi kulongesha bana benu anu patshidibu batekete, nubalongesha bulelela bua mu Dîyi dia Nzambi, nubafundila bipatshila bia kulondabu tshimue ku tshimue ne nufila tshilejilu tshimpe menemene. Bushuwa, nebinuenze disanka dia mudibu benza mudimu eu!